Genesesi 6 - Chiyawo Bible

Yitendo yakusakala ya ŵandu

¹ Ŵandu piŵatandite kutupa pa cilambo capasi, ni kukola soni ŵanace ŵacakongwe,

² malayika ga Mlungu galolite kuti ŵanace ŵacakongwe ŵa ŵandu ŵaliji ŵakusalala, ni ŵatandite kulombela jwalijose juŵamsacile.

³ Myoyo AMBUJE* ŵatite, “Ngasingunda kuti ŵandu akoleje umi wangawa, wa mpaka kalakala. Pakuŵa mundu ali cilu cakuwa. Kutandila sambano mundu tatameje ni umi yaka 120.”

⁴ Ndaŵi jelejo nambo soni pasogolo pakwe, ŵapali ŵandu ŵamacili ŵacalewulewu pa cilambo capasi. Ŵandu ŵeleŵa ni ŵiŵapagwaga mwacakongwe ŵiŵalombedwe ni ŵanace ŵa Mlungu ŵala. Jemanjaji ŵaliji ŵandu ŵamacili nambo soni ŵakumanyika pa jele ndaŵijo.

⁵ AMBUJE piŵayiweni kuti yitendo ya ŵandu ŵa pa cilambo capasi yili yakusakala mnope, ni kuti soni nganisyo sya mitima jawo sili syakusakala ndaŵi syosope,

⁶ ŵadandawile kuti ŵapanganyisye ŵandu ni kwaŵika pa cilambo capasi, nipo yeleyi yasakalisye mu mtima.

⁷ Myoyo AMBUJE ŵatite, “Ŵandu wosope ŵanapanganyisye pa cilambo capasi tinajonanje. Tinayijonanje soni yinyama yosope ni yakwaŵa yakwe, pamo ni yijuni, pakuŵa cikundenda canasa kuti nayipanganyisye yeleyi.”

⁸ Nambo Nowape ni juŵaliji jwagoloka pameso pa AMBUJE.

Nowa

^9-10 Aji ni ngani ja Nowa. Jwalakwe ŵakwete ŵanace ŵatatu mena gawo Shemu, Hamu ni Yafeti. Ŵaliji mundu jwakutenda yindu yakumnonyelesya Mlungu, soni ŵaliji mundu jwangali ulemwa,* nipo pa jele ndaŵijo ŵaliji mundu jikapejo, juŵaliji jwambone pameso pa Mlungu. Soni ŵaliji mundu jwakumjogopa Mlungu.

¹¹ Ndaŵi jelejo ŵandu ŵane wosope ŵaliji ŵakusakala pameso pa Mlungu, nipo kusakala kwawo kwajenele cilambo cosope capasi.

¹² Mlungu ŵaciweni cilambo capasi kuti cili cesakale, pakuŵa umi wa mundu jwalijose jwaliji jwakusakala.

¹³ Myoyo Mlungu ŵamsalile Nowa kuti, “Simicisye mu mtima mwangu kuti najonanje ŵandu ŵosope ŵene, ligongo cilambo capasi cigumbele ni yitendo yawo yakusakala.

¹⁴ M'mwejo mlipanganyicisye combo kutyocela ku matabwa ga yitela yambone. Mpanganye yipinda mkati mwakwe, msyasyajile ni lipula mkati ni kusa kwakwe.

¹⁵ Ayi ni yatimjile upanganye wakwe. Mcilewu mwa comboco muŵe mamita 133, mcijipi mwakwe muŵe mamita 22, msingu wakwe uŵe mamita 13.

¹⁶ Mpanganye msakasa wa comboco ni mlece lipesa lya masentimita 44 pa cilikati pa msakasawo ni mumbali mwakwe. Mcipanganye mwakusajikana, cikole nyumba sitatu syakusajikana, nipo cikole litanga mumbali mwakwe.

¹⁷ Mtende yeleyi ligongo tindumisye ula ja cikumba pa cilambo capasi kuti njonanje ya umi yosope. Ya umi yosope ya pa cilambo tiyiciwa,

¹⁸ nambo tinjiŵika cilanga* ni m'mwejo. Mkajinjile m'combomo m'mwejo pamo ni ŵamkwenu, ni ŵanace ŵenu ŵacalume ni aciŵamkwawo.

¹⁹ Nipo timjigale m'combomo yinyama ya mtundu uliwose, yiŵili yiŵili, yamkolo ni ya mkambako, mpela mwa mtundu wakwe, kuti yikasunjice ni umi.

²⁰ Yijuni ya mitundu josope, ni yinyama yayikulungwa ni yakwaŵa yakwe, yikajinjile m'combomo yiŵili yiŵili, ya mkolo ni ya mkambako, mpela mwa mtundu wakwe, kuti yikasunjidwe ni umi.

²¹ Mkajigale soni yakulya ya mitundu josope, kuti jemanja ni yinyamayo mkalyeje.”

²² Nipo Nowa ŵayitesile yosope yene yiŵalamwile Mlungu.