Genesesi 44 - Chiyawo Bible

Kusoŵa kwa mgawo

¹ Panyuma pakwe Yosefe ŵamlamwile jwamasengo jwamkulungwa jwakulolela nyumba jwakwe kuti, “Mgumbasye misaku ja ŵanduŵa ni yakulya yejinji mutatwicilile mose. Soni mbiya sya mundu jwalijose msiwucisye ni kusiyika pakamwa pa misaku jawo.

² Pakamwa pa msaku wa Benjamini myice mgawo wangu wa silifa* pamo ni mbiya syakwe syateje asumile yakulya.” Jwamasengo jula ŵatesile mpela muŵamsalilile.

³ Pakwacele kundaŵi, ŵandu ŵala ŵakundile kwawula kumangwawo pamo ni acibulu ŵawo.

⁴ Ali ajesile mkuli panandi kutyocela ku msinda kula, Yosefe ŵamsalile jwamasengo jwakwe jwamkulungwa jula kuti, “Mwawutucile ŵandu ŵala. Ni patimkasimane mkawusye kuti, ‘Uli mkumtendela yakusakala mundu jwakuti amtendele yambone?

⁵ Ligongo cici mjiŵile mgawo wakusamwela Ambuje ŵangu? Akusati naga akusosa kumanyilila ya msogolo, akusakamulisya masengo mgawo welewo. Mtesile yindu yakusakala kwabasi.’ ”

⁶ Jwamasengo jula piŵasimene ŵandu ŵala, ŵaŵecete nawo muŵamsalilile mula.

⁷ Acakulugwe ŵa Yosefe ŵala ni ŵamjanjile kuti, “Ambuje, ligongo cici mkuŵeceta maloŵe gamti myoyo? Uwe ngaŵa mkutenda cindu camti myoyo!

⁸ Mwayiweni yitwatesile pakuwuja nasyo mbiya sitwasisimene m'misaku jetu kutyocela ku Kenani. Ana ni mpaka tujiŵe soni silifa kapena golidi* m'nyumba mwa Ambuje ŵenu?

⁹ Bwana, naga jwine mwa uweji akusimanikwa ni mgawo welewo, awulajidwe nditu, nipo wosopewe tuciŵa acikapolo ŵenu.”

¹⁰ Jwamasengo jula ni ŵajanjile kuti, “Yambone tiyiŵe mumŵecetelemo. Jutinamsimane nawo mgawowo ni jutaŵe kapolo jwangu, ŵane wosope timŵe ŵangali magambo.”

¹¹ Mundu jwalijose ni ŵatusile msaku wakwe mwacitema ni kuwugopola.

¹² Mundu jula ŵalolesisye m'misaku jawo jila kutandila msaku wa mundu jwamkulungwa mnope kuja kumalicisya jwamnondi mnope, nipo mgawo ula ŵawusimene mumsaku wa Benjamini.

¹³ Acalongo acimjakwe ŵa Yosefe ŵala ni ŵapapwile yakuwala yawo ligongo lya canasa. Ŵatwicile acibulu ŵawo ŵala ni kuwujila ku msinda kulakula.

¹⁴ Yuda ni acalongo acimjakwe piŵayikaga ku nyumba ja Yosefe, ŵamsimene Yosefejo ali kukoko ni ŵatindiŵele pameso pakwe.

¹⁵ Yosefe ni ŵatite, “Ana cimtesileci ni cici? Ngamkumanyilila kuti mundu mpela ngusakombola kumanyilila ya msogolo?”

¹⁶ Yuda ni ŵatite, “Ana uwe mpaka tujile soni uli? Pangali cakuti tuŵecete soni kuti tulitetele. Mlungu alosisye ulemwa* wa ŵamasengo ŵenuwe. Wosopewe pamo ni jwasimanikwe ni mgawo tuli acikapolo ŵenu Ambuje.”

¹⁷ Nambo Yosefe ŵatite, “Une ngatenda yeleyo! Mundu jwasimanikwe ni mgawojo ni jutaŵe kapolo jwangu. Ŵanemwe jawulagani kwa baba ŵenu mumtendele.”

Yuda akumcondelela Yosefe kuti amgopole Benjamini

¹⁸ Papopo Yuda ŵasejelele kuŵaliji Yosefe ni ŵamsalile kuti, “Pepani ambuje, conde angunde une kuti mbecete ni wawo. Conde akambila mtima, pakuŵa ŵalakwe akwete ulamusi mpela mwaŵelele Mwenye jwa ku Iguputo kuno.

¹⁹ Paja ŵalakwe ambuje, ŵatuwusisye ya baba ŵetu, nambo soni naga tukwete mpwetu jwine.

²⁰ Uwe ni twajanjile ŵalakwe kuti, ‘Tukwete baba ŵetu nambo ŵacikulile. Nambo soni tukwete mpwetu jwamnondi, mwanace jwakuwucekulu wawo baba ŵetu, mkulugwe jwa mpwetujo ŵawile, soni jwalakwe pejo ni jwasigele mwiŵele lya acikulugwe ni kuti soni baba ŵetu akusamnonyela kwejinji.’

²¹ Ŵalakwe ambuje, ŵatusalile uweji kuti, tuyice nawo akuno wawo kuti amlole jwalakwejo.

²² Uwe twasalile ŵalakwe kuti, mcandajo ngaŵa mkwaleka jika babagwe, ligongo naga akutyoka, basi babagwewo kuwa tikuciŵa kukoko.

²³ Ŵalakwe ni ŵatite kuti, ‘Naga ngamyika akuno ni mpwenujo une ngasinamkunda jemanja kuti mwonecele pameso pangu.’

²⁴ “Ni pitwawujile kwa baba ŵetu, twasalile maloŵe genugo.

²⁵ Nipo kaneko ŵatusalile uwe kuti tuwujile soni tukasume yakulya panandi.

²⁶ Uwe twajanjile kuti, ‘Ngatujawula, nambo naga mpwetu jwamnondi mnope akwawula, nowe tujawule, ligongo uwe ngaŵa mkuja kuwonegana najo mundujo naga ngatukwawula ni mpwetujo.’

²⁷ Baba ŵetu ŵatite, ‘Mkumanyilila kuti ŵamkwangu Lakelo ŵamŵelecele une ŵanace ŵacalume ŵaŵilipe.

²⁸ Jumo ŵawile, nipo ngukulupilila kuti ŵakamwilwe ni cilombo ca mwitinji ligongo ngininam'wona soni kutandila lisiku liŵatyosile.

²⁹ Myoyo naga mkunjigalila ajuju, ni kuja kuwulajidwa soni, ni kuti une munjekulupilemu, tinjiwa ni canasa.’

^30-31 “Ni ligongo lyakwe sambano naga nguwujila kwa baba ŵangu, ndili jwangali mcandaju, pawuli mtima wa baba ŵanguwo, patakagambe kulola kuti mcandaju pangali, takawe, myoyo citwatendesye kuti baba ŵetu ŵali ŵacikulile awe, ligongo lya canasa.

³² Soni ŵalakwe ambuje, unetu nawupelece umi wangu kwa baba ŵangu ligongo lya mcanda jweleju. Nasalile baba ŵetuwo, kuti, ‘Naga nganja kuwuja najo mcandaju, tinjiŵa mundu jwakulemwa pameso pa baba ŵanguwo umi wangu wosope.’

³³ Sambano ambuje, une tisigale kunokuno kuti mbe kapolo jwawo m'malo mwa mcandaju. Amkunde jwalakweju kuti ajawuleje pamo ni acalongo acimjakweŵa.

³⁴ Ana une komboleka uli kwawula kwa baba ŵangu ndili jwangali mcandaju? Uneji ngakomboleka kupilila kuti naliwone likungu lyalikulungwa mnope lili mkwagwila baba ŵangu.”