Genesesi 45 - Chiyawo Bible

Yosefe akulilosya kwa acalongo acimjakwe

¹ Papopo Yosefe ŵalepele kupilila pameso pa ŵamasengo ŵakwe ŵala, ni ŵalamwile kuti akopoce pasa. Myoyo paliji pangali ŵandu ŵane ndaŵi jiŵasalilaga acalongo acimjakwe, kuti, “Unetu Yosefe.”

² Ŵalisile mwakupikanika mwakuti ŵandu ŵa ku Iguputo ŵakupikene kulilako, ngani ja kulilako japikanice mpaka kwa Mwenye jwa ku Iguputo.

³ Yosefe ŵawusisye acalongo acimjakwe ŵala, kuti, “Ana baba ŵangu ali ciŵela ni umi?” Nambo acalongo acimjakwe ŵala nganapakombola kumjanga ligongo lya woga.

⁴ Yosefe ni ŵatite kwa acalongo acimjakwe ŵala kuti, “Conde ŵandicilani kundili une kuno.” Piŵaŵandicile, jwalakwe ŵatite kuti, “Kweli, une ndili mlongo mjenu jula Yosefe, jumwamsumisye ku Iguputo.

⁵ Nambo sambano mkajasa mtima kapena kudandawula, pakuŵa Mlungu msyene ni juŵalongwesye une akuno, kuti akulupusye umi wa ŵandu ŵajinji.

⁶ Caka acino cili caka caŵili ca salaji. Nambo yisigele yaka yine msano, pa yakayi yeleyi ŵandu ngasalima kapena gowola.

⁷ Mlungu ŵalongwesye une cile akuno, kuti namkulupusye jemanja pamo ni yisukulu yenu.

⁸ Myoyo ngaŵa jemanja ŵimwandumisye une akuno, nambo Mlungu. Jwalakwe ambisile une kuŵa nduna jajikulungwa mnope mcilambo cosope ca Iguputo.

⁹ “Sambano mjawule kwa baba ŵangu mwacitemacitema, mkasalile kuti, mwanagwenu Yosefe akusala kuti, ‘Mlungu ambisile une kuŵa jwamkulungwa jwa cilambo cosope ca Iguputo, sambano ayice akuno, akakokoŵa.

¹⁰ Takombolece kutama akuno mcilambo ca Gosheni, kuti atame mwakuŵandikana ni uneji. Ayice kutama akuno ŵalakwe, ŵanace ŵawo, yisukulu yawo, yilangwa yawo ni yindu yosope yakwete.

¹¹ Pitakatame ku Gosheni, une tingasamalileje. Yaka yasala yisigele msano. Une ngingusosa kuti ŵalakwe alaje pamo ni liŵasa lyawo, ni ŵandu wosope ŵali nawo ni sala.’ ”

¹² “Sambano jemanja wosopemwe, pamo ni mpwanga Benjamini, mkukomboleka mumbecetele yindu yosopeyi kumanyilila kuti une kweli ndili Yosefe junguŵeceta ni jemanja.

¹³ Mkasalile baba ŵangu ya ucimbicimbi wungwete une akuno ni yiliyose yimyiweni. Ni mkayiceje nawo baba ŵanguwo akuno mwacitemacitema.”

¹⁴ Ali amasile kuŵeceta gele maloŵego, Yosefe ŵamkumbatile Benjamini mpwakwe jula, ni ŵatandite kulila soni, Benjamini nombe najo ŵatandite kulila ali akumbatilene.

¹⁵ Yosefe ŵakomasisye acalongo acimjakwe wosope ŵala kwine ali mkulila. Kaneko acalongo acimjakwe ŵala ŵatandite kukunguluka najo Yosefe jula.

¹⁶ Ngani jakuti acalongo acimjakwe ŵa Yosefe ayice japikanice ku nyumba ja Mwenye jwa ku Iguputo. Yeleyi yamnonyelesye Mwenye jwa ku Iguputo pamo ni ŵamasengo ŵakwe.

¹⁷ Nipo Mwenye jwa ku Iguputo ŵatite kwa Yosefe, “Mwasalile acalongo acimjenuwo kuti ŵatwice acibulu ŵawo ni awujile ku cilambo ca Kenani.

¹⁸ Akajigale baba ŵawo ni maŵasa gawo ni akawujileje akuno. Tinape malo gambone mnope mcilambo cosope ca Iguputo, ni tacilya yagowola ya mcilambo ca Iguputo.

¹⁹ Mwasalile soni kuti ajigale yigeleta yakunokuno kuti akakwelemo ŵanace ŵawo ni aciŵamkwawo ni akajigale baba ŵawo ni akayiceje akuno.

²⁰ Akasadandawula ya yindu yawo yitayilece kukoko ligongo yindu yosope yambone ya mu Iguputo yili yawo.”

²¹ Ŵanace ŵa Yakobo* ŵatesile yeleyo nipo Yosefe ŵapele yigeleta mpela muŵalamulile Mwenye jwa ku Iguputo. Ŵapele soni yakulya ya pa ulendo.

²² Yosefe ŵapele acalongo acimjakwe ŵala yakuwala yine, jwalijose cimocimo. Nambo Benjamini ŵampele mbiya sya silifa* 300 kwisa soni yakuwala msano.

²³ Kwa baba ŵawo ŵatumisye, acibulu likumi ali anyakwile yindu yambone ya mcilambo ca Iguputo, acibulu ŵane likumi ali anyakwile tiligu, mkate ni yine yakulya pa ulendo ya baba ŵawo.

²⁴ Ni ŵasalile kuti ajawuleje, piŵanyakukaga jwalakwe ŵasalile kuti, “Mkasimkangana mwitala.”

²⁵ Ŵatyosile ku Iguputo kuwujila ku Kenani kuŵaliji baba ŵawo.

²⁶ Ni ŵasalile baba ŵawo ŵala kuti, “Yosefe ali cijumi,” nipo “Jwalakwe ni jwali jwakulamula jwa cilambo cosope ca Iguputo.” Yakobo ŵaliji ŵakutenguka nipo nganakulupilila.

²⁷ Nambo piŵamsalile maloŵe gosope gakutyocela kwa Yosefe, nipo piŵayiweni yigeleta yila yiŵatumisye Yosefe kuti takwele, ŵatandite kulupilila.

²⁸ Kaneko Yakobo ŵatite, “Basi yambone, mwanangu Yosefe ali cijumi, tinjawule ngamlole mkinimbwe.”