Hoseya 13 - Chiyawo Bible

Cilango cambesi pa Aisalaeli

¹ Kalakala lukosyo lwa Efelemu lwatiji kuti naga luŵecete, ngosyo sine sya ku Isalaeli syatendaga woga; ligongo lyakuti jemanjajo ŵacimbicikwaga mcilambo ca Isalaelico. Nambo ŵanduwo ŵalemwisye mnope pakumlambila Baala,* myoyo ligongo lya yeleyi taciwa.

² Masiku agano akupitilisyape kulemwa, pakulipanganyicisya yicindu yakugumba pakukamulisya masengo silifa* jwawo. Yicindu yagumbayi gali masengo ga afundi. Kaneko akusaŵeceta kuti, “Mpelece mbopesi kwa jemanjaji!” Ni kwalambilaga ŵanace ŵa ng'ombeŵa.

³ Myoyo ŵandu ŵeleŵa tacisimilila mpela mangame ga kundaŵi. Jemanjaji taciŵa mpela matimba gagakuguluka ligongo lya mbungo kapena mpela lyosi lyalikukopoka kutyocela pa liwindo.

⁴ AMBUJE akuŵeceta kuti, “Une mbele AMBUJE Mlungu jwenu kutyocela ndaŵi jinamkopwesye jemanja ku Iguputo. Ngimkumanyilila Mlungu jwine akaŵe unepe. Une jikape ndili mkulupusyo jwenu.

⁵ Une ni junamsamalile jemanja ku cipululu, mcilambo ca mtukuta mnope.

⁶ Nambo pa ndaŵi jimwajinjile mcilambo cambone, namlisisye nipo mwajikwite, kaneko mwatandite kulikwesya ni kundiŵalila une.

⁷ Myoyo tinjasumbila jemanjajo mpela lisimba, tinjajuŵilila jemanjajo mungulugulu litala mpela cisuŵi.

⁸ Tinjaguŵatila mpela cilombo cicisumulidwe ŵanace ŵakwe. Tinjitemanya mbalati syawo, ni kwatawuna papopo mpela lisimba, ni kwapacukulanya mpela cilombo camwitinji cakogoya mnope.

⁹ “Tinjajonanga jemanja Aisalaeli. Ana ŵani utamkamusye jemanja?

¹⁰ Mwaŵendile kuti mkusaka mwenye ni acimlongola, ana jemanjaji mpaka amkulupusye uli?

¹¹ Kupitila mu kutumbila kwangu une nimpele jemanja mwenye, kaneko jemanjaji piŵandumbilisye natyosisye.

¹² “Kusakala kwa ŵandu ŵa ku Isalaeli kulembedwe m'buku, soni buku ja ulemwa* wawo nijisunjile.

¹³ Yipwetesi mpela ya jwamkongwe pa ndaŵi jakuŵeleka mwanace tiyicagwila jemanjajo. Akakombolece kulupusidwa nambo ali mpela mwanace jwangali lunda, jwangasosa kukopoka pa ndaŵi jakwe jakupagwa.

¹⁴ Une ngisinakulupusya jemanjaji kwa ŵandu ŵawe kapena kwawombola ku macili ga ciwa. M'mwe ciwa, ana milili jenu jili kwapi? Nambi m'mwe malembe konanga kwenu kuli kwapi? Ŵandu ŵeleŵa ngisinatendela soni canasa.

¹⁵ Atamose kuti Isalaeli asengwe mpela manyasi, mbungo ja AMBUJE jakutyocela kungopoko lyuŵa tijicipuga kutyocela ku cipululu. Myoyo uliŵa wakwe tiwucipwela, soni cisima cakwe ticicijumula. Amagongo tacijonanga yipanje yakwe yamtengo wapenani.

¹⁶ Ŵandu ŵa ku Samaliya tacipegwa cilango ligongo lyakuti amjimucile Mlungu jwawo. Taciwulajidwa ku ngondo, ŵanace ŵawo taciwulajidwa mwagamba kwaputisya pasi. Acakongwe ŵawo ŵakweti misigo tacipapulidwa pa lutumbo.”