Jwak 4 - Chiyawo Bible

¹ Naweni soni ŵandu ali mkulagasidwa pa cilambo capasi pano. Jemanjajo ŵaliji mkulila, nambo paliji pangali jwalijose jwakuti ŵanyalasye jemanjajo, ligongo lyakuti ŵiŵaliji mkwalagasya jemanjajo ŵaliji ŵamacili mnope.

² Nipo naganisyaga kuti ŵandu ŵawe ali cenene kulekangana ni ŵali cijumi.

³ Nambo ŵapundile mnope ni ŵimkinapagwe, ligongo lyakuti nganayiwona yitendo yosope yayikutendekwa pa cilambo capasi pano.

⁴ Kaneko namanyilile soni kuti uwe tusakamula masengo ni kutenda yindu yakusimonjesya ligongo lyakuti tukusatendelanaga wiwu. Yeleyi yili yangali mate, soni kuti uyipikanicisye kuli kwamba kulisawusya.

⁵ Jwakuloŵela akusagamba kutama ni kuwaga ni sala ligongo lyakusoŵa cakulya.

⁶ Kuli kwambone kutama ni umi ŵa mtendele kulekangana ni kupicisikwa ndaŵi syosope ni kwamba kulisawusya.

⁷ Naciweni soni cindu cine cacili cangali mate pa cilambo capasi pano.

⁸ Jwapali mundu juŵaliji jikape, nganakola mwanace kapena mlongo mjakwe, nambo jwalakweju jwapitilisye kukamula masengo gakwe nipo nganajikutila ni yipanje yiŵakwete. Myoyo nganaliwusya kuti, “Ana masengo gosope gingukamulaga ni kulikanya kusangalala namsyene ngwakamulila ŵani?” Yeleyitu yili yangali mate soni yili yakutesya canasa.

⁹ Kuli kwambone kutama ŵandu ŵaŵili kulekangana ni kutama jikape, ligongo masengo ga ŵandu ŵaŵili gakusapindulisya.

¹⁰ Pakuti jemanjajo naga akugwa, jwine tacimjimusya mjakwe. Nambo naga jwine akugwa ali jikape, ni kuti yisawisye, ligongo lyakuti pangali jwakuti mpaka amkamucisye jwalakwejo.

¹¹ Ŵandu ŵaŵili naga akugona malo gampepe akusatukutisyana, nambi mundu jumo mpaka alitukutisye uli?

¹² Mundu jwine komboleka kumpunda mjakwe jwali jikape, nambo naga akuŵa ŵaŵili jemanjaji tacilimbana nawo. Ngonji sitatu sikusalimba kulekangana ni lukonji lumo.

¹³ Mcanda jwakulaga ni jwalunda ali jwambone kulekangana ni mwenye jwamcekulupe soni jwakuloŵela jwele jwali jwangapikanila upungu wa ŵandu ŵane.

¹⁴ Atamose kuti jwalakwejo nganapagwila mwiŵasa lya ucimwene nambo soni kuti jwalakweju ŵaliji mu ukayidi soni ali jwakulaga, jwalakweju komboleka kuŵa mwenye.

¹⁵ Naganisyaga ya ŵandu wosope ŵakutama pa cilambo capasi pano, ni namanyilile kuti sikati ja jemanjajo pana mcanda jutacijinjila ucimwene.

¹⁶ Mwenye komboleka kwalamulila ŵandu ŵajinji ŵangaŵalanjika, nambo jwalakwejo naga ali awile, pangali jwalijose jutacimtogolela jwalakwejo pa masengo gosope giŵatesile jwalakwejo. Yeleyitu yili yangali mate soni kuli kwamba kulisawusya.