Hoseya 7 - Chiyawo Bible

¹ “Naga ndili sacile kuti naŵice pambone ŵandu ŵangu Aisalaeli ni kwaposya jemanjajo, ulemwa* wawo ukusawonecela pakulanguka. Yitendo yawo yakusakala ya Asamaliya* yili yangasisika. Jemanjajo ali ŵangakulupicika soni akusiŵalambusya ŵandu, pakukasa nyumba syawo mpela ŵawiyi ni ŵaciswamba, ni kwasumula ŵandu yindu yawo pakulanguka m'misewu.

² Nambo jemanjajo ŵangaganisya kuti Une jwangaliŵalila masengo ga jemanjajo gakusakala. Yakusakala yawo yasyungulile jemanjajo, mwakuti ngayikutyoka m'meso mwangu.”

Akutenda ciswamba ku nyumba ja mwenye

³ AMBUJE akuŵeceta kuti, “Ŵandu akusiŵalambusya ayimwene ni ndamo sya jemanjajo syakusakala, soni nduna syakwe akusasilambusya ni mabosa gawo.

⁴ Wosope ŵenewo ali ŵangakulupicika. Uŵengani wawo uli wakulambucisya mpela moto wa lumuli, wele mundu jwakuteleka mkate jwangawukwisilila kutandilila pa ndaŵi jakuwanganya utandi wakutelecela mkate mpaka uli usasaŵile.

⁵ Pa lisiku lya cindimba ca mwenye, mwenye ni nduna syakwesyo akusakolelwa ni kuŵa nawo mwikuga lya ŵakuloŵelawo.

⁶ Mitima jawo jikusakolela moto mpela ufuni. Cilo cosope ukali wawo ukusakolela, mwakuti kundaŵi ukusakolela mpela moto.

⁷ “Wosope ŵene akusaŵa juu mpela ufuni soni akusawulaga acimlongola ŵawo. Ayimwene ŵawo agwile, nambo pangali ni jumo jose jwambilasile une kuti nimkamusye.”

Aisalaeli akuwanganicilana ni mitundu jine

⁸ AMBUJE akuŵeceta kuti, “Ŵandu ŵa ku Isalaeli ali mpela keke jepye mbali jimo ligongo lyakuti akusawanganicilana ni ŵandu ŵa mitundu jine.*

⁹ Acalendowo akwamala jemanjajo macili acimsyenewo ali ngakumanyilila kandu. Atandite kumela wuli nambo acimsyenewo ngamanyilila cilicose.

¹⁰ Kunyada kwa Aisalaeliwo kukwasisya acimsyene. Nambo pa yosope yeneyi jemanjajo ngakuwujila kwa une AMBUJE Mlungu jwawo.

¹¹ Aisalaeli ali mpela ngunda jakuloŵela, jangali lunda. Akusiŵaŵilanga Aiguputo ni kwawulaga ku Asiliya kukuŵenda cikamucisyo.

¹² Kulikose kwakusajawula tinjitegako likoka. Tinjagwisya pasi mpela yijuni soni tinjapa cilango ligongo lya yakulemwa yawo.

¹³ “Likungu kwa jemanjajo pakuti andesile une. Jemanjajo ajonasice ligongo lyakuti anjimucile. Sosileje kwakulupusya, nambo akusagamba kuŵeceta ya unami ya une.

¹⁴ Kulila kwawo kwa une kuli kwa unami, akusalila ali puti pa cindanda. Akusalicekaceka mpela ŵandu ŵangam'manyilila Mlungu ligongo lyakusosa kulya ni kumwa, nambope akunjimucila.

¹⁵ Atamose kuti ngusinalela ni kwalimbisya, akundendelape ya malindi.

¹⁶ Akugalawucila kwa milungu jacabecabepe ngaŵaga kwa Mlungu jwakupunda yosope. Jemanjajo ali mpela ukunje wekote soni wangadalilika. Acimlongola ŵawo taciwulajidwa ni upanga ligongo lyakuti akusambecetela ya cipongwe. Myoyo Aisalaeli tacisecedwa mnope ni Aiguputo.”