Jwak 2 - Chiyawo Bible

¹ Ndaŵi sine mu mtima mwangu natiji kuti, sambano linje yakulinonyelesya, nalisangalasye namsyene. Nambo nayiweni kuti yeleyi yaliji yangali mate.

² Nayiweni kuti kuseka gali masoka, nombe nayo yakusangalasya yili yangapindulisya.

³ Nalinjile kulisangalasya ni finyo, nambo nayiweni kuti kweleko kwaliji kuloŵela. Naganisyaga kuti mwine mwakwe litala mpela lyeleli komboleka kuŵa lyambone lyakusalikuya ŵandu ŵane pakusaka kusangalala kwa masiku ga panandi ni umi wawo.

⁴ Natesile masengo gekulungwa. Nataŵile nyumba soni napandile mipeleya.

⁵ Nalimile matimbe ni migunda ja yitela, nipo napandilemo yitela ya yisogosi yakulekanganalekangana.

⁶ Nasokwele matanda kuti mesi ga mwelemo gajitilileje m'migunda ja yitelajo.

⁷ Nasumile acikapolo ŵacalume ni ŵacakongwe, nambo soni nakwete acikapolo ŵane ŵiŵapagwile m'nyumba mwangu. Nakwete yilangwa yejinji kwapunda ayimwene wosope ŵiŵalamulilaga ku Yelusalemu kalakala.

⁸ Nasunjile silifa* ni golidi* nambo soni cipanje cakutyocela kwa ayimwene ŵa m'misi ŵinalamulilaga une. Nakwete acalume ni acakongwe ŵakunjimbila une nyimbo. Nakwete soni acakongwe ŵane ŵajinji ŵakusamsangalasya mundu mwakusacila mundujo.

⁹ Myoyo naŵele mundu jwakupikanika mnope, kwapunda ayimwene wosope ŵaŵalamulilaga ku Yelusalemu kalakala, nambo naliji ciŵelape mundu jwalunda.

¹⁰ Nakwete cilicose cinasakaga. Nganinalijima namsyene yakusangalasyayo, pakuti mtima wangu ŵasangalalaga ni masengo gangu gosope ginagakamwile, nipo jeleji jaliji mbote jangu.

¹¹ Sambano natandite kuyiganisya yosope yinatesile, masengo gosope gakusitopesya ginakamwile, nayiweni kuti yosope yeneyo yaliji yangali mate, soni kwaliji kwamba kulisawusya. Pa cilambo capasi pangali cindu cakuti mundu ni kupindula naco.

¹² Kaneko natandite kuliwusya namsyene kuti ana lunda ni cici, masoka ni cici, nambi kuloŵela ni cici. Ana mundu jwakwisa kukwinjila ucimwenejo mpaka atende cici camkanacitende mwenye jwakalajo? Yilitu ayo peyo yiŵatesile kala jwalakwejo.

¹³ Nipo nayiweni kuti, “Lunda luli lwambone kulekangana ni cipi.

¹⁴ Ŵandu ŵalunda akusajenda acilolaga kusogolo, nambo ŵakuloŵela akusajenda mwangalimanyilila.” Nambo namanyilile kuti cindu cacimtendekwele mundu jwalundajo, cicoco ticicimtendekwela soni mundu jwakuloŵelajo.

¹⁵ Kaneko une natandite kuganisya kuti, “Yele yayikusatendekwa kwa ŵandu ŵakuloŵela, iyoyo tiyicitendekwa kwa une soni. Ana mbatile cici pingwete lunda lwesope lwelelu?” Nalijanjile namsyene kuti, “Pangali cimbatile.”

¹⁶ Pakuti mundu jwalunda, pamo ni jwakuloŵela jwakwe, wosopewo ŵangakumbucilidwa kwa ndaŵi jelewu naga ali awile. M'masiku gakwisago, wosopewo taciliŵalika. Mpela yakuti pakuŵa mundu jwakuloŵela ni m'momo soni mwakusawila mundu jwalunda.

¹⁷ Yeleyi yandendekasisye une kuti nawuŵenje umi, ligongo lyakuti yindu yosope yayikutendekwa pacilambo capasi pano yikusandesya canasa. Yosope yili yangali mate soni kuti uyipikanicisye kuli kwamba kulisawusya.

¹⁸ Masengo gangu gosope ginatesile pa cilambo capasi pano nganigambindulila une, ligongo namanyilile kuti ngwenela kwalecela ŵane ŵitaciyika ku kwinjila m'malo mwangu.

¹⁹ Ana ŵani ŵakumanyilila kuti mundu jwakwinjila m'malo mwangujo taciŵa jwalunda kapena jwakuloŵela? Nambope jwalakwejo taciŵa jwakulamulila yosope yene yinatesile pa cilambo capasi panoci ni lunda lwangu. Yeleyi soni yili yangali mate.

²⁰ Myoyo natandite kwasa mtima ligongo lya masengo gosope ginakamwile mwakulajilila pa cilambo capasi pano.

²¹ Ndaŵi sine pakusasimanikwa kuti mundu jwakamwile masengo mwakulajilila ni mwa lunda lwakwe, akusamlecela yosope yeneyo mundu jwine jwanganayikamulila masengo. Yeleyitu yili yangali mate, nambo soni nganiyiŵa yambone.

²² Ana mundu akusapindula cici pa masengo gakwe gosope gakamwile jwalakwejo pacilambo capasi pano?

²³ Pa masiku gakwe gosope gakusaŵaga ga yipwetesi soni gakudandawulisya. Atamose cilo mtima wa mundujo ŵangapumula ligongo lya masengo. Yeleyi soni yili yangali mate.

²⁴ Pangali cindu cine cambone campaka mundu akombolece kutenda pa masengo gakwe kupunda kulya, kumwa ni kwikutila pa masengo gakwego. Namanyilile soni kuti welewu uli upile wakutyocela kwa Mlungu.

²⁵ Naga pangali jwalakwejo, ana ŵani mpaka apakombole kulya kapena kusangalala mwa jikape?

²⁶ Mlungu akusapeleka lunda, umanyilisi ni lukondwa kwa mundu jwakusamsangalasya jwalakwejo. Nambo kwa mundu jwa ulemwa, Mlungu akusampa masengo ga kusonganya ni kusunga kuti yapatileyo yipelecedwe kwa mundu jwakumsangalasya Mlungu. Yeleyi soni yili yangali mate, nambo soni kuti uyipikanicisye kuli kwamba kulisawusya.