Genesesi 8 - Chiyawo Bible

Kumala kwa cikumba ca mesi

¹ Mlungu ni ŵamkumbucile Nowa pamo ni yinyama yosope yiyaliji m'combo mula. Mlungu ŵapujisye mbungo pa cilambo capasi, nipo mesi gatandite kumilila.

² Mesi ga uliŵa gigakopokaga pasi galesile kopoka, kwinani nombe nako kwawugalice, ula nombe najo jalesile,

³ nipo mesi galiji mkupwa panandipanandi kwa masiku 150.

⁴ Pa lisiku lya 17 lya mwesi wa msano ni jiŵili, combo cila cajile kwima pacanya pa Litumbi lya Alalati.

⁵ Mesigo galiji mkumililape panandi panandi. Lisiku lyandanda lya mwesi walikumi, songa sya matumbi syawonecele.

⁶ Gali gapite masiku 40, Nowa ŵawugwile liwindo liŵapanganyisye pa comboco,

⁷ ni ŵalikopwesye likungulu. Likungululyo lyagambaga kuguluka mwinani kwembeceya kuti mesi gajumilile pa cilambo capasi.

⁸ Kaneko Nowa ŵajikopwesye njuŵa kuti jikalole naga mesi gajumilile,

⁹ nambo pakuŵa mesi galiji ciŵela pa cilambo cosope, njuŵajo jawujile kwa Nowa, ligongo nganijipata malo gakutula. Nowa ŵatambasukwile ligasa lyakwe kusa, ni ŵajijinjisye soni njuŵa jila m'combo mula.

¹⁰ Ŵalindilile masiku gane msano ni gaŵili ni ŵajikopwesye soni njuŵa jila.

¹¹ Jawujilile kwa Nowa ligulo, jili jijigele lisamba lyeŵisi lyacitela ca olifi.* Nipo Nowa ŵamanyilile kuti mesi gajumilile pa cilambo capasi.

¹² Nambo Nowa ŵalindilile masiku gane msano ni gaŵili ni ŵajitumile soni njuŵa jila, jele ndaŵiji njuŵajo nganijiwujila soni.

¹³ Mesi gamasile kumilila, pa lisiku lyandanda lya mwesi wandanda, Nowa ali ni yaka 601. Jwalakwe ŵawugwile liwindo lya combo cila ni ŵalolite kusa, ni ŵawuweni mkuli kuti ujumwile.

¹⁴ Pa lisiku lya 27 lya mwesi waŵili, cilambo cosope capasi caliji cili cijumwile.

¹⁵ Mlungu ŵamsalile Nowa kuti,

¹⁶ “Kopokani m'combomo m'mwejo ni ŵamkwenu, ŵanace ŵenu ŵacalume ni aciŵamkwawo.

¹⁷ Mkoposye soni yijuni ni yinyama yili ni m'mwejoyo kuti yiŵelekane ni kuti yijenele pa cilambo cosope capasi.”

¹⁸ Myoyo Nowa ŵakopwece m'combo ni ŵamkwakwe, pamo ni ŵanace ŵakwe ŵacalume ni aciŵamkwawo ŵiŵaliji nawo.

¹⁹ Nombe nayo yinyama yosope ni yijuni yosope yakopwece m'combo mula kwa upagwe wakwe.

Nowa akupeleka mbopesi

²⁰ Nowa ŵataŵile malo gakupelecela mbopesi kwa AMBUJE.* Ŵajigele mtundu uliwose wa nyama ni yijuni yele yiŵayitagaga ŵandu mbopesi, ni ŵayiwuleje, ni ŵayitasile mbopesi jakutinisya pa malo gakupelecela mbopesi gala.

²¹ Nipo AMBUJE piŵakupikene kununjila kwa liwungo lyambone lya mbopesijo ŵatite mu mtima mwakwe kuti, “Ngasinacilwesa soni cilambo capasi ligongo lya yitendo ya ŵandu kutandilila lelo, pakuŵa ngumanyilila kuti nganisyo sya ŵandu sili syakusakala kutandila ucanda wawo. Ngasinjonanga soni yindu yacijumi mpela mundendelemu.

²² Ndaŵi syosope muticitamile cilambo capasi, tipaciŵa ndaŵi ja kupanda ni ndaŵi ja kugowola. Tipaciŵa ndaŵi jakusisima ni ndaŵi ja citukuta, ndaŵi ja cawu ni ndaŵi ja cuku, soni musi ni cilo.”