Hoseya 8 - Chiyawo Bible

Yakulambila milungu jakupanganyidwa ni yala

¹ AMBUJE akuŵeceta kuti, “Mlisye lipenga! Amagongo akwika pacilambo ca AMBUJE mpela ngwasi penani pa nyama. Ŵandu ŵangu ajasile cilanga* cangu, soni alemwecesye majiganyo gangu.

² Akusalilila kwa une kuti nakamusye, akusati, uwe Aisalaeli tukwamanyilila ŵalakwe Mlungu jwetu.

³ Aisalaeli akanile yele yili yambone. Ali ni ligongo lyakwe tacatoposya.

⁴ “Ŵandu ŵangu akusajinjisya ayimwene, nambo akusatenda yeleyo mwakusaka kwawo. Akusasagula acimlongola pali pangali ukumu wakutyocela kwa une. Akusalipanganyicisya milungu ja silifa* ni golidi* nambo talijonanje acimsyene.

⁵ Ngusaŵengana ni ciwanicisyo ca mwanace jwa ng'ombe cele ŵandu ŵa ku Samaliya akusacilambila. Myoyo natumbilile jemanjajo. Ana tipacipita ndaŵi jelewu uli kuti jemanjaji asinde ni kuti ŵandu ŵa ku Isalaeli aŵe ŵaswejesedwe?

⁶ Ciwanicisyoco nganiciŵa kose Mlungu, juŵapanganyisye celeco jwaliji fundi. Cilandanyo ca ku Samaliyaci ticiciswanyidwa mu yiduswayiduswa.

⁷ Naga ugwe ukumisa mbungo m'malo mwa tiligu, ugwe tiwucigowola cimbunga. Tiligu jwangali masace, ngasaŵeleka yakulya. Jukaŵelece, acalendo akalile yakulya yakweyo.

⁸ Aisalaeli amilidwe mwakuti aŵele mpela ciwaya cangali masengo pasikati pa mitundu jine.

⁹ Ŵatilile ku Asiliya mpela mbunda jagambaga kulijendela jisyene. Isalaeli ŵalipile ŵandu ŵa ku yilambo yine kuti aŵe ŵakwakamusya.

¹⁰ Nambo sambano pa ligongo lyakuti ŵakamulene ni ŵandu ŵa mitundu jine,* une tinjasonganya pampepe ni kwajonanga jemanjajo. Pangakaŵa tacilagasidwa mnope ligongo lya ulamusi wa mwenye jwa ku Asiliya.

¹¹ “Atamose kuti Aisalaeli ŵataŵile malo gejinji gakupelecela mbopesi, malo gelega gaŵela sambano malo gakutendelapo ulemwa.*

¹² Une nalembele jemanjajo malamusi gejinji, nambo jemanjajo ŵangagasamala, mwakuti akusapela kuti gali ga cilendo.

¹³ Akusapeleka mbopesi sya nyama kwa une ni kusilyaga soni jemanjajo, citamileco une AMBUJE yeleyo yangasangalasya. Ngisiliŵalila yakulemwa yawo, mwakuti tinjapa cilango ligongo lya yeleyo; soni tinjawucisya ku ukapolo ku Iguputo.

¹⁴ “Aisalaeli alitaŵile acimsyene nyumba syekulungwakulungwa, nambo andiŵalile une. Ayuda ataŵile misinda jecinjilicisidwe ni mapupa. Nambo une tinjitumisya moto wele utiwucijoca majumba gawogo pamo ni misinda jawojo.”