Hoseya 2 - Chiyawo Bible

¹ Sambano mwasalile Aisalaeli acimjenu kuti, “Jemanja mli ŵandu ŵa Mlungu,” soni mli “Ŵakunonyeledwa ni AMBUJE.”

Isalaeli ali mpela Gomeli jwamkongwe jwangakulupicika

² Ŵanace ŵangu, mwajamuceje mama ŵenu pakuti nginaŵa soni ŵamkwangu, soni nginimba asono ŵawo. Mwajamuce kuti alece kutenda cikululu.

³ Naga ngakutenda myoyo tinawule, kuti aŵe makonope muŵapagwile. Tinjajumusya mpela cipululu, taciŵa mpela cilambo cangali mesi, nipo taciwa ni njota.

⁴ Ŵanace ŵakwe wosope ngisinatendela canasa ligongo lyakuti ali ŵanace ŵakupagwila kupitila mu cikululu.

⁵ Pajatu mama ŵawo ali ŵa cikululu, ŵele uŵaŵelece jemanjajo ŵatendaga yakutesya soni. Ŵatiji kuti, “Tinjawule ku maganja gangu gigambaga yakulya ni mesi, ulusi ni litonji, mawuta ni finyo.”

⁶ Ali ni ligongo lyakwe tinjiwugala litala lyakwe ni miŵa. Tinjacijila lipupa, kuti akajenda soni m'matala gakwe gakala.

⁷ Tacigawutucila maganja gakwe nambo ngasasimana nago. Tacigasosasosa, nambo ngagasimana. Tacijila kuti, “Timbujile soni kwa ŵamkwangu ŵala, pakuti pa ndaŵi jinaliji ni jemanjajo naliji pambone kulekangana ni sambano jino.”

⁸ Nganamanyililaga kuti une ni junapaga tiligu, finyo ni mawuta. Nganamanyililaga kuti une ni junapagwa silifa* ni golidi* jwamjinji juŵakamulisyaga masengo pakulambila mlungu jwakolanjidwa Baala.*

⁹ Myoyo ndaŵi jakugowola tinjasumula tiligu jwangu nambo soni finyo mu ndaŵi jakwe, nambo soni tinjisumula manyunya ni litonji lyangu lilyasisaga umakonope wawo.

¹⁰ Myoyo tinjilosya umakonope wawo pakulanguka kwa maganja gakwe, soni pangali ni jumo jose jutacakulupusya myala mwangu.

¹¹ Tinjimasya lukondwa lwawo losope, yindimba yawo ya pa ndaŵi jiwukuwoneka mwesi, masabato ni yindimba yine.

¹² Tinjijonanga yitela yakwe ya mipeleya ni ya nguju jiŵatiji jila kuti, gelega gali malipilo gangu gele maganja gangu giŵambele. Tinjijisandusya migunda jawo kuŵa litinji, nipo yilombo tiyicilyaga kweleko.

¹³ Tinjapa cilango ligongo lyakuti ŵatutumisyaga ubani* kwa milungu mpela Baala pa yindimba yawo. Ŵalisalalisyaga pakuwala mbete ni yuma ya mtengo wapenani kuti ŵawutucileje maganja gawo une nikundiŵalila. Une AMBUJE mbecete myoyo.

Cinonyelo ca AMBUJE pa ŵandu ŵakwe

¹⁴ Sambano mpikane, tinjimnyenjelela jwamkongwejo, ni kuja najo ku cipululu ni kuja kumsangalasya ni maloŵe ga cinonyelo.

¹⁵ Tinjimwucisya migunda jakwe ja mipeleya. Tinjisandusya Ciŵata ca Yisawusyo kuti ciŵe cipata ca cembeceyo. Kweleko tacinjangaga mpela muŵanjanjilaga mu ndaŵi ja ucanda wawo, pa ndaŵi jiŵakopwece ku Iguputo.

¹⁶ Ndaŵi jelejo pakumbilanga timjileje, “Ŵamkwangu.” Ngimjila soni kuti Baala ŵangu. Une AMBUJE mbecete myoyo.

¹⁷ Tinjalekasya kuti akakolanga soni lina lya Baala.

¹⁸ Pa ndaŵi jelejo tinjitenda cilanga* ni yinyama ya mwitinji, yijuni, ni yakukwaŵa pasi kuti yisyoŵekane ni ŵandu ŵangu. Sambano tinjityosya yida yosope ya ngondo mcilambo mwawo, mapanga ni mawukunje gosope kuti jemanjajo aŵe pa mtendele.

¹⁹ M'mwe Isalaeli, timciŵa ŵamkwangu; Tinjiŵa jwakuwona ni jwakulupicika. Tinjimlosya cinonyelo nambo soni canasa mpaka kalakala.

²⁰ Tinjisunga cilanga cangu ni kumtenda m'mwejo kuti mŵe ŵangu nipo timcimanyilila une kuti ndili AMBUJE.

^21-22 AMBUJE akuŵeceta kuti, ndaŵi jelejo tinjijanga mapopelo ga ŵandu ŵangu Aisalaeli. Tinjijitendekasya ula kuti jigwe pa cilambo capasi, litaka tilicisogosya tiligu, finyo ni mawuta.

²³ Tinjatamilisya ŵandu ŵangu mcilambo ni kwatendesya kuti yindu yajendeleje cenene. Tinjilosya cinonyelo kwa ŵele uŵakolanjidwaga kuti “Ŵanganonyeledwa,” ni kwa ŵele uŵaŵilanjidwaga kuti “Ngaŵa ŵandu ŵangu.” Tinjasalila kuti, “Jemanja mli ŵandu ŵangu,” nipo jemanjajo tacijanga kuti, “Ŵalakwe ali Mlungu jwetu.”