Hoseya 12 - Chiyawo Bible

¹ Cine cilicose cakusatenda ŵandu ŵa ku Isalaeli kutyoka kundaŵi mpaka cilo yili yangali mate. Mabosa ni yitendo ya njojo ni yele yiyitupile pasikati pawo. Akusatenda yilanga ni cilambo ca Asiliya, nipo akutenda malonda ga mawuta ga olifi* ku Iguputo.”

² AMBUJE akwajimba magambo ŵandu ŵa ku Yuda. Tacipeleka cilango ku liŵasa lya Yakobo* ligongo lya ndamo syawo, tacawucisya mwakulingana ni yitendo yawo yakusakala.

³ Piŵaliji mcitumbo mwa mama ŵawo, Yakobo ŵakangene ni mlongo mjakwe, nipo piŵakusile ŵalimbene ni Mlungu.

⁴ Ŵalimbene ni lilayika nipo ŵapundile. Ŵalisile ni kuŵenda upile. Mlungu ŵasimene ni jwalakwejo ku Beteli, nipo kweleko kupitila mwa jwalakwejo ŵaŵecete ni uwe.

⁵ Jwalakweju ali AMBUJE, Mlungu Jwamaciligosope. Ŵandu amkumbucileje jwalakwejo ni lina lyakwe lyakuti AMBUJE.

⁶ Myoyo jemanja mwujile kwa jwalakwejo. Mkapikanileje ni kutenda cilungamo, ni kwembecela mwakufasa kuti Mlungu jwenujo atendepo kandu.

⁷ AMBUJE akuŵeceta kuti, “Aisalaeli ali mpela jwa malonda jwa unami, jwele jwakusakamulisya masengo masikelo ga unami. Akusanonyela kwalambusya ŵandu.

⁸ Aisalaeli akuŵeceta kuti, ‘Uwe tuli ŵakusicila, mwakuti tutesile upile. Pangali soni jutatugambe ligongo lyakuti tusicile mu matala gangaŵa ga cilungamo.’

⁹ Nambo une AMBUJE junamkopwesye ku Iguputo, tinjimtamika soni m'ma tenti mpela mumwatendelaga kalakala ku cipululu cila.

¹⁰ “Naŵecete ni ŵakulocesya ni napele mesomkulola gejinji, soni kupitila mwa ŵakulocesyawo nakalamwisye ŵandu ŵangu.

¹¹ Ku Giliyadi ŵandu akulambilape yindu yakupanganyidwa ni yala. Yindu yeleyi tiyicijonanjidwa. Ŵapelekaga mbopesi sya ng'ombe ku Giligala, nambo malo gakupelecela mbopesigo tinjigasandusya kuŵa mbuwa ja maganga m'migunda.”

¹² Yakobo ŵatilile ku Mesopotamiya kwele kuŵakamwile masengo kuti apate ŵakongwe. Ŵaliji mkulanga ngondolo kuti apate ŵakongwewo.

¹³ AMBUJE ŵatumisye jwakulocesya* kukwakulupusya ŵandu ŵa ku Isalaeli kutyocela ku ukapolo ku Iguputo ni kwasamalila jemanjajo.

¹⁴ Ŵandu ŵa ku Isalaeli ŵalutandite lutumbilo lwa AMBUJE pa magambo gakuwulaga ŵandu, ali ni ligongo lyakwe AMBUJE tacapa cilango jemanjajo ligongo lyakwatendesya soni ŵalakwewo.