Hoseya 11 - Chiyawo Bible

Cinonyelo ca Mlungu pa ŵandu ŵakwe ŵakwimucila

¹ AMBUJE akuŵeceta kuti, “Pa ndaŵi jele Isalaeli ŵaliji mwanace, nanonyele ni naŵilasile kutyoka ku cilambo ca Iguputo mpela mwanangu.

² Nambo une naga ngwaŵilanga jwalakwejo akusandila kwawula kutali. Ŵapelekagape mbopesi kwa Baala* ni kucitutumicisya ubani* cilandanyoco.

³ Nambotu une ni junajiganyisye Aisalaeli kwenda. Nalelite, nambo nganajiticisya kuti une ni junasamalile jemanjajo.

⁴ Nawutile jemanjajo kwa une ni mwa canasa ni mwa cinonyelo. Nanyakwile ni kwajegamisya pa lijeje lyangu. Najineme ni kwalisya jemanjajo.

⁵ “Jemanjajo akukana kuwujila kwa une, myoyo taciwujila soni ku ukapolo ku Iguputo, nipo Asiliya tacalamulila jemanjajo.

⁶ Ngondo tijicijonanga misinda jawo. Amagongo tacijonanga yipata ya malo gawo gakucinjilicisidwa ni kugajonanga ligongo lyakukuya lunda lwawo jikape.

⁷ Ŵandu ŵangu akukanilila yakunjimucila une. Tacilila ligongo lya likongwa lya cilango cicili pa jemanjajo.

⁸ “Mpaka nimlece uli m'mwe Isalaeli? Ana mpaka ngombole uli kumjasa m'mwejo? Ana mpaka nimjonanje mpela munatendele ni Adima, kapena mpela munamtendele Seboyimu? Mtima wangu ukukana kutenda myoyo. Cinonyelo cangu pa m'mwejo cikusile mnope.

⁹ Ngisinimpa cilango mu lutumbilo lwangu, Ngisinjonanga soni Isalaeli, pakuti une ndili Mlungu ngaŵa mundu. Une, Jwamswela jula, ndili ni m'mwejo. Ngisiyika kwa m'mwejo mwa lutumbilo kukumjonanga.

¹⁰ “Ŵandu ŵangu tacinguya une pa ndaŵi jitinjisona mpela lisimba. Taciwutucila kwa une kutyocela kungapilo lyuŵa.

¹¹ Taciyika kutyocela ku Iguputo ali mkutetemela mpela yijuni, soni taciyika mpela njuŵa kutyocela ku Asiliya. Myoyo tinjawucisya soni kumangwawo. Une AMBUJE mbecete myoyo.”

Isalaeli ni Yuda akwimbidwa magambo

¹² AMBUJE akuŵeceta kuti, “Ŵandu ŵa ku Isalaeli asyungulile une ni mabosa. Liŵasa lya Isalaeli lili lya unami. Nombe nawo ŵandu ŵa ku Yuda akunjimucilape une Mlungu, jundili jwakulupicika ni Jwamswela.