Hagai 1 - Chiyawo Bible

Lilamusi lyakutaŵa soni Nyumba ja AMBUJE

¹ Caka caŵili ca ucimwene wa Daliyasi jwa ku Pelesiya, pa lisiku lyandanda lya mwesi ŵa msano ni umo, AMBUJE ŵampele jwakulocesya Hagai utenga. Utengawu waliji wakuja kwa Selubabele mwanace jwa Sheyatiyele, ni kwa Yoswa mwanace jwa Yehosadaki, jwamkulungwa jwa ŵakutaga mbopesi.*

² AMBUJE ŵamacili gosope ŵatite kwa Hagai, “Ŵanduŵa akuti, ‘Ndaŵi ajino nganijiŵa jakutaŵa Nyumba ja AMBUJE.’ ”

³ Sambano AMBUJE ŵampele Hagai utenga awu kuti:

⁴ “Jemanja ŵandu ŵangu, ana ligongo cici mkutamaga majumba gambone kutendaga Nyumba janguji jili masame?

⁵ AMBUJE Ŵamaciligosope akuti: Mganicisye cenene mumtendele pelepamu.

⁶ Mpandile mbeju syejinji, nambo mgowele yamnono. Mkwete yakulya, nambo ngaŵaga yakwanila kwikuta. Mkwete finyo jwakuti m'mweje, nambo ngaŵa jwakwanila kukolelwa najo! Mkusawala yakuwala, nambo ngapikana kutukutila. Jwakukamula masengo jwangapocela malipilo gakwanila kose amta panandi.

⁷ Ana ngimkulola kuti yeleyi yitendecekwe ligongo cici?

⁸ Sambano mjawule kwitumbi, mkakate yitela, ni mtaŵe soni Nyumba jangu; kaneko tinjiŵa jwakusengwa ni kulambilidwa mpela mungwenelela.

⁹ “Mwajembecelaga gowola yindu yejinji, nambo mwapatile panondi. Pandaŵi jimwatutilaga yagowola yenu ku nyumba, Une nayimwasenyemwasenye. Ana ligongo cici natesile yeleyi? Ligongo lyakwe ni lyakuti, Nyumba jangu jili masame, citamileco jwalijose jwa jemanja ali kalikiliki ni kutaŵa nyumba jakwe.

¹⁰ Ali ni ligongo lyakwe kwangali ula soni pangali cakumela petaka.

¹¹ Sambano mbice naco cilala pa cilambo cosope capasi — pa matumbi gakwe, pa migunda ja tiligu, pa mipeleya ni yitela ya olifi* — pa yosope yakumela petaka, ni pa yosope yakulima ŵandu, soni pa ŵandu ni yinyama yosope.”

Ŵandu akupikanila lilamusi lya AMBUJE

¹² Kaneko Selubabele ni Yoswa pampepe ni ŵandu ŵane wosope ŵiŵawusile kutyocela ku ukapolo ku Babiloniya, ŵatesile yiŵasalile AMBUJE kuti jemanjajo ayitende. Jemanjajo ŵatesile woga mnope ni ŵampikanilaga jwakulocesya Hagai, jwakutumicila jwa AMBUJE.

¹³ Myoyo Hagai, jwamtenga jwa AMBUJE jula jwapelece utenga wakuyicisyawu kwa ŵandu ŵala: “Une AMBUJE ndili ni jemanja nditu.”

¹⁴ Sambano AMBUJE ŵalimbisye mtima Selubabele mwanace jwa Sheyatiyele, bwanamkubwa jwa ku Yuda, ni Yoswa mwanace jwa Yehosadaki, jwamkulungwa jwa ŵakutaga mbopesi soni ŵandu ŵane wosope uŵawusile kutyocela ku ukapolo. Ŵatandite kukamula masengo gakutaŵa Nyumba ja AMBUJE Ŵamaciligosope, Mlungu jwawo,

¹⁵ pa lisiku lya 24 lya mwesi ŵa msano ni umo wa caka caŵili pa ndaŵi jiŵaliji Daliyasi mwenye.