Genesesi 5 - Chiyawo Bible

Lukosyo lwakutyocela mwa Adamu

¹ Ayi yili yisukulu yakutyocela mwa Adamu.* (Mlungu piŵapanganyisye ŵandu, ŵapanganyisye mpela jwalakwejo.

² Mlungu ŵapanganyisye jemanjajo jwamlume ni jwamkongwe, ŵapele upile, ni ŵapele lina lyakuti “Mtundu wa ŵandu.”)

³ Adamu piŵaliji ni yaka 130, ŵakwete mwanace jwamlume jwakulandana nawo asyene, ni ŵampele lina lyakwe Seti.

⁴ Ali apali Seti, Adamu ŵatemi yaka yine soni 800. Ni ŵakwete ŵanace ŵane soni ŵacalume ni ŵacakongwe.

⁵ Ŵawile ali ŵana yaka 930.

⁶ Seti piŵaliji ni yaka 105, ŵakwete mwanace jwamlume lina lyakwe Enoshi,

⁷ nipo Seti ŵatemi cijumi yaka yine 807 ali apagwile Enoshi, ni ŵakwete soni ŵanace ŵane ŵacalume ni ŵacakongwe.

⁸ Ŵawile ali ŵana yaka 912.

⁹ Enoshi piŵaliji ni yaka 90, ŵakwete mwanace jwamlume lina lyakwe Kenani,

¹⁰ nipo Enoshi ŵatemi ni umi yaka yine 815 ali apali Kenani. Ŵakwete soni ŵanace ŵane ŵacalume ni ŵacakongwe.

¹¹ Ŵawile ali ŵana yaka 905.

¹² Kenani piŵaliji ni yaka 70, ŵakwete mwanace jwamlume Mahalalele.

¹³ Kenani ŵatemi ni umi yaka yine 840 ali apagwile Mahalalele. Ŵakwete soni ŵanace ŵane ŵacalume ni ŵacakongwe.

¹⁴ Ŵawile ali ŵana yaka 910.

¹⁵ Mahalalele ali ŵa yaka 65 ŵakwete mwanace jwamlume lina lyakwe Yaledi,

¹⁶ jwalakwe ŵatemi ni umi yaka yine 830, kutyocela pandaŵi jiŵapali Yaledi. Ŵaŵelece soni ŵanace ŵane ŵacalume ni ŵacakongwe.

¹⁷ Mahalalele ŵawile ali ŵana yaka 895.

¹⁸ Yaledi piŵaliji ni yaka 162, ŵakwete mwanace jwamlume lina lyakwe Enoki.

¹⁹ Ni ŵatemi Yaledi ni umi yaka yine 800 kutyocela ndaŵi jiŵapali Enoki. Ŵakwete soni ŵanace ŵane ŵacalume ni ŵacakongwe.

²⁰ Ŵawile ali ŵana yaka 962.

²¹ Enoki piŵaliji ni yaka 65, ŵakwete mwanace jwamlume Metusela.

²² Ni ŵatemi Enoki ni umi yaka yine 300 ali mkwenda m'matala ga Mlungu, ni ŵakwete soni ŵanace ŵane ŵacalume ni ŵacakongwe.

²³ Enoki ŵawile ali ŵana yaka 365.

²⁴ Enoki ŵaliji mundu jwakupikangana ni Mlungu umi ŵakwe wosope. Nipo nganawoneka soni, ligongo lyakuti Mlungu ŵamjigele.

²⁵ Metusela piŵaliji ni yaka 187, ŵakwete mwanace jwamlume lina lyakwe Lameki,

²⁶ ni ŵatemi Metusela ni umi yaka yine 782, kutyocela pa ndaŵi jiŵapali Lameki. Ŵakwete soni ŵanace ŵane ŵacalume ni ŵacakongwe.

²⁷ Myoyo Metusela ŵawile ali ŵana yaka 969.

²⁸ Lameki piŵaliji ni yaka 182 ŵakwete mwanace jwamlume,

²⁹ ni ŵatite, “Mwanace jweleju ni jutatupumusye uwe ku masengo getu gakupesya, gakulima mwitaka liŵalilwesile AMBUJE.”* Myoyo mwanacejo ŵampele lina lyakwe Nowa.

³⁰ Lameki ŵatemi ni umi yaka yine 595, kutyocela pa ndaŵi jiŵapali Nowa. Ni ŵakwete soni ŵanace ŵane ŵacalume ni ŵacakongwe.

³¹ Lameki ŵawile ali ŵana yaka 777.

³² Nowa ali ni yaka yakupeleta 500, ni pa ŵakwete ŵanace ŵatatu ŵacalume, Shemu, Hamu ni Yafeti.