Jwak 10 - Chiyawo Bible

¹ Membe syewe sikusaŵika liwungo lyakusakala mwibotolo lya mawuta gakununjila. Myoyo soni kuloŵela kwapanandi kukusajonanga lunda ni ucimbicimbi.

² Mtima wa mundu jwalunda ukusamlongolela jwalakwejo cenene, nambo mtima wa mundu jwakuloŵela ukusiwumsokonesya.

³ Mundu jwakuloŵela pakwenda mu msewu, yitendo yakwe yikusaŵa yangali mate, soni jwalijose akusamanyilila kuti jwalakwejo ali jwakuloŵela.

⁴ Naga jwakumlamulila akumtumbilisya m'mwejo, mkaleka masengo genu, pakuti kuwusimana mtima kukusakolosya atamose yakulemweceka yekulungwa.

⁵ Pa cilambo capasi pano pana cindu cine cinaciweni, cindu cakwe cili ulemwa* wakusatenda ŵakulamulila pa kulamula kwawo kwangagolosya.

⁶ Ŵandu ŵakuloŵela akusiŵapa masengo gapenani, nipo ŵakalamuka akusiŵapaga masengo gangaŵa gambone.

⁷ Naweni acikapolo ali mkwenda pa mahaci, nipo ŵakulamulila ali mkwenda pasi mpela acikapolo.

⁸ Jwakusasokola lisimbo, tacigwilamo msyene. Jwakusapowola lipupa, lijoka tilicimluma msyene.

⁹ Jwakusakasa maganga, magangago komboleka kumpweteka jwalakwejo. Jwakusasala sasu, komboleka kuwulala nasyo.

¹⁰ Naga liŵago lyenu ngalikutema, soni nganimlinola, yikusamjigalila macili gejinji macili gejinji pakusala.

¹¹ Yili yangapindulisya kumanyilila kuling'andila lijoka, lijokalyo lili likulumile kala.

¹² Maloŵe ga mundu jwalunda gakusasangalasya, nambo maloŵe ga mundu jwakuloŵela gakusajonanga.

¹³ Jwakuloŵela akusatanda kuŵeceta maloŵe gakuloŵela, pambesi pakwe maloŵe gakwe gakusagamba kuŵa ga masoka basi.

¹⁴ Jwakuloŵela akusagamba kuculuya maloŵe, ana ŵani ŵitacimanyilila yitiyicitendekwa msogolo pitaciwapo?

¹⁵ Jwakuloŵela akusakamula masengo mwakulipesya, nambo litala lya ku msinda ŵangalimanyilila.

¹⁶ Likungu kwa cilambo capasi, cilambo capasico cikusaŵaga pa yipwetesi yekulungwa naga mwenye jwenu ali ciŵela mwanace, soni naga nduna syenu sikusacesya ku cindimba cilo cosope.

¹⁷ Nambo mkwete upile naga mcilambo mwenu muli mwana mwenye jwakwete nganisyo syambone ni nduna sisikusatenda yindimba mu ndaŵi jakwenela, kuti siŵeje sya macili ngaŵa kuti sikolelweje.

¹⁸ Msakasa ukusawowocela ni kusulula naga msyene nyumbajo ali jwaulesi.

¹⁹ Cindimba cikusasangalasyaga ŵandu, nipo finyo ali jwakusangalasya umi. Nambo yosopeyo yikusasaka mbiya kuti uyitende.

²⁰ Mu mtima mkasimumnyosyaga mwenye. Atamose mcipinda mwenu mwene mkasimwatukanaga ŵakusicila. Mwine kajuni kamwinani kapena kacilombo kaguluka kakomboleka kumpikana m'mwejo, kaneko ni kuja kukusala kwa ŵele umwaŵecetejewo.