Jwak 12 - Chiyawo Bible

¹ Mumkumbucileje soni Mlungu juŵampanganyisye m'mwejo m'masiku genu ga ucanda, mkanigamyicilile masiku gakusakala, soni mkaniyiyice yaka yitimcitiji kuti, “Umi umbesisye.”

² Ndaŵi ja ucekulu wenu, lyuŵa, lilanguka, mwesi, ndondwa, yosope tiyiciŵa cipi kwa m'mwejo, nipo mawunde ngasigatyoka.

³ Ndaŵi jelejo cilu cenu ticicitetemela, meno genu tigacilepela kutawuna, soni meso genu tigacitenda ndandagasi.

⁴ Mawiwi genu tigacisiŵa nipo ngasigapikana masegwe. Ngasimpikana soni masegwe ga pa matuli, kapena kulila kwa yijuni kundaŵi.

⁵ Timcijogopaga kukwela pa malo gamwinani mnope, soni kwenda tikuciŵa kwakumsawusya. Mu mtwe mwenu timuciŵa wuli, timcilepela kwenda mwakuliwuta mwasyene, soni ngasimsosa cine cilicose. Wosope tukwawula kumalo kutucitamako mpaka kalakala, nipo pitucijawulaga, m'misewu mosope timuciŵa kulila.

⁶ Ceni celuceluce ca silifa* ticicikatika, mbale ja silifa tijicikasika kapena lulo tilucikasicila ku cisima, nipo lukonji lwakwinjisya mkati pakuteka mesi mcisima tilucikatika.

⁷ Yilu yetu tiyiciwujila kwitaka mpela kuyatyocele, nipo msimu tiwuciwujila kwa Mlungu juŵawupelece kwa uweji.

⁸ Jwakulalicila jwatite, yangali mate, yangali mate. Yosope yili yangali mate.

Maloŵe gambesi

⁹ Ligongo lyakuti jwakulalicilajo jwaliji jwalunda, jwalakwe ŵapitilisye kwajiganya ŵandu yele yiŵayimanyi jwalakwejo. Jwalakwejo ŵalijiganyisye ni kuwungunya ya misyungu mwakusamalicisya cenene.

¹⁰ Jwakulalicilajo ŵalinjile kuti asimane maloŵe gakutulasya mtima, nipo ŵalembile maloŵe gakuwona ni mtima ŵambone.

¹¹ Maloŵe ga mundu jwalunda gali mpela yitela yesongole, yele jwakucinga yakusacinjila ngondolo kuti sijende, nipo yakuŵeceta yakwe yiŵayisongenye malo gamo yili mpela misomali jekomedwe mnope. Yakuŵeceta yeleyi yikusatyocela kwa Mlungu, mkucinga jwetu.

¹² Mwanangu, mkalamuce ni majiganyo gane kupunda gelega. Kulemba mabuku kwangali mbesi, soni kulijiganya kwejinji kukusapesya cilu.

¹³ Basi, yosope yipikanice, cindu cine cili cakuti: Mumpikanileje Mlungu, nipo mgasunjeje malamusi gakwe, pakuti ali ni ligongo lyakwe jwalakwejo ŵatupanganyisye.

¹⁴ Mlungu tacipeleka cilango pa yitendo yetu yili yose, yambone kapena yakusakala, atamose yindu yiyatendedwe pacisyepela.