Jwak 1 - Chiyawo Bible

Umi uli wangali mate

¹ Aga gali maloŵe ga Jwakulalicila, mwanace jwa Daudi, juŵaliji mwenye jwa ku Yelusalemu.

² Yangali mate, yangali mate, Jwakulalicila jwatite myoyo. Umi uli wangali mate, yosope yili yangali mate.

³ Ana mundu akusapindula cici pa masengo gosope gakupesya gakusakamula pa cilambo capasi cino?

⁴ Mpago ukusamala, wine soni ukusayika, nambo cilambo capasi cangacenga mpaka kalakala.

⁵ Lyuŵa likusakopoka, soni likusakapila, ni likusajawula mwacitema kulyakopocele.

⁶ Mbungo jikusapujila kum'mwela ni kupujila soni ku mpoto. Jikusapuga mwakusyungulila nipo kaneko jikusawujila kujityocele.

⁷ Sulo syosope sikusaja kutaga mesi m'nyasa, nambo nyasa jangagumbala, kugatyocele mesi gakusawujila kukoko.

⁸ Yindu yosopeyi yakupesya; mwakuti mundu ngaŵa mkupakombola kusala kupesya kwakwe; meso gangajikutila ni kulola, nombe nago mapikanilo gangajikutila ni kupikana.

⁹ Yiyapali kalako ni tiyicitendekwa; nipo yiyatendekwe kalako ni yitiyicitendekwa.

¹⁰ Ana pana cindu campaka asale jwine kuti, “Aci ni ca sambano?” Iyayi, celeco capali kalakala uwe mkanitupagwe.

¹¹ Pangali jwakusakumbucila yindu yiyatendekwe kalakala, soni pangali mundu jutacikumbucila yayikutendekwa sambano jino.

Lunda lwa Jwakulalicila

¹² Une naŵecete yeleyi pinatamaga ku Yelusalemu ndili mwenye jwa ku Isalaeli.

¹³ Mu mtima mwangu nasacile kupikanicisya mnope yosope yene yayikusatendekwa pa cilambo capasi pano. Aga ni masengo gakusawusya giŵatupele Mlungu kuti tutendeje.

¹⁴ Nayiweni yindu yosope yayikutendekwa pa cilambo capasi pano, nipo ngumsalila kuti yosope yili yangali mate, soni kuyisosa yeleyo kuli mpela kwamba kulisawusya.

¹⁵ Ngaŵa mkomboleka kucijongola soni cindu cepindice; soni ngaŵa mkuŵalanjila cindu camkanicipagwa.

¹⁶ Mu mtima mwangu natiji kuti, “Une ngwete lunda lwejinji kwapunda ayimwene wosope ŵiŵalamulilaga ku Yelusalemu kalakala. Nalijiganyisye yejinji kwambaga lunda ni umanyilisi.”

¹⁷ Nalinjile kulijiganya soni kulekangana kwakwe kwa umanyilisi ni kuloŵela, lunda ni masoka. Nambo nayiweni kuti kutenda myoyo kwaliji kwamba kulisawusya.

¹⁸ Pakuti lunda lwejinji lukusayicisya canasa, mundu pakonjecesya lunda ni kuti akonjecesya canasa.