Hagai 2 - Chiyawo Bible

Ucimbicimbi wa Nyumba ja AMBUJE jasambano

¹ Caka caŵili ca ucimwene wa Daliyasi, pa lisiku lya 21 lya mwesi wa msano ni jiŵili, AMBUJE ŵampele jwakulocesya* Hagai utenga.

² Ŵatite kuti mkasalile Selubabele mwanace jwa Sheyatiyele, bwanamkubwa jwa ku Yuda, kwa Yoswa mwanace jwa Yehosadaki, jwamkulungwa jwa ŵakutaga mbopesi,* ni kwa ŵandu ŵane wosope kuti,

³ “Ana apali jwine jwa jemanja jwa mpaka akumbucile usalale wa Nyumbaji kalakala? Ana jikuwoneka mwamti uli sambano jino? Apanotu ngajikuwoneka mpela mwa kandu.

⁴ Nambo sambano mkadandawula, jwalijose jwa jemanja. Mkamule masengo, pakuti Une ndili ni jemanja.

⁵ Ndaŵi jimwakopokaga kutyocela ku Iguputo, natesile cilanga* kuti tinjiŵa ni jemanja ndaŵi syosope. Nipo ndilipe ni jemanja, myoyo mkatenda woga.

⁶ “Ngipajigala ndaŵi jelewu, tindenganye kwinani ni cilambo capasi, pa mkuli ni nyasa.

⁷ Tinjitenganya mitundu josope ja ŵandu, soni yipanje ya ŵandu wosope tiyiciyika akuno, mwakuti Nyumba jeleji tinjijigumbasya lumbili lwekulungwa, ni yinguti Une AMBUJE Ŵamaciligosope.

⁸ Silifa* ni golidi* yosope yili yangu.

⁹ Usalale wa Nyumba ja sambano tiwucipunda usalale wa Nyumba ja kala jila, soni tinjitamilisya ukoto ni mtendele pa malo agano.” Ni yikuti AMBUJE Ŵamaciligosope.

Jwakulocesya akwawusya ŵakutaga mbopesi

¹⁰ Caka caŵili ca ucimwene wa Daliyasi pa lisiku lya 24 lya mwesi wa msano ni mcece, AMBUJE ŵampele jwakulocesya Hagai utenga.

¹¹ Ŵatite kuti, “Mwaŵende ŵakutaga mbopesi kuti alamule aji nganiji:

¹² Tuwanicisye kuti naga mundu akujigala nyama jeswela kutyocela ku mbopesi ni kujiŵiliga mu mkanjo wakwe. Kaneko ni mkanjowo ukukwaya mkate kapena yakulya yetelecedwe finyo, mawuta ga olifi* kapena cakulya ca mtundu wine uliwose, ana yeleyo nombe nayo tiyiŵe yeswela yeŵicidwe pajika ya Mlungu?” Ŵakutaga mbopesiwo ŵajanjile kuti, “Iyayi ngiyiŵa yeswela.”

¹³ Hagai ŵawusisye soni kuti, “Tuwanicisye kuti naga mundu jwalisakesye pakwaya mtembo, nombe najo ni kwaya cimo mwa yakulyayo, ni kuti yeleyo soni tiyiŵe yesakale?” Ŵakutaga mbopesiwo ŵajanjile kuti, “Elo tiyiŵe yesakale.”

¹⁴ Hagai ŵatite kuti, “AMBUJE akuŵeceta kuti yindu iyoyopeyo tiyiciŵa soni kwa ŵandu aŵa, ni kwa mtundu welewu pameso pangu. Yosope yakusatenda ni yosope yakusapeleka pa malo gakupelecela mbopesi yosopeyo yili yesakasidwe.”

AMBUJE akutenda cilanga cakupeleka upile

¹⁵ AMBUJE akuti, “Ana ngimkupakombola kulola yiyitendekwe kwa jemanja? Mkinimtande kutaŵa soni Nyumba ja AMBUJE,

¹⁶ mundu jwajawulaga palili liwunjili lya tiligu ni kwembecelaga kuti takasimane makilogalamu 200 ga tiligu, nambo m'malo mwakwe ŵasimanaga makilogalamu 100. Mundu naga ayice kuti atece malita 100 ga finyo mu lulo, ŵagasimanaga malita 40 basi.

¹⁷ Najonasile mbeju syenu ni mbungo jamacili ni matalila, nambope nganimganisya yakupesya ulemwa* wenu kwa Une.

¹⁸ Lelo ni lisiku lya 24 lya mwesi wa msano ni mcece, lisiku lyele yilimbilimbi ya Nyumba ja AMBUJE jimasile kutaŵidwa. Sambano mjembele kuti mlole yitiyitendekweje kutandila sambano kuja msogolo.

¹⁹ Atamose kuti mwangali yakulya yakwanila mu ngokwe, soni mipeleya, yitela ya mkuju, makangasa nambo soni yitela ya olifi nginiyisogole, nambo kutandila sambano jino tinjimpa upile jemanja.”

Cilanga ca AMBUJE kwa Selubabele

²⁰ Pa lisiku lilyolyo, lya 24 lya mwesi, AMBUJE ŵampele Hagai utenga waŵili wakuti,

²¹ mumsalile Selubabele, bwanamkubwa jwa ku Yuda kuti: “Une ndili ciŵandika kucitenganya cilambo ca kwinani ni cilambo cosope capasi,

²² tinjigwisya ma ucimwene ni konanga macili ga ucimwene gawo. Tinjigwisya yigeleta ni ŵakwendesya wakwe. Mahaci tigaciŵa, nipo ŵakwela ŵakwe taciwulaganaga.

²³ Pa lisiku lyelelyo tinjimjigala m'mwe, Selubabele jwakutumicila jwangu, nipo tinjimtenda kuŵa jwakulamulila mu lina lyangu. M'mwejo ni junimsagwile.” AMBUJE Ŵamaciligosope aŵecete.