Jwak 5 - Chiyawo Bible

Mkajanguyaga kulumbila

¹ Msamaleje wende wenu pa ndaŵi jimkwawula ku Nyumba ja AMBUJE.* Kuli kwambone kwawula kweleko kukulijiganya kulekangana ni kupeleka mbopesi ja ŵandu ŵakuloŵela ŵingakumanyilila kuti yakutendayo yili yakusakala.

² Mtandeje kuganisya mkaniŵecete, soni mkalumbilaga mwacitema kwa Mlungu. Pakuti jwalakwejo ali kwinani, nipo m'mwejo mli pa cilambo capasi pano, myoyo mkaculuyaga yakuŵeceta.

³ Naga mkupunda kudandawula mu mtima mwenu kudandawulako kukusayika ni sagamisi syakusakala, soni kuculuya yakuŵeceta kukusaloŵesya.

⁴ Myoyo pamkulumbila kwa Mlungu, mcitendeje cinduco mwacitema, ligongo Mlungu jwangasangalala ni ŵandu ŵakuloŵela. Myitende yindu yimlumbileyo.

⁵ Kuli kwambone kungalumbila kandu kwa Mlungu, kulekangana ni kuti mlumbile nambo ngacitenda cindu ciwulumbileco.

⁶ Pakamwa penu pakamlemwekasya m'mwejo, kuti mkaja kukumsalila jwakutaga mbopesi kuti ngambile kulemwesya. Ana ligongo cici mkusaka kumtumbilisya Mlungu ni kuti ajonanje masengo gosope gimpanganyisye?

⁷ Sagamisi naga situpile yakuŵeceta ya ŵandu nombe nayo yikusaŵa yejinji. Nambo m'mwejo mumjogopeje Mlungu.

Umi uli wangali mate

⁸ Mkasimsimonga pimkuwona kuti boma jikwaliŵatila ŵandu ŵakulaga ni kwakanya cilungamo. Nduna jilijose jikusaloleledwa ni nduna jijakwe jajikwete ukumu ŵelewo, nambo wosopewo akusaloleledwa soni ni jwamkulungwa jwine kwapunda jemanjajo.

⁹ Ŵandu wosope akusajigala yindu yagowola ya ku migunda, nambo mwenye ni ŵakusapindula mnope ni migundajo.

¹⁰ Jwalijose jwakusanonyela mbiya jwangajikutila ni mbiyasyo, yalumo soni jwalijose jwakusanonyela yipanje jwangajikutila ni congola yala. Yeleyitu yili yangali mate.

¹¹ Naga yipanje yitupile, nombe ŵakulya nawo akusatupa. Nambi msyene akusapindula cici, eti gambaga kuyilola ni meso basi?

¹² Jwamasengo akusagona lugono lwambone atamose kuti alye panandi kapena kwejinji. Nambo ŵakusicila ŵangagona lugono ligongo lya yipanje.

¹³ Pa cilambo capasi pano pana cindu cine cakogoya kwejinji cinaciweni une: ŵandu akusasunga mbiya nambo kaneko mbiyasyo sikusisyapweteka acimsyenewo,

¹⁴ kaneko mbiyasyo sikusamala nipo mundujo akusasoŵa cakuti ŵape ŵanace ŵakwe.

¹⁵ Mpela mundu muŵapagwile kutyocela mcitumbo mwa mamagwe ali jwangali cilicose, myoyo soni tacijawula makonope ku malembe. Jwalakwejo ngasajigala kandu kalikose kiŵakapanganyicisye masengo pa cilambo capasi pano.

¹⁶ Yeleyi nganiyiŵa yambone kuti mundu ajawuleje ku malembe mpela muŵayicile. Ana cakupindulisya cakwe ni cici pakuti jwalakwejo ŵakamwile masengo gamtega?

¹⁷ Masiku gakwe gosope umi wakwe waliji wegumbale ni cipi, canasa, yisawusyo, yilwele ni kudandawula.

¹⁸ Apano pana cindu cinaciweni kuti cili cambone nambo soni cakwenela: kuli kwambone kuti mundu alyeje, amweje, ni kusangalala pa masengo gakwe gosope gakusakamula pa cilambo capasi cino. Celeci ni cele mundu akukomboleka kuŵeceta kuti cakwe.

¹⁹ Naga Mlungu amsicilisye mundu pakumpa jwalakwejo yipanje ni katundu kuti asangalaleje nayo, mundu akwenela kuyipocela yeleyi ni kusangalalilaga masengo gakwe, pakuti welewu uli mtuka wa Mlungu.

²⁰ Mundu jweleju ngasakumbucila mnope ya unandi wa masiku ga umi wakwe, ligongo lyakuti Mlungu agumbesye lukondwa mu mtima mwa jwalakwejo.