Genesesi 49 - Chiyawo Bible

Maloŵe gakumalisya ga Yakobo

¹ Yakobo* ŵaŵilasile ŵanace ŵawo wosope ŵacalume ni ŵasalile kuti, “Msongangane wosope ŵene pamo kuti nimsalile yitiyicitendekwa msogolo mwenu:

² Myice akuno, ŵanace ŵa Yakobo, nipo mpikane, mpikane maloŵe ga baba ŵenu Isalaeli.

³ “Lubeni mwanace jwangu jwandanda kupagwa, mli macili gangu, mli mtuka wangu ŵandanda wamacili gangu. Mwa ŵanace ŵangu wosope, ŵakupunda mnope ni m'mwejo, pa ucimbicimbi ni pa macili.

⁴ Mli mpela cikumba ca mesi gakogoya, nambo ngasimŵa soni mundu jwakucimbicika, ligongo lyakuti nganimjogopa kugona pa cindanda ca une, mwagasakesye malo ga gona une baba ŵenu.

⁵ “Simiyoni ni Lefi ali pa ulongo wawo, akukamulisya masengo yida ya ngondo, pakutenda yindu ya ukoleko.

⁶ Une ngasindama nawo pakuŵeceta ya mtemela yawo, ngangusosa kutama nawo m'misongano jawo, ligongo lyakuti ŵawuleje ŵandu mwa ukali, nipo ŵasipundwile ng'ombe sya mkambako mwa ngalwe, ni yaliji yindu yakwasangalasya.

⁷ Malweso gayicilile jemanjajo, ligongo kutumbila kwawo kuli kwakogoya mnope, ukali wawo soni ulwesece, ligongo jelejo ni ngalwe. Tinjagaŵanya jemanjajo, mcilambo cosope ca Isalaeli. Tinjamwasanya pasikati, pa mitundu ja ŵandu ŵa ku Isalaeli.

⁸ “M'mwe Yuda, acalongo acimjenu tacimlumba. Amagongo ŵenu timcakamula pa lukosi. Nipo acalongo acimjenu tacimtindiŵalila.

⁹ Yuda ali mpela lisimba. Lili liwuleje, likusawujila soni kumalo kulukasajuŵa. Yuda ali mpela lisimba, akusatambasukuka ni gona pasi. Jwalakwe kweli ali lisimba, nipo pangali mundu jwa mpaka alimbe mtima kuti amjimusye.

¹⁰ Simbo ja ucimwene ngasijityoka mwa Yuda, simbo ja ulamusi ngasijityoka m'myala mwakwe, tacigasunga macili gakwe, mpaka pataciyika msyene ucimwene msyesyene, ŵakwalamula ŵandu wosope.

¹¹ Akusamtaŵilila bulu jwakwe pa citela ca mpeleya, mwanace jwa bulu ku citela ca mpeleya wambone mnope, yakuwala yakwe akusacapa mu finyo, mu finyo wakucejela mpela miasi.

¹² Meso gakwe gali gakucejela, ligongo lya kumwa finyo, nipo meno gakwe gali gamaswela mnope, ligongo lyakumwa mkaka.

¹³ “Sebuloni tacitama mungulugulu nyasa, nipo yombo tiyicitililaga m'yiko yawo, nipo tacikola ulamusi mungulugulu nyasa josope mpaka ku Sidoni.

¹⁴ “Isakala ali mpela bulu jwamacili, jwawuteme ali cilikolecele misaku jakunyakulila katundu.

¹⁵ Pa malo pakupumulapo apaweni kuti pali pambone, ni kuti soni cilamboco cili cambone. Myoyo ni akwinama ni kutwicila katundu. Ni akuŵa kapolo jwakukamula masengo mwakumcisya.

¹⁶ “Dani taciŵa jwakulamula jwa ŵandu ŵakwe. Taciŵa mpela umo mwamitundu ja Isalaeli.

¹⁷ Dani taciŵa mpela lijoka mungulugulu litala, taciŵa mpela lijoka lya ululu mungulugulu litala, lyakuluma yindende ya haci, kuti ŵakukwela hacijo agwe calugali.

¹⁸ “Ngwembeceya cikulupusyo cawo, ŵalakwe AMBUJE.

¹⁹ “Ŵawiyi tacimyicilila Gadi, nambo jwalakwe taciliwucisya.

²⁰ “Cilambo ca Asha ticiciŵeleka yakulya yambone, yakwenela kulya acayimwene.

²¹ “Nafutali ali mpela ngolombwe jagamba kulijendela mwamtendele, jajikusaŵeleka ŵanace ŵakusalala.

²² “Yosefe ali mpela lujambi lwakusogola yisogosi, lujambi lwakusogola yisogosi lwakuŵandikana ni nduluko ja mesi, mpela lujambi lwalukutambasukuka pa lipupa.

²³ Ŵandu ŵakola mawukunje ni mipamba ŵalimbene najo kwejinji, ŵamsomile nipo ŵamsawisye kwejinji.

²⁴ Nambo ukunje wa jwalakwe waliji wacile ndaŵi syosope, ligongo Mlungu jwa Yakobo Jwamacili ŵagapele macili makono gakwe. Jwalakwe jwakusamtetela ni kumlolela Isalaeli.

²⁵ Ligongo lya Mlungu jwa baba ŵenu jutacimkamucisya m'mwejo. Mlungu Jwamaciligosope jutacimpa upile m'mwejo, jutacimpa upile pakumpa jemanja ula ja kutyocela kwinani, ni jakutyocela mkati mwa m'nyasa. Nambo soni upile wa wawuŵelesi.

²⁶ Upile wakutyocela kwa baba ŵenu uli ŵamacili kupunda upile wa matumbi tigaciŵa mpaka kalakala. Kupunda yindu yambone yakutyocela m'matumbigo. Upile wosopewo uŵe pa mtwe pa Yosefe, pawusyo pa jwalakwe juŵalekangene ni acalongo acimjakwe.

²⁷ “Benjamini ali mpela lisogo lyakogoya. Lyakuwulaga ni kulya nyama kundaŵi ni ligulo.”

²⁸ Aji ni mitundu 12 ja ŵandu ŵa ku Isalaeli, yeleyi ni yiŵaŵecete Yakobo baba ŵawo kwa jemanjajo, ndaŵi jiŵampaga upile jwalijose pakwalanga. Nipo jwalijose ŵampele upile wakumŵajila.

Ciwa ni kusicidwa m'malembe kwa Yakobo

²⁹ Nipo Yakobo ŵalamwile ŵanace ŵakwe ŵala kuti, “Une sigele panandi kuwa, ni mkasice une kwagonile acibaba ŵangu mu mbanga jijili mu mgunda wa Efuloni jwa Cihiti.

³⁰ Mkasice une mu mbanga jijili mu mgunda ku Makipela, kungopoko lyuŵa kwa musi wa Mamule mcilambo ca Kenani. Malo gaŵasumile Abulahamu* kutyocela kwa Efuloni jwa mtundu wa Cihiti kuti gaŵe malembe.

³¹ Mwelemo ni muŵamsicile Abulahamu ni Sala ŵamkwawo, Isaki ni Labeka ŵamkwawo, mwelemo soni ni munasicile Leya ŵamkwangu.

³² Mgunda pamo ni mbanga jili mu mgunda yasumidwe kutyocela kwa Ahiti.”

³³ Yakobo piŵamasile kuŵeceta yosopeyi, ŵagonile pacindanda pala ni kuwa.