Jwak 8 - Chiyawo Bible

¹ Ana ŵani ŵampaka alandane ni mundu jwalunda? Ana ŵani mpaka amanyilile kugopolela yindu? Mundu jwalunda lwakwe lukusilumpa lukondwa nipo sinya sikusatyoka pa ngope jakwe.

Kumpikanila mwenye

² Mgapikanileje malamusi ga mwenye, soni mkajanguyaga kulumbila* kwa Mlungu.

³ Yindu naga ngayikumsangalasya mwenye, mtyoce mwacitema pameso pakwe, pakuti akusatenda cilicose citicimsangalasye.

⁴ Maloŵe ga mwenye gali gakupunda, soni pangali jwa mpaka awusye yakutenda mwenye.

⁵ Jwalijose jwakupikanila malamusi gakwe ngasaciwona cakusawusya cilicose, nipo mundu jwalunda akusamanyilila ndaŵi ni matala gakutendela yosope.

⁶ Kandu kalikose kakwete ndaŵi jakwe ni utende wakwe, atamose kuti yisawusyo ya mundu yikusamsawusya mnope.

⁷ Pangali mundu jwakusamanyilila yitiyitendekwe, soni pangali mundu jwa mpaka atusalile mutiyiciŵela.

⁸ Mundu jwangali macili gakulamulila mpweya wa umi, myoyo soni jwalakwejo jwangali macili gakulamulila lyuŵa lya kuwa kwakwe. Ngondo jangatilika, myoyo ŵandu ŵakusatenda yakusakala ngasakulupuka.

Kwamucidwa kwa ŵandu ŵakusakala

⁹ Nayiweni yosope yeneyi pa ndaŵi jinaganisyaga mu mtima mwangu yindu yosope yayikutendekwa pacilambo capasi pano. Pana ŵandu ŵakusiŵalamulilaga acimjawo mwa ngalwe.

¹⁰ Naweni ŵandu ŵakutenda yakusakala ali mkusicidwa m'malembe mwawo, nipo pakuwuja ku malembeko ŵandu ŵalumbaga jemanjajo ligongo lya yitendo yawo. Yeleyi soni yili yangali mate.

¹¹ Ŵakulamula naga akucelewasya cilango ca ŵandu ŵa magambo, ŵandu ŵane akusalimba mtima ni kusakaga kutenda yakusakala nombe nawo.

¹² Atamose kuti mundu jwakulemwa akusatenda yindu yakusakala yejinji, jwalakwejo akusatama ni umi kwa ndaŵi jelewu. Nambo ngumanyilila kuti, “Naga mkumpikanila Mlungu yindu tiyicimjendela cenene.

¹³ Nambo ŵa ulemwa* yindu ngasiyajendela cenene, pakuti umi wawo tiwuciŵa wangatamilisya mpela ciwilili, pakutipo ali ŵangampikanila Mlungu.”

¹⁴ Pana cindu cine cangali mate cacikusatendekwa pa cilambo capasi pano. Cinduco cili cakuti: Ŵandu ŵakulungama akusapegwa cilango mpela ŵandu ŵakutenda yakusakala, nipo ŵandu ŵakusatenda yakusakala akusapegwa cilango mpela ŵandu ŵakutenda yakulungama. Nguti yeleyitu yili yangali mate.

¹⁵ Myoyo nguganisya kuti kuli cenene mundu asangalaleje ni umi wakwe, pakuti mundu jwangali cindu cine soni cambone pa cilambo capasi pano kupunda kulya, kumwa ni kulisangalasyaga. Kaneko mundujo taciŵa jwakondwa pa masengo gakwe pa masiku ga umi wakwe, gele Mlungu gampele jwalakwejo pa cilambo capasi pano.

¹⁶ Nalinjililaga kuti manyilile lunda ni masengo gosope gagakutendekwa pacilambo capasi pano, ngagona cilo ni musi.

¹⁷ Nagaweni masengo gosope ga Mlungu. Pangali mundu jwa mpaka apakombole kugamanyilila masengo gosope gagakutendekwa pa cilambo capasi pano. Atamose mundu alinjilile camtuli kuti ayimanyilile yeleyi, ngasapakombola. Atamose mundu jwalunda aŵecete kuti akumanyilila yindu, nambo kuli kwangakomboleka kuti jwalakwejo ayimanyilile.