Jwak 7 - Chiyawo Bible

Nganisyo syakwamba umi

¹ Mbili jambone jikusapunda mawuta gakununjila ga mtengo wapenani, lyuŵa lyakuwa likusapunda lisiku lyakupagwa.

² Kuli kwambone kwawula ku nyumba ja malilo kulekangana ni kwawula ku nyumba ja cindimba, pakuti ciwa cili mbesi ja ŵandu wosope, myoyo ŵandu ŵali cijumi akumbucileje yeleyi kuti ciwa cikutujembecela.

³ Canasa cili cambone kulekangana ni lukondwa, ligongo atamose kuti ngope jiŵe ja canasa, mtima ukusakomboleka kulijiganya kandu kane kakwe.

⁴ Mtima wa mundu jwalunda kaŵilikaŵili ukusaganisya ya ciwa. Nambo mtima wa mundu jwakuloŵela ukusaganisya ya lukondwa.

⁵ Kuli kwambone kuti mundu apikaneje kwamuka kwa ŵandu ŵalunda, kulekangana ni kupikanila nyimbo sya ŵakuloŵela.

⁶ Kuseka kwa mundu jwakuloŵela kuli mpela kutatasika kwa moto kusi kwa lulo. Yeleyitu yili yangali mate.

⁷ Naga mundu jwalunda akumlambusya jwine jwakwe, yeleyi yikusamtendekasya jwalakwejo kuŵa mpela mundu jwakuloŵela. Kupocela mbote ja cilo kukusajonanga mtima.

⁸ Mbesi ja cindu jili jambone kulekangana ni ndandililo jakwe. Kupilila kuli kwambone kulekangana ni kutenda lilama.

⁹ Mkajanguyaga kutumbila, pakuti kutumbila kukusikumsigalila jwakuloŵelajo.

¹⁰ Mkawusyaga kuti, “Ana ligongo cici kalakala yindu yaliji cenene kulekangana ni masiku agano?” Celeci nganiciŵa ciwusyo ca lunda.

¹¹ Mundu jwalijose jwali cijumi akwenela kuŵa jwalunda, yili yambone mpela kupocela ya masije.

¹² Lunda tilucimcinjilicisya m'mwejo mpela musikusamcinjilicisya mundu mbiya. Nambo umanyilisi wa yindu uli wakupunda ligongo lyakuti lunda lukusilucinjilicisya umi wa mundu jwakwete umiwo.

¹³ Mganicisye ya masengo gapanganyisye Mlungu. Ana ŵani ŵampaka apakombole kongola cindu ciŵapanganyisye jwalakwejo cili cepindice?

¹⁴ Naga yindu yikumjendela cenene, msangalaleje, nambo naga yikwika yisawusyo mgambeje kumbucila kuti, Mlungu akusatumisya lukondwa ni yisawusyo; kuti mkamanyilila yiticitendekwa msogolo.

¹⁵ Pa umi wangu wangali matewu nayiweni yindu yosope. Naweni kuti ŵandu ŵambone akusawa mwacitema ligongo lyakutenda yindu yambone, nipo naweni ŵandu ŵangalumbana ali mkutama ni umi kwa ndaŵi jelewu, yakusakalayo ali mkutendape.

¹⁶ Myoyo mkasiŵa mundu jwambone kapena jwalunda mnope, ana ligongo cici mkusaka kuliwulaga mwasyene?

¹⁷ Mkaŵa ŵangalumbana kapena ŵakuloŵela mnope, ana tim'wile cici masiku genu mkanigakwane?

¹⁸ Kuli kwambone kuti mkuye litala limpepe, nambo soni mkasimleka kwenda litala linelyo. Naga mkumjogopa Mlungu timcipindula ni matala gaŵili gosopego.

¹⁹ Lunda lukusilupeleka macili kwa mundu kupunda macili ga mpaka apegwe ni acimlongola likumi ŵa mu msinda.

²⁰ Kweli, pa cilambo capasi pangali mundu jwakusatenda yindu yambonepe ni ngalemwa.

²¹ Mkagambaga kupikanila yakuŵeceta yosope ya ŵandu, mwine mwakwe timcimpikana jwamasengo jwenu ali kumtukana m'mwejo.

²² Mtima wenu ukusamanyilila kuti nomwe ŵakwe mwatukene ŵandu ŵenu.

²³ Yosopeyi nayipimile ni lunda lwangu. Natiji kuti timbe jwalunda, nambo lundalo lwaliji kwakutalicila mnope ni une.

²⁴ Yele yayipali yili kwakutalika, yili yakusokoka mnope. Ana ŵani mpaka apakombole kuyimanyilila yeleyi?

²⁵ Myoyo naŵisilepo mtima wangu kuti manyilile, wungunye ni kusosasosa lunda ni muyikusaŵela yindu. Nasacile soni kuti mbikanicisye kusakala kwakwe kwa kuloŵela, kuloŵela kwakwe kwa masoka.

²⁶ Nasimene cindu cine cakwe cakupweteka kupunda ciwa. Cindu celeci cili ŵakongwe ŵali mpela cigwenembe, mtima wakwe wawuli mpela lwawu, soni magasa gakwe naga gali gamkamwile mciwunu mwenu gakusaŵa mpela unyolo. Mundu jwakusamsangalasya Mlungu akusamtila jwamkongwejo, nambo mundu jwa ulemwa akusakunda kuti aŵe kapolo jwa jwamkongwejo.

²⁷ Yeleyitu ni yinayisimene pa ndaŵi jinasonganyaga yindu yakulekanganalekangana pampepe kuti manyilile muyikusajendela yinduyo.

²⁸ Yeleyitu ni yiŵasosaga mtima wangu kaŵilikaŵili nambo nganinayisimana. Namsimene jwamlume jumope jwagoloka sikati ja ŵandu 1,000, nambo jwamkongwe jwagoloka nganinamsimana ni jumo jose sikati ja ŵandu wosopewo.

²⁹ Nalijiganyisye cindu cimo cakuti, Mlungu pakumpanganya mundu, ŵampele mtima wambone, nambo uwe tukusakuya matala getu gakusakala.