Hoseya 4 - Chiyawo Bible

AMBUJE akwajimba magambo Aisalaeli

¹ Jemanja Aisalaeli mpikane maloŵe ga AMBUJE. Ŵalakwewo akumjimba magambo jemanja ŵandu ŵimkutama mcilambo acino. Magambo gakwe gali gakuti, mcilambo mwangali kulupicika kapena umbone mtima soni ŵandu ngakuganisya soni ya Mlungujo.

² Jemanjajo akulumbila mwakulambusya, kuŵeceta ya unami, kuwulaga, kwiŵa ni kutenda cikululu. Ulemwa* wawo utesile kupunda mwakuti agamba kuwulagana acimsyenepe.

³ Myoyo pa ligongo lyeleli AMBUJE taciyikasya cilala mcilambo nipo wosope ŵakutamamo tacilaga pamo ni yinyama ya kwitinji yakwe ni yijuni mwakuti atamose somba tisiciwa.

AMBUJE akwajimba magambo ŵakutaga mbopesi

⁴ AMBUJE akuŵeceta kuti, “Jwalijose akasisya kandu, soni jwine jwalijose akamjimba mjakwe magambo, pakuti magambo gali sikati ja Une ni jemanja ŵakutaga mbopesi ŵa unami.

⁵ Mkusaŵa ŵakudandawula cilo ni musi, nombe nawo ŵakulocesya akusatenda iyoyopeyo. Myoyo tinjijonanga Isalaeli mama ŵenu.

⁶ Ŵandu ŵangu akonasika ligongo lyakuti ngakumanyilila une. Tinjimkana kuti mundumicileje une mpela ŵakutaga mbopesi, ligongo lyakuti mkanile majiganyo gangu. Mwakuti mliŵalile malamusi ga Mlungu jwenu. Myoyo une soni Mlungu jwenu tinjaliŵalila ŵanace ŵenu.

⁷ “Ŵatiji kuti naga ŵakutaga mbopesi akutupilatupila, pelepo ni papundileje soni kundemwecesya. Myoyo tinjisandusya ucimbicimbi wawo kuŵa soni.

⁸ Akasicililapo pa kulemwa kwa ŵandu ŵangu, nipo akusacilila kuti ŵanduwo apitilisyejepe kulemwa.

⁹ Ŵakutaga mbopesiwo tinjatenda yele yitinjatenda ŵandu. Tinjapa cilango ligongo lya ndamo syawo syakusakala ni kwawucisya pa yitendo yawoyo.

¹⁰ Tacilyaga nambo ngisajikuta. Tacitendaga cikululu nambo ngisaŵelekana kuti atupe pa ligongo lyakuti ŵalesile AMBUJE ni kulipeleka ku milungu jine.”

AMBUJE akusisya ya dini ja cikusa

¹¹ AMBUJE akuŵeceta kuti, “Kanga finyo ali jwasambano kapena jwakala, akusajonanga lunda lwa ŵandu ŵangu.

¹² Ŵandu ŵangu akusaŵenda lunda kutyocela ku ciduswa ca litabwa nipo simbo jawo jikusijasalila jemanjaji yakuyimanyilila. Andesile mpela jwamkongwe jwali jwa cikululu, jemanjajo alipelece kwa milungu jine.

¹³ Akusapeleka mbopesi pa matumbi, ni kututumisya ubani* pa mikuli ni pasi pa yitela yakutenjela mnope mpela ca mtundu, pakuti akusatiji kuti mibwilili jakwe jili jambone. “Yakuyicisya yakwe yili yakuti, ŵanace ŵenu ŵacakongwe akutenda ya cikululu, nipo acakwegwe ŵenu ŵacakongwe nombe nawo akutenda cikululu.

¹⁴ Nambo ngisimbeleka cilango kwa ŵanace ŵenu ŵacakongwe ligongo lyakutenda ya cikululu, ligongo nomwe ŵakwe mkusatenda iyiyi, nipo mkusapeleka mbopesi pamo ni acakongwe ŵa lilama ŵa ku dini. ‘Ŵandu ŵangali lunda mpela ŵeleŵa tacijonasika.’

¹⁵ “Atamose kuti jemanja ŵandu ŵa ku Isalaeli mli ŵangakulupicika kwa une, ŵandu ŵa ku Yuda akasimanikwa ni magambo gamti myiyi. Akajawula ku Giligala kapena ku Beti Afeni. Akaja soni kukulumbila kweleko mu lina lya AMBUJE ŵacijumi.

¹⁶ Ŵandu ŵa ku Isalaeli ali ŵakanika mpela ŵanace ŵa mikambako ŵa ng'ombe. Ana mpaka ŵalisye sambano jino mpela ŵanace ŵangondolo ku mopo ŵambone?

¹⁷ Ŵandu ŵa ku Isalaeli alumbikanyidwe ni milungu jine, yeleyo yawo.

¹⁸ Atamose kuti yakumwa yili yimasile akusagamba kutenda cikululu. Akusanonyela yindu yakutesya soni kupunda ucimbicimbi wawo.

¹⁹ Jemanjajo tacityosyedwa mpela cindu cakujigalidwa ni cimbunga, mwakuti tacitesyedwa soni ligongo lya malo gawo gakupelecela mbopesi.