Hoseya 9 - Chiyawo Bible

Aisalaeli tacipegwa cilango

¹ Aisalaeli, mkakola yisangalalo yine mpela ayila ya ŵandu ŵa mitundu jine.* Mumlesile Mlungu jwenu mpela mwakusatendela jwamkongwe jwangakulupicika. Mlisumisye kwa mlungu jwakolanjidwa Baala* mpela jwamkongwe jwa cikululu, kuti mkapoceleko yagowola yejinji.

² Pangakaŵa timciŵa mli ŵangali malo gakupwagulila tiligu ni malo gakuminyila mipeleya, myoyo ngisimpocela finyo jwasambano jwakuti m'mwe.

³ Ŵandu ŵa ku Isalaeli ngisatama soni mcilambo ca AMBUJE, nambo taciwujila soni ku ukapolo ku Iguputo kwele kutacilyaga yakulya yelekasidwe ku Asiliya.

⁴ Kweleko ŵandu ngisapeleka cakumwa ca finyo kwa AMBUJE, ngisapeleka soni mbopesi kwa jwalakwejo. Cakulya cawo ticiciŵa mpela capa malilo, mwakuti jwalijose jutacilya cakulyaco taciŵa jwamsakale. Ticiciŵa cakulya cagamba kulila salape basi ngaŵaga cakuti ni kuja kukupeleka ku Nyumba ja AMBUJE.

⁵ Ana pitijiciyika ndaŵi ja cindimba, lisiku lyakwacimbicisya AMBUJE, ana ŵanduwo tacitenda cici?

⁶ Ndaŵi ja cilango pitijiciyika, jemanjajo ni kupwilingana, Aiguputo tacasonganya jemanjajo, ni kuja kukwasika ku malembe ku Memfisi peko. Pa yida yawo ya silifa* tipacimela manyasi soni m'malo gawo gakutama timucimela miŵa.

⁷ Ndaŵi ja cilango jiyice, ndaŵi jakuti jwalijose apocele mwakulingana ni mwatendele. Yeleyo pitiyicitendekwapo, Aisalaeli tacimanyilila kuti yeleyi yili yakuwona. Sambano mkuŵecetaga kuti, “Jwakulocesyaju ali jwakuloŵela. Mundu jwakwete lunda lwa kwa Mlunguju ali jwa masoka.” Jemanja mkumbengaga une ligongo lyakuti ulemwa* wa jemanja uli wejinji.

⁸ Mlungu andumile une mpela jwakulocesya* kukwakalamusya ŵandu ŵakwe Aisalaeli. Sambano kulikose kutinjawule, jemanja mkulinjililaga kundega une mpela cijuni. Atamose m'Nyumba ja AMBUJE ŵandu ali amagongo ŵa ŵakulocesya.

⁹ Ŵandu asakele mu yitendo yawo, mpela muŵaŵelele ku Gibeya. Mlungu tacikumbucila ulemwa wawo ni kwapa cilango.

Ulemwa wa Aisalaeli ni yakuyicisya yake

¹⁰ AMBUJE akuŵeceta kuti, “Pandaŵi jinasimene Isalaeli, yaliji mpela kupata mipeleya ja mcipululu. Pinaweni acinangolo ŵenu, yaliji mpela kusiwona nguju syakutanda kwene kwiwula. Nambo jemanjajo piŵayice Kwitumbi lya Baala Piyoli, ŵatandite kumlambila mlungu jwakolanjidwa Baala. Myoyo jemanjajo ŵaŵele cindu cakunyalaya mpela Baala jwawojo juŵamnonyelaga mnope.

¹¹ Lumbili lwa Isalaeli tiluciguluka mpela cijuni, soni ŵanace ngisapagwa soni kwa jemanjajo. Aciŵamkwawo tacijumula, mwakuti ngisaŵeleka soni ŵanace.

¹² Nambo atamose aŵelece ŵanace, tinjajigala wosope ngaleka amtamose jumo. Pitinjitenda yeleyi, likungu tiliciŵa kwa jemanjajo.”

¹³ Mpela munguyiwonela une, ŵanace ŵa Efelemu taciŵa mpela nyama jakulidwa. Ŵandu tacalongolela ŵanace ŵa jemanjajo ku ngondo kwele kutacija kukuwulajidwa.

¹⁴ Ana naŵende ŵalakwe AMBUJE kuti ŵanduŵa atende nawo cici? Ŵalakwe ŵatende aciŵamkwawo kuti aŵe ŵangaŵeleka soni m'maŵele mwawo muŵeje mwangali mkaka ndaŵi syosope.

Cilango ca AMBUJE pa Aisalaeli

¹⁵ AMBUJE akuŵeceta kuti, “Yitendo yawo yosope yakusakala yatandile ku Giligala. Kutyocela kweleko une natandite kuŵengana ni jemanjajo. Soni ligongo lya yakusakala yiŵatesile, tinatoposye mcilambo mwangu. Une nginanonyela soni jemanjajo; acimlongola ŵawo wosope anjimucile une.

¹⁶ Ŵandu ŵa ku Isalaeli ali mpela cakusipuka cele miciga jakwe jijumwile soni cangasogola yisogosi. Ngisakola ŵanace, nambo atamose kuti akakole, une ngawuleje ŵanacewo ŵali ŵakunonyeledwa mnope kwa jemanjajo.”

Jwakulocesya akuŵeceta yakwamba Isalaeli

¹⁷ Mlungu jungumtumicila une tacakana ŵandu ŵakwe, ligongo lyakuti jemanjajo nginampikanila jwalakwejo. Tacigamba kuŵa ŵandu ŵagamba kwendajenda pasikati pa mitundu ja ŵandu pa cilambo capasi.