Hoseya 10 - Chiyawo Bible

¹ Ŵandu ŵa ku Isalaeli ali mpela mpeleya uwasogolaga yisogosi yejinji. Yipanje yawo piyatupilagatupilga, nombe najo dini ja cikusa jatupilagatupilaga. Cilambo cawo picajawulaga msogolo, jemanjajo ŵapitilisyaga kusalalisya milungu jawo yipilala ya maganga jiŵajilambilaga.

² Mtima wawo uli wakunyenga, myoyo akwenela kupegwa cilango ligongo lya ulemwa* wawo. Mlungu tacigumula malo gawo gakupelecela mbopesi, soni tacijonanga yipilala ya maganga yawo yiŵayijimisye.

³ Pangakaŵa ŵandu taciŵecetaga kuti, “Nginitukola mwenye sambano ligongo nginitwapikanila AMBUJE. Nambope mwenyejo akatutendele cici uwe?”

⁴ Ayimwenewo akusaŵeceta maloŵe gangali mate. Akusagamba kutenda yilanga ya unami. Cilungamo ciŵele kungalungama kwele kukusasipuka mpela manyasi gakusakala mu mgunda.

⁵ Ŵandu ŵa ku Samaliya tacitenda woga, nipo tacilila ligongo lyakonanjidwa kwa cilandanyo ca mwanace jwa ng'ombe ca ku Beti Afeni. Ŵandu ŵakwe tacimlilila. Nombe nawo ŵakutaga ŵawo mbopesi tacilila malilo ga mlungu jwawojo, ligongo ucimbicimbi wawo wosope utyosile.

⁶ Cilandanyoco ticicijigalidwa kwawula ku Asiliya, kuti cikaŵe mtuka wakupelecedwa kwa mwenye jwamkulungwa. Ŵandu ŵa ku Isalaeli tacitenda soni, Aisalaeli tacitenda soni ligongo lya malangiso ga unami giŵapikanilaga.

⁷ Mwenye jwa ku Samaliya tacijigalidwa kwawula kutali mpela kalunyambi kakakujajaŵala pa mesi.

⁸ Malo gawo gakulambililako milungu ja unami, kwele Aisalaeli ŵatendelagako ulemwa, tigacijonanjidwa. Miŵa ni manyasi tiyicimela pa malo gakupelecela mbopesigo. Ŵandu tacigasalila matumbi kuti, “Mtugwile!” Taciyisalila soni yikwesya kuti, “Mtucinjilicisye!”

AMBUJE akuŵeceta kuti tacipeleka cilango kwa Aisalaeli

⁹ AMBUJE akuŵeceta kuti, “Jemanja Aisalaeli nginimlecepe kulemwa kutyocela ndaŵi jejila ku Gibeya. Ali ni ligongo lyakwe tacipundidwa pa ngondo ku Gibeya peko.

¹⁰ Tinjiyika kulimbana ni ŵandu ŵa upanduŵa kuti nape cilango. Ŵandu ŵa mitundu jine* tacisongana kuti amenyane nawo ngondo ligongo lya ulemwa wawo wejinji.

¹¹ “Kalakala Aisalaeli ŵaliji mpela kang'ombe kakajiganyidwe cenene kikanonyelega kuliŵata tiligu. Nambo nganisisye kwika likongwa mu lukosi lwakwe lwakusalala kuti akamulisye masengo mwakupunda. Natesile Yuda kuti atipuleje nipo Yakobo,* alimeje mu mgunda.

¹² Natite kuti, ‘Mlime malo gasambano, mlimisile mcilungamo, nipo timcigowola upile wa cinonyelo cangu cangacenga. Tipulani migunda jenu pakuti ndaŵi jakwasosasosa AMBUJE jikwanile. Mwasosesose AMBUJEWO mpaka ali ayice kukumgwicisya jemanja ula ja upile.’

¹³ Nambo m'malo mwakwe mpandile yakulemweceka, ni kugowola yisogosi yakwe. Mlile yisogosi yakwe yakutyocela m'mabosa. “Ligongo mkukulupilila mnope pa mageleta genu, ni winji wa asilikali ŵenu ŵa ngondo,

¹⁴ myoyo amagongo ŵenu taciyika kuputa namwe ngondo. Malo genu gecinjilicisidwe tigacijonanjidwa mpela mwele mwenye Shalimani muŵamjonanjile msinda wa Beti Abeli pa lisiku lya ngondo. Acinangolo ni ŵanace ŵawo ŵawulajidwe.

¹⁵ Yeleyo ni yiticitendekwa kwa jemanja, ŵandu ŵa ku Beteli, ligongo lya yakusakala yakogoya yimtesile. Ngondo pitijicigamba kutanda, mwenye jwa ku Isalaeli taciwulajidwa.”