Jwak 3 - Chiyawo Bible

Yesope yikusatendekwa mu ndaŵi jakwe

¹ Cindu cilicose cicikutendekwa pa cilambo capasi pano cana ndaŵi jakwe, jiŵaŵisile Mlungu.

² Pana ndaŵi jakupagwa ni ndaŵi ja kuwa, pana ndaŵi ja kupanda ni ndaŵi ja kugowola yakupandayo.

³ Pana ndaŵi jakuwulaga ni ndaŵi ja kuposya, pana ndaŵi ja kugumula ni ndaŵi ja kutaŵa soni.

⁴ Pana ndaŵi ja canasa ni ndaŵi ja kusangalala, pana ndaŵi jakulila malilo ni ndaŵi jakuŵina.

⁵ Pana ndaŵi jakutama malo gamo ni ndaŵi jakutalikangana, pana ndaŵi jakumbatilana ni ndaŵi jakuleka kumbatilana.

⁶ Pana ndaŵi jakusosasosa ni ndaŵi jakwasa mwa ngosi, pana ndaŵi jakusunga ni ndaŵi jakwasa.

⁷ Pana ndaŵi jakupapula ni ndaŵi jakutota, pana ndaŵi jakutama jii ni ndaŵi jakuŵeceta.

⁸ Pana ndaŵi jakunonyelana ni ndaŵi jakuŵengana, pana ndaŵi ja ngondo ni ndaŵi ja mtendele.

⁹ Ana tukusapindula cici pa masengo gosopega?

¹⁰ Nigaweni masengo gapelece Mlungu kwa uwe kuti tukamuleje.

¹¹ Jwalakwejo ŵapanganyisye cindu cilicose kuti ciŵe cambone mu ndaŵi jakwe. Atupele soni uweji lunda lwakuti tumanyilileje ya msogolo, nambo uweji ngakomboleka kuti tuyimanyilile yosope yene.

¹² Ngumanyilila kuti kwa mundu pangali soni cindu cine cambone kupunda kutama mwakusangalala pa ndaŵi jituli cijumi.

¹³ Wosope ŵene tukwenela kulya ni kumwa ni kusangalala pa masengo gosope gitukusatenda, pakuti welewu uli mtuka wa Mlungu.

¹⁴ Ngumanyilila kuti yosope yakusatenda Mlungu ngasiyimala mpaka kalakala. Pangali ya mpaka yikombolece kuyityosya kapena konjecesya pa yele yinduyo. Mlungu ŵayipanganyisye mwamti myiyi, kuti uwe twalambileje ŵalakwewo.

¹⁵ Yindu yayipali sambano jinoyi, yapali kala, yele yitiyicipagwa msogolo nombe nayo yapali kala. Mlungu akusayiwucisya soni yindu yakala yiyapite kala kuti yitendekwe soni.

Pa cilambo capasi pangali cilungamo

¹⁶ Cindu cine cinaciweni pa cilambo capasi pano cili cakuti, papakwenela kuŵa cilungamo pakusimanikwaga kuti pangali cilungamo.

¹⁷ Myoyo une natandite kuganisya mu mtima mwangu kuti, Mlungu tacapa cilango ŵandu wosope ŵambone ni ŵakusakala, pakuti jwalakwejo jwaŵisile ndaŵi jakutendela cindu cilicose ni masengo galigose.

¹⁸ Namanyilile kuti Mlungu akutulinga uwe, ni cakulinga cakuti atumanyisye uwe kuti nganitulekangana ni yinyama.

¹⁹ Yindu yayikusatendekwa kwa ŵandu iyoyo soni yikusatendekwa kwa yinyama. Mundu akusaŵaga mucikusaŵela cinyama, soni yosopeyi yikusapumula mpweya umpepe, nipo pangali cakupunda cijakwe. Yosopeyi yili yangali mate.

²⁰ Yosope yikusajawula ku malo gampepe. Uwe pamo ni yinyama ŵatupanganyisye kutyocela kwitaka, nipo tuciwujila kwitaka peko.

²¹ Ana mundu mpaka asimicisye uli kuti msimu wa mundu ukusajawula kwinani nipo msimu wa cinyama ukusajawula pasi mwitaka?

²² Myoyo nayiweni kuti pangali cindu cambone cakupunda kuti mundu asangalalileje masengo gakwe, pakuti cakwe cisyesyene ni celeci. Ana ŵani mpaka apakombole kumanyilila yitiyicimtendekwela pitaciwa?