Genesesi 50 - Chiyawo Bible

¹ Ndaŵi jijojo Yosefe ŵaligwisisye pa mtembo wa babagwe ali mkulila.

² Kaneko Yosefe ŵalamwile ŵandu ŵakumanyilila ya mitela kuti awutaje mtembo wa babagwejo mtela kuti ukawola, nipo ŵandu ŵala ŵatesile myoyo.

³ Masengogo gajigalile masiku 40, gelega ni masiku gasosekwaga pa masengo ga mtundu welewo. Aiguputo ŵalisile malilo ga Yakobo* kwa masiku 70.

⁴ Pigamasile masiku gakulila malilo, Yosefe ŵasisalile nduna sya Mwenye jwa ku Iguputo kuti, “Pepani acakulungwa ndeje naŵende kuti, akasalile mwenye kuti,

⁵ ‘Baba ŵangu ali asigele panandi kuwa, ŵalumbilisye une kuti tingasice mwilembe liŵalisolele cile mcilambo ca Kenani. Myoyo, conde angunde kuti njawule ngasice malilo ga baba ŵangu, panyuma pakwe tingawuje soni akuno.’ ”

⁶ Mwenye jwa ku Iguputo ŵamjanjile kuti, “Yambone jawulani mkasice baba ŵenu mpela mumwalumbilile.”

⁷ Myoyo Yosefe ŵapite kuja kusika malilo ga baba ŵawo. Nduna sya Mwenye jwa ku Iguputo, Acakulungwakulungwa ŵapanganya ja mwenye, kwisa soni ŵandu ŵakumanyika ŵa mcilambo cosope ca Iguputo ŵampecesye Yosefe.

⁸ Ŵalongene ni ŵandu wosope ŵa liŵasa lyakwe, acalongo acimjakwe, ni ŵandu wosope ŵa mwiŵasa lya babagwe. Ku Gosheni kula ŵasigele ŵanace ŵanacepe, ngondolo syawo, mbusi syawo, ni ng'ombe syawo.

⁹ Asilikali ŵakwela pa mageleta ni mahaci, nombe nawo ŵampecesye. Myoyo, lyaliji likuga lya likulungwa lya ŵandu ŵaŵampecesye.

¹⁰ Piŵayice pa malo gakuputila tiligu ku Atadi, kungopoko lyuŵa kwa Yolodani, Yosefe ŵatesile mwambo wa malilo kweleko, nipo ŵalisile malilo ga baba ŵawo kweleko kwa masiku msano ni gaŵili.

¹¹ Ŵandu ŵa ku Kenani piŵaweni ŵanduwo alimkulila malilo ku Atadiko, ŵatite kuti, “Kulila kwa malilo kwa mtundu welewu kuli kwa ku Iguputo.” Myoyo malo gala ŵagapele lina lyakuti, Abele Misilayimu.

¹² Ŵanace ŵa Yakobo ŵatesile yosope mpela muŵalamulile baba ŵawo mula,

¹³ pakugajigala malilo gawo gala ni kuja nago ku Kenani kuŵagasicile mu mbanga jijaliji mu mgunda ku Makipela kungopoko lyuŵa kwa musi wa Mamule, malo gaŵasumile Abulahamu* kutyocela kwa Efuloni jwa mtundu wa Cihiti kuti gaŵe malembe.

¹⁴ Piŵamasile kusika malilo, Yosefe pamo na acalongo acimjakwe ni ŵandu wosope ŵaŵapecesye malilo ŵawujile ku Iguputo.

Cilanga ca Yosefe ni acalongo acimjakwe

¹⁵ Ali awile baba ŵawo ŵala, acalongo acimjakwe ŵa Yosefe ŵatite, “Ana tucitenda uli uweji, Yosefe pitacitanda kutuŵenga, ni kusaka kuwucisya yakusakala yosope yitwamtendele yila?”

¹⁶ Myoyo ŵatumisye maloŵe kwa Yosefe gakuti, “Baba ŵetu mkanawe,

¹⁷ ŵatusalile kuti, ‘Jemanja mwatesile yindu yangalwe soni yakogoya, kumtendela Yosefe, nambo ngumsalila mkamdandawulile jwalakwejo kuti amkululucile.’ Myoyo uweji tukwaŵenda ŵalakwe acimwene kuti, conde, atukululucile yindu ya ngalwe soni yakogoya yitwatendele ŵalakwe, acimwene. Soni tukutumicila wosopewe Mlungu jwele baba ŵetuwo ŵamtumicilaga.” Ali agapikene gele maloŵego Yosefe ŵatandite kulila.

¹⁸ Acalongo acimjakwe ŵa Yosefe ŵayice ni ŵatindiŵele pasogolo pakwe ni ŵatite kuti, “Uwe tuli sambano acikapolo pameso pawo.”

¹⁹ Nambo Yosefe ŵatite kuti, “Mkasimjogopa. Une ngakomboleka kuyigalawusya yiwaganisisye Mlungu.

²⁰ Jemanja mwapangene kundendela une yindu yakusakala, nambo Mlungu ŵayigalawisye yeleyo kuŵa yindu yambone, kuti umi wa ŵandu ŵajinji, ŵali ciŵela cijumi lelo jinoŵa ukulupuce.

²¹ Sambano jemanja mkajasa mtima, tinamlisyeje une pamo ni ŵanace ŵenu.” Myoyo ŵalimbisye ni kwatulasya mitima jawo.

Ciwa ca Yosefe

²² Yosefe ŵatemi ku Iguputo ni mbumba ja baba ŵawo. Ndaŵi jiŵawaga ni kuti ali ŵa yaka 110.

²³ Yosefe ŵatemi ni umi mpaka ŵaweni ŵanace ŵa Efelemu ni yisukulu ya mpago watatu. Pa ndaŵi jiŵapagwile ŵanace ŵa Makili, mwanace jwamlume jwa Manase, Yosefe ŵapocele ŵanacewo mwiŵasa mwakwe.

²⁴ Yosefe ŵasalile acalongo acimjakwe ŵala kuti, “Une sigele panandi kuwa, nambo Mlungu tacimsunga nditu, nipo tacimkoposya mcilambo acino, kwawula namwe ku cilambo ciŵaŵisile cilanga* kwa Abulahamu, Isaki ni Yakobo.”

²⁵ Kaneko Yosefe ŵaŵendile acalongo acimjakwe ŵala kuti alumbile ni ŵatite, “Lumbilani kuti ndaŵi jele Mlungu tacimlongolela ku cele cilamboco, ticijigala cilu cangu kutyocela akuno.”

²⁶ Myoyo Yosefe ŵawile ali akwete yaka 110 ku Iguputo, mtembo wakwe ŵawupacile mtela wakulekasya kuwola, nipo ŵawuŵisile mwibokosi.