Hoseya 3 - Chiyawo Bible

Hoseya ni jwamkongwe jwa cikululu

¹ Sambano AMBUJE ŵasalile kuti, “Jawulani soni, mkanonyele jwamkongwe jwa cikululu jula jwali ni uganja wakwe. Mkanonyele mpela mwele une AMBUJE mungusinanonyelela ŵandu ŵa ku Isalaeli atamose kuti jwalakwejo akusalambila milungu jine ni kujitajila mbopesi ja yisogosi ya mpeleya wambone yejumu.”

² Myoyo napele mbiya likumi ni msano sya silifa* ni ngalala msano ni siŵili sya balele* kuti nalombe ŵalakwewo.

³ Nasalile ŵakongwewo kuti, “Mŵeje ni une masiku gejinji, ngatenda soni cikululu kapena cijama ni mundu jwine jwalijose. Une soni tinjitenda yalumo.”

⁴ Mwa litala lilili, Aisalaeli tacitama masiku gejinji ali ŵangali ayimwene kapena acimlongola ngapeleka mbopesi, kapena kwimika yipilala ya maganga gakugalambila, pali pangali tumilungu kapena yimanyisyo yakutendela cisango.

⁵ Kaneko Aisalaeli taciwujila ni kwasosasosa AMBUJE Mlungu jwawo, ni kwa cisukulu ca Daudi* mwenye jwawo. Ndaŵi jelejo Aisalaeli tacajogopa AMBUJE ni tacipocela mituka jambone.