Jwak 6 - Chiyawo Bible

¹ Cakusakala cine cinaciweni pa cilambo capasi pano cicikwasawusya ŵandu ni aci:

² Mlungu akusampa jwine jwakwe yipanje ni ucimbicimbi ni yosope yakusayisaka pa umi wakwe, nambo jwangapeleka upile wakuti usangalale nayo yinduyo, m'malo mwakwe jwakusasangalala ni yinduyo akusaŵa mundu jwine jwa cilendo. Yeleyi yili yangali mate, nipo ngaŵa yambone.

³ Mundu akusakomboleka kuŵeleka ŵanace 100 ni kutama ni umi ndaŵi jelewu. Nambo atamose kuti yakweyo yitupe camtuli, naga ngakusangalala ni yindu yambone pa umi wakwe, ni kungapocela ucimbicimbi wa malilo gakwe pambesi pakwe, une nguti mbundumuko jili cenene kulekangana ni mundujo.

⁴ Likandi lyewelyo likusagamba kupelenganya kwinjila mu cipi, mwele likusaliŵalicika.

⁵ Atamose kuti likandi lyewelyo nganiliwona lyuŵa, nambope likusapumula kulekangana ni mundu jwa umi welewu jula,

⁶ atamose kuti ŵatemi cijumi yaka yejinji ngayiwona yambone. Wosopewo akusajawula ku malo gampepe.

⁷ Mundu akusakamula masengo kuti apate cakulya, nambo jwalakwejo ngayikusamkwanila.

⁸ Ana mundu jwalunda ali jwambone camtuli kumpunda mundu jwakuloŵela? Ana mundu jwakulaga jwakwamba kumanyilila kutama cenene pameso pa acimjakwe apindwilepo cici?

⁹ Kuli kwambone gambaga kuyilola yinduyi ni meso kulekangana ni kuyisakaga mu mtima. Yeleyi yili yangali mate.

¹⁰ Cilicose cacipali ŵacipele kala lina, tukusamanyilila soni kuti mundu ngaŵa mkukangana ni mjakwe jwali jwamacili kumpunda jwalakwejo.

¹¹ Maloŵe naga gakutupa, nombe nayo yangali mate yikusatupa. Nambi mundu tapindulepo cici?

¹² Ana mundu mpaka amanyilile uli yindu yakumnonyelesya mundu kwa ndaŵi ja panandi pali cijumi jwalakwejo? Ana mundu mpaka amanyilile uli yitiyicitendekwa pa cilambo capasi cino jwalakwejo pitaciwa?