Hoseya 6 - Chiyawo Bible

Kungapesya kusyesyene kwa ŵandu

¹ Ŵandu akuŵeceta kuti, “Kwende, tuwujile kwa AMBUJE. Atukacwile, nambope tacituposya. Atuwulesye, nambope taciposya maŵanga getu.

² Pangakaŵa tacitusisimusya. Pitigagambe kumala masiku gaŵili kapena gatatu, tacitujimusya kuti tuŵe ni umi pameso pakwe.

³ Kwende tulimbicile kuti twamanyilile AMBUJE. Taciyika kwa uwe mwangakayicila mpela kumasikusiku. Taciyika kwa uwe mpela mesi ga ula, ula jakwe ja cuku jele jikusatendesya litaka kuti liŵe lyenyoŵe cenene.”

⁴ AMBUJE akuŵeceta kuti, “Jemanja Aisalaeli ana nimtende cici? Nambi jemanja Ayuda nimtende cici? Cinonyelo cenu cimasile mpela lipundugulu lya kundaŵi mnope, cili mpela mangame gagambile kutyoka kwene.

⁵ Ali ni ligongo lyakwe natumile ŵakulocesya ŵangu kwa jemanja ni utenga wangu wa camuko ni conasiko. Kulamula kwangu kwaŵasile mpela kumesya.

⁶ Kuŵeceta yakuwona Une ngusasosa cinonyelo cangacenga, ngaŵaga mbopesipe. Ngusosa kuti ŵandu amanyilile Une Mlungu m'malo mwagambaga kupeleka mbopesi syakutinisya kwa une.

⁷ “Mpela Adamu, jemanjajo akasile cilanga* cinatesile ni jemanjajo.

⁸ Msinda wa Giliyadi uli wa ŵandu ŵakutenda yakusakala, mwakuti agamba kuwulagana basi.

⁹ Mpela jwawiyi akusamjuŵilila mundu, myoyo soni ŵakutaga mbopesi akusasongana kuti awulajeje ŵandu pa litala lyakuja ku Shekemu. Yakuwona akusatenda yaciswamba yejinji.

¹⁰ Niyiweni yindu yakunyalaya sikati ja Aisalaeli. Isalaeli ŵatesile ya cikululu, nombe nawo Aisalaeli ŵalisakesye pakulambila milungu jakupanganyidwa ni yala.

¹¹ “Nambo Jemanja, ŵandu ŵa ku Yuda, mbisile ndaŵi jakuti mbelece cilango kwa jemanja pa yele yimkutenda.