Genesesi 9 - Chiyawo Bible

Cilanga ca Mlungu ni Nowa

¹ Mlungu ŵampele upile Nowa ni ŵanace ŵakwe ŵacalume, ŵatite, “Mŵelece ŵanace ŵajinji kuti mtupe ni mgumbale cilambo cosope capasi.

² Yinyama yosope, yijuni, ni somba tiyicimjogopa. Yosopeyi nayipelece m'myala mwenu kuti myilamuleje.

³ Sambano mkukomboleka kulya nyama, mpela munamlamulile kulya ya masamba. Nampele yosopeyi kuti yiŵe yakulya yenu.

⁴ Nambo pana cindu cimo cimkakwenela kulya, mkasimlya nyama jili jana miasi. Ngulekasya ligongo m'misimo ni mu uli umi wakwe.

⁵ Mundu jwalijose jwakuwulaga mjakwe tacipocela cilango. Tinjipeleka soni cilango ku cinyama cilicose cakuwulaga mundu.

⁶ Mundu jwalijose jwakuwulaga mundu mjakwe, nombe najo awulajidwe. Pakuŵa mundu ŵapanganyidwe mcilandanicisyo ca Mlungu.

⁷ “Nambo jemanja mkole ŵanace ŵajinji, kuti yisukulu yenu tiyitupe ni kukwanila pa cilambo cosope capasi.”

⁸ Mlungu ŵamsalile soni Nowa ni ŵanace ŵakwe ŵacalume ŵala kuti,

⁹ “Sambano nguŵika cilanga* ni jemanja ni pamo ni yisukulu yenu,

¹⁰ ni ya umi yosope, yijuni, yinyama yakulanga ni ya mwitinji yakwe, ni yine yosope yiyakopwece m'combo ni m'mwejo.

¹¹ Cilanga canguco ni aci: Ngisinjonanga soni ya umi yosope ni mesi ga cikumba. Nditu, mesi ga cikumba ngasigajonanga soni cilambo capasi.

¹² Mlungu ŵatite soni kuti aci ni cimanyisyo ca cilanga cangu cangamala, cinguŵika pasikati pa une ni jemanja, ni yindu yosope ya umi yili ni jemanja.

¹³ Nguŵika ukunje wangu m'mawunde. Nipo tiwuciŵa cimanyisyo ca cilanga cangu, pasikati pa une ni cilambo capasi.

¹⁴ Ndaŵi syosope naga gakupagwa mawunde kwinani, nipo naga ukuwoneka ukunje m'mawundemo,

¹⁵ tinjikumbucila cilanga cangu cimbisile ni jemanja ni yinyama yosope, cakuti cikumba ngasicijonanga soni ya umi yosope.

¹⁶ Pa ndaŵi jiwukuwoneka ukunjewo m'mawunde, une tinjiwuwona, nipo tinjikumbucila cilanga cangu cangamala ca pasikati pa une ni ya umi yosope ya pa cilambo capasi.

¹⁷ Celeci ni cilocesyo ca cilanga cangu cinguciŵika une pasikati pa une ni ya umi yosope ya pa cilambo capasi.”

Nowa ni ŵanace wakwe

¹⁸ Ŵanace ŵa Nowa ŵiŵakopwece m'combo ŵaliji Shemu, Hamu ni Yafeti. Hamu ni ŵaliji baba ŵawo Kenani.

¹⁹ Ŵanace ŵa Nowa ŵatatu ŵeleŵa, ni ŵali acinangolo ŵa ŵandu ŵa pa cilambo cosope capasi.

²⁰ Nowa ŵaliji mnamalima, juŵaliji jwandanda kupanda mpeleya.

²¹ Lisiku line ŵamwele finyo jwa mipeleya jila ni ŵakolelwe ni ŵagonile makonope mu tenti jakwe.

²² Nipo Hamu babagwe Kenani, piŵaweni baba ŵawo ali makonope, ni ŵajile kuja kwasalila acakulugwe ŵaŵili ŵiŵaliji pasa.

²³ Shemu ni Yafeti ŵajigele mkanjo ni kuwukoleka m'makoyo gawo ŵana ŵaŵili, ni ŵajesile citukulunyuma kuja ku tenti kukwawunicila baba ŵawo jemanjajo ali alolite kumbali, ni nganagawona makonope ga baba ŵawo.

²⁴ Nowa piŵajimwice, ŵayipikene yosope yele mwanace jwakwe jwamnondi yiŵatesile,

²⁵ nipo ŵatite, “Alwesece Kenani! Taciŵa kapolo jwa acalongo acimjakwe.

²⁶ Ni ŵatite soni acimbicikwe AMBUJE,* Mlungu jwa Shemu. Kenani taŵe kapolo jwa Shemujo.

²⁷ Mlungu amkwesye Yafeti, yisukulu yakwe tiyigaŵane upile ni yisukulu ya Shemu. Kenani taŵe kapolo jwa Yafetijo.”

²⁸ Cili cipite cikumba ca mesi cila, Nowa ŵatemi yaka yine 350

²⁹ Ŵawile ali akwete yaka 950.