Genesesi 7 - Chiyawo Bible

Cikumba ca mesi

¹ AMBUJE* ni ŵamsalile Nowa kuti, “Jinjilani m'combo pamo ni liŵasa lyenu lyosope. Une simene kuti m'mwejope ni ŵamkutenda yindu yagoloka pa cilambo capasi.

² Mjigale makuga msano ni gaŵili ga yinyama, yiŵe yiŵiliyiŵili, ya mkolo ni ya mkambako yakuŵajilwa kuyitaga mbopesi, ni mjigale soni yinyama yiŵiliyiŵili, yamkolo ni yamkambako yangaŵajilwa kuyitaga mbopesi.

³ Mjigale soni yijuni yiŵili yiŵili ya mtundu uliwose. Mtende yeleyi pakusosa kuti mtundu uliwose wa yinyama ni yijuni ya mitundu josope yisunjidwe ni umi, kuti tiyiŵelekane soni pa cilambo capasi.

⁴ Patigapite masiku msano ni gaŵili tindumisye ula pa cilambo capasi jitijidwe musi ni cilo kwa masiku 40. Cindu cilicose ca umi cinapanganyisye tinjicityosya pa cilambo capasi.”

⁵ Nowa ŵatesile yosope yiŵamlamwile AMBUJE.

⁶ Nowa ŵakwete yaka 600 pacayikaga cikumba ca mesi pa cilambo capasi.

⁷ Nowa ni ŵamkwakwe, ŵanace ŵakwe ŵacalume ni aciŵamkwawo ŵajinjile m'combo cila kuti akulupuce ku cikumba ca mesico.

⁸ Nyama syakuŵajilwa kutajidwa mbopesi ni syangaŵajilwa kutajikwa mbopesi, yijuni pamo ni yakwaŵa yiŵili yiŵili,

⁹ yajinjile m'combomo pamo ni Nowa mpela muŵalamulile Mlungu.

¹⁰ Gali gapite masiku msano ni gaŵili, cikumba ca mesi cayice pa cilambo capasi.

¹¹ Pa lisiku lya 17 lya mwesi waŵili, Nowa ali ni yaka 600, mesi ga uliŵa gawulice kutyocela pasi pa cilambo, kwinani kwawugwice kuti mesi gakusuce.

¹² Myoyo ula jagwile cilo ni musi kwa masiku 40.

¹³ Lisiku lilyolyo Nowa ni ŵamkwakwe, ŵanace ŵawo ŵacalume Shemu, Hamu ni Yafeti, ni aciŵamkwawo ŵajinjile m'combo mula.

¹⁴ Jemanjajo ŵajinjile m'combo pamo ni mtundu uliwose wa yinyama yamwitinji, ya kulanga, yinyama ya kukwaŵa, ni yijuni yamtundu uliwose.

¹⁵ Nowa ŵajinjile m'combomo pamo ni ya umi yosope, ya mkolo ni ya mkambako,

¹⁶ mpela muŵalamulile Mlungu, nipo ali ajinjile AMBUJE ŵawugele mlango wa comboco.

¹⁷ Cikumba ca mesi cakukwime pa cilambo kwa masiku 40. Mesi gatupile kwejinji pa cilambo capasi, mwakuti combo cayikene mwakujajaŵala pacanya pa mesi.

¹⁸ Mesi gapundile kutupa pa cilambo capasi, comboco caliji mkujajaŵala pacanya pa mesigo.

¹⁹ Mesi gatupile mpaka gatiŵisye songa sya matumbi gamalewu mnope.

²⁰ Myoyo mesigo galiji mkwelelakwelela, mpaka kusipeleta songa sya matumbigo ni mamita msano ni gaŵili.

²¹ Yindu yosope ya umi pa cilambo capasi yawile, mpela yijuni yiliyose, yinyama yiliyose ni ŵandu wosope,

²² cindu cilicose cakupumula ca pa cilambo cawile.

²³ Mlungu ŵayijonasile ya umi yosope ya pa cilambo capasi: ŵandu, yinyama ni yijuni. Nowa ni wosope ŵiŵaliji m'combo ni ŵiŵakulupwice.

²⁴ Mesi galiji ciŵela gamajinji pa cilambo capasi kwa masiku 150.