Hoseya 1 - Chiyawo Bible

¹ Awu uli utenga uŵapelece AMBUJE kwa Hoseya mwanace jwa Beeli pa ndaŵi jele Usiya, Yotamu, Ahasi, ni Hesekiya ŵaliji ayimwene ŵa ku Yuda, nipo Yelobowamu mwanace jwa Yehowashi piŵaliji mwenye jwa ku Isalaeli.

Ya ŵamkwakwe Hoseya ni ŵanace ŵakwe

² Pandaŵi jele AMBUJE ŵaŵecete kandanda ni Aisalaeli kupitila mwa Hoseya, ŵamsalile jwalakwejo kuti, “Mjawule mkamlombe jwamkongwe jwa cikululu ni mŵelece najo ŵanace ŵele utaciŵa soni ŵa cikululu. Mwa litala lyeleli, ŵandu ŵangu andesile ni kuŵa ŵangakulupicika.”

³ Myoyo Hoseya ŵalombele jwamkongwe lina lyakwe Gomeli, mwanace jwamkongwe jwa Dibulaimu. Piŵapagwile mwanace jwawo jwandanda,

⁴ AMBUJE ŵamsalile Hoseya kuti, “Mumpe lina lyakuti ‘Yesilele’ ligongo pangakaŵapa timbelece cilango kwa mwenye jwa ku Isalaeli pakuwulaga kuŵatesile Yehu nangolo jwawo ku Yesilele, myoyo timasye ucimwene wakwe.

⁵ Ku Ciŵata ca Yesilele tinjijonanga macili ga asilikali ŵa Isalaeli.”

⁶ Gomeli ŵakwete soni msigo, nipo ŵaŵelece mwanace jwamkongwe. AMBUJE ŵamsalile Hoseya kuti, “Mwanacejo mumpe lina lyakuti ‘Jwanganonyeledwa,’ pakuti ŵandu ŵa ku Isalaeli ngisinanonyela kapena kwakululucila.

⁷ Nambo kwa ŵandu ŵa ku Yuda tinjalosya cinonyelo. Une AMBUJE Mlungu jwawo, tinjakulupusya, nambo ngisindenda yeleyi kupitila mukuputa ngondo ni mawukunje, mapanga, mahaci ni ŵandu ŵakwe ŵakwela pa mahacigo.”

⁸ Mwanace jwa Gomeli jula piŵalesile konga, Gomeli ŵakwete soni msigo wine, nipo ŵaŵelece mwanace jwine jwamlume.

⁹ Pelepo AMBUJE ŵamsalile Hoseya kuti, “Mwanaceju mumpe lina lyakuti ‘Ngaŵa ŵandu ŵangu’ pakuti jemanja Aisalaeli ngaŵa ŵandu ŵangu, une soni ngaŵa Mlungu jwenu.”

Isalaeli akuwucisidwa

¹⁰ Ŵandu ŵa ku Isalaeli tacitupa mpela mcenga ŵa mungulugulu nyasa wele ngaŵa mkupakombola kuwupima kapena kuwuŵalanga. Sambano Mlungu akuŵeceta ni jemanjajo kuti, “Jemanja ngaŵa ŵandu ŵangu,” nambo lisiku likwisa pele AMBUJE tacijila kwa jemanjajo kuti, “Jemanja mli ŵanace ŵa Mlungu Jwacijumi.”

¹¹ Ŵandu ŵa ku Yuda ni ŵa ku Isalaeli tacasonganya pamo, nipo tacilisagulila mlongola jumo, nipo tiwuciŵa mtundu wekulungwa ni wakutenda cenene ku cilambo cakumangwawo. Elo, lisiku lya Yesilele tiliciŵa lyekulungwa mnope.