Hoseya 5 - Chiyawo Bible

¹ “Mpikane ayi, jemanja ŵakutaga mbopesi! Jemanja wosope Aisalaeli mpikanicisye cenene. Jemanja ŵa mwiŵasa lya mwenye, mpikanicisye maloŵe gangu. Cilango ticiciyika pa jemanja, ligongo lyakuti mwategaga ŵandu ku Misipa, soni mwatesile mpela kutandika ukonde ku Litumbi lya Taboli.

² Ŵakwimucilawo asokwece mnope mu ulemwa* wakuwulaga, une tinjipeleka cilango kwa jemanjajo.

³ Ngumanyilila yosope yakwamba Aefelemu, soni Aisalaeli ngaŵa mkunjuŵa une, pakuti aŵele ŵangakulupicika, soni ŵandu ŵakwe ali ŵangajenela kulambila une.”

Hoseya akwakalamusya ŵandu yakwamba kulambila milungu jine

⁴ Yakusakala yatesile ŵandu yatendekasisye kuti akawujila soni kwa Mlungu. Pakuti msimu wakungakulupicika uli mwa jemanjajo, soni ngakuganisya soni yakwamba AMBUJE.

⁵ Kulikusya kwa Aisalaeli kuŵele umboni wakwasisya jemanjajo. Yakuwona kuti Aisalaeli tacigwa mu ulemwa wawo. Nombe nawo soni Yuda tacitenda myoyo.

⁶ Pakwasosasosa AMBUJE ŵandu akusapeleka mbopesi sya ngondolo ni ng'ombe, nambo ŵangampata jwalakwejo, akusaŵa ali ŵatyocele jemanjajo.

⁷ Jemanjajo aŵele ali ŵangakulupicika kwa AMBUJE, mwakuti ŵanace ŵa jemanjajo nginaŵa ŵa jwalakwejo. Sambano yindimba yawo ya pawukuwoneka mwesi tiyicajonanga jemanjajo pamo ni cilambo cawo cosope.

Ngondo sikati ja Ayuda ni Aisalaeli

⁸ Mjimbe malipenga ga ngondo ku Gibeya! Mlisye malipenga ga ku ngondo gakwakalamusya ŵandu ku Lama! Mwakalamusye ŵa ku Beti Afeni! Mlongole, jemanja ŵandu ŵa ku Benjamini!

⁹ Efelemu tacisyuka kuŵa masame pa lisiku lyakwapa cilango. Ngwenesya yayili yakuwona ku lukosyo lululose lwa jemanja Aisalaeli.

¹⁰ AMBUJE akuŵeceta kuti, “Acimlongola ŵa ku Yuda ali akusatenda ngondo ni cakulinga cakuti atukusye malile. Ali ni ligongo lyakwe tinjamila jemanjajo ni lutumbilo lwangu mpela mesi ga cikumba.

¹¹ Aisalaeli akwapondelesya, jemanjajo akupegwa cilango ligongo lyakupikanila ya ŵane.

¹² Ali ni ligongo lyakwe tinjajonanga Aefelemu, mpela mwele yijosolo muyikusajonanjila nguwo, tinjiŵa mpela yindu yewole yakununga pa ŵandu ŵa ku Yuda.

¹³ “Sambano ŵandu ŵa ku Efelemu piŵaweni kuti akulwala, soni Ayuda piŵaweni kuti akwete maŵanga, Isalaeliwo ŵapite ku Asiliya, nipo Ayuda ŵatumile utenga kwa mwenye jwamkulungwa kuti ŵakamusye jemanjajo. Nambo mwenyejo ngaŵa mkwaponesya kapena kuposya maŵanga gawo.

¹⁴ Tinjasumbila ŵandu ŵa ku Isalaeli mpela lisimba, soni tinjaguŵatila Ayuda mpela mwanace jwa lisimba. Une namsyene tinjapaculanya ni kutyokapo. Pandaŵi jele jitinjiŵa ndili mkwadudulusya pangali jwine jutacipakombola kwakulupusya.

¹⁵ “Tinjiwujila ku malo gangu, mpaka ŵandu ŵangu ali alasile mnope ligongo lya ulemwa wawo ni kwika soni ali mkusosasosa une. Mu yisawusyo yawo tacilinjilila kusosasosa une.”