Hoseya 14 - Chiyawo Bible

Hoseya akwapopelela Aisalaeli

¹ Jemanja Aisalaeli, mwujile kwa AMBUJE, Mlungu jwenu. Ulemwa* wenu umkuŵesye ni kumgwisya.

² Mwujile kwa AMBUJE, ni mwaŵende kuti, “Atukululucile ulemwa wetu wosope nikuti soni apikane kuŵenda kwetu, nipo tucatogolela ŵalakwe ni maloŵe gakwalumba.

³ Asiliya ngaŵa mkutukulupusya uwe, soni mahaci ga ngondo ngaŵa mkutucinjilicisya. Ngisituŵeceta soni ku yilandanyo yakupanganyidwa kuti, ‘Mlungu jwetu,’ pakuti ŵalakwe ni ŵakusatendela canasa ŵamasije.”

AMBUJE akusala ya umi wasambano kwa Aisalaeli

⁴ AMBUJE akuŵeceta kuti, “Tinjiyika nawo ŵandu ŵangu kwa une. Tinjanonyela ni mtima wangu wosope; soni ngisinatumbilila jemanjajo.

⁵ Kwa ŵandu ŵa ku Isalaeli, tinjiŵa mpela ula ku cilambo cejumu cangali mesi. Tacigopola mpela maluŵa ni kukola miciga mpela yitela ya ku Lebanoni.

⁶ Yakusipuka yakwe tiyicitambalila kutali, taciŵa ŵakusalala mpela citela ca olifi,* soni taciŵa ŵakununjila mpela citela ca mkungusa wa ku Lebanoni.

⁷ Aisalaeli tacipata soni citetelo mwa une. Tacipanda tiligu, ni kutupa mpela mgunda wa mpeleya. Mwakuti taciŵa ŵakupikanika mpela finyo jwa ku Lebanoni.

⁸ Ana Aisalaeli tacitenda cici ni yilandanyo yakupanganya? Une jwene ni jungusapikana mapopelo gawo ni kwasamalila. Une ndili mpela citela ca mkungusa cakutenjela ndaŵi syosope. Une ni jungusapeleka upile wawo wosope.”

Maloŵe gambesi

⁹ Jwele jwali jwalunda apikanicisye yeleyi, jwele jwali jwakupikanicisya ayisunje yeleyi. Pakuti matala ga AMBUJE gali gakulungama, nipo ŵele ŵali ŵakulungama akusajenda, nipo ŵakulemwa akusakuŵalamo.