Genesesi 42 - Chiyawo Bible

Acalongo acimjakwe ŵa Yosefe akwika ku Iguputo kusuma tiligu

¹ Piŵapikene Yakobo* kuti ku Iguputo ni kuyili yakulya, ŵawusisye ŵanace ŵakwe kuti, “Ligongo cici mgamba kutama ngatenda kandu?”

² Yakobo ni ŵatite soni, “Mbikene kuti kwana tiligu ku Iguputo, mjawule kweleko mkatusumile tiligu kuti tulame, tukawa ni sala.”

³ Myoyo acalongo acimjakwe Yosefe likumi, ŵanyakwice kwawula ku Iguputo kuja kusuma yakulya.

⁴ Nambo Yakobo nganamtuma Benjamini mpwakwe msyesyene jwa Yosefe pamo ni acalongo acimjakwewo, ligongo ŵajogwepe ni mkaŵa kuja kupata soni likungu.

⁵ Nipo ŵanace ŵacalume ŵa Yakobo ŵajawile ku Iguputo kuja kusuma yakulya pamo ni ŵandu ŵane, ligongo lyakuti ku cilambo ca Kenani, kwaliji kwana sala.

⁶ Pakuŵa sambano Yosefe ni juŵaliji nduna jajikulungwa jakulamulila cilambo cosope ca Iguputo, jwalakwe ni juŵasumisyaga yakulya kwa ŵandu ŵosope ŵakutyocela kumbali syosope sya yilambo. Myoyo acakulugwe Yosefe ŵayice nombe nawo, nipo ŵamtindiŵalile Yosefejo, ni kumjinamila.

⁷ Yosefe piŵaweni acakulugwe ŵala, ŵamanyilile, nambo ŵalambucisye mpela ngakwamanyilila. Nipo ŵatandite kuŵeceta nawo mwa ukali, ni ŵawusisye kuti, “Ana jemanja mkutyocela kwapi?” Jemanjajo ŵajanjile kuti, “Tutyocele ku Kenani, tuyice kukusuma yakulya akuno.”

⁸ Atamose kuti Yosefe ŵamanyilile acalongo acimjakwe ŵala, nambo jemanjajo nganam'manyilila.

⁹ Yosefe ŵakumbucile sagamisi sila kuti ŵasagamilaga yakwamba jemanjaji, nipo ŵatite, “Jemanja mli ŵandu ŵakusonda cilambo, myice akuno kukusonda, kuti mlole naga cilambo cetu cili cangali macili.”

¹⁰ Ni ŵamjanjile kuti, “Iyayi ambuje, uwe ŵakutumicila ŵenu tuyice kukusuma yakulyape basi.

¹¹ Uwe tuli ŵanace ŵacalume ŵa mundu jumo, tuli ŵandu ŵakulupicika, nganituŵa ŵandu ŵakusonda cilambo.”

¹² Nambo Yosefe ŵatite kuti, “Iyayi. Jemanja myicile ku kusonda cilambo cetu cino, kuti mcilole naga cili cangali macili.”

¹³ Acalongo acimjakwe Yosefe ŵala ŵajanjile soni kuti, “Ambuje, uweji twapali ŵanace ŵacalume 11, baba ŵetu ŵamo, ku cilambo ca kumangwetu ca Kenani. Mpwetu jwine ŵawile, nipo jwamnondi mnope asigele ni baba ŵetu.”

¹⁴ Yosefe ni ŵajanjile kuti, “Paja nimsalile kala kuti jemanja mli ŵandu ŵakusonda cilambo basi.

¹⁵ Kuti simicisye kuti jemanja nganimŵa ŵandu ŵakusonda cilambo, tinamlinje ni cindu aci: Ngulumbila mu lina lya Mwenye jwa ku Iguputo kuti jemanja ngamtyoka akuno mpaka mpwenu jwamnondi mnopejo ali ayice akuno.

¹⁶ Mumtumisye mundu jumo cilikati cenu kuti ajawule akamjigale mpwenujo, ŵakusigala wosope timŵe mu ukayidi, kuti tulole naga yimkuŵeceta jemanja yili yakuwona. Naga kulepeleka pelepo, mu lina lya Mwenye jwa ku Iguputo, jemanja mli ŵakusonda cilambo basi.”

¹⁷ Ni ŵaŵisile wosope ŵene mu ukayidi kwa gatatu.

¹⁸ Lisiku lyatatu Yosefe ŵasalile kuti, “Une ngusinamjogopa Mlungu nipo ngumpa upile wakuti mwukulupusye umi wenu pakutenda cindu aci.

¹⁹ Naga mli ŵandu ŵakulupicika, jumo mwa jemanja asigale akuno mu ukayidi, ŵane wosopemwe mkajigale yakulya ni mjawuleje nayo ku maŵasa genu gagakulaga ni sala kumangwenu.

²⁰ Mpwenujo mkayice najo akuno kuti tulole naga mkuŵeceta yakuwona, ni ngatumwulaga.” Ŵandu ŵala ni ŵakamulene nayo yeleyo.

²¹ Acalongo acimjakwe ŵa Yosefe ni ŵaliji mkuŵecetana kuti, “Nditu uwe twalemwisye pangamtendela canasa mpwetu jula, piŵatuŵendaga kuti tumtendele canasa, nambo uwe nganitumtendela kose canasa. Ni ligongo lyakwe tuli m'yisawusyo sambano jino.”

²² Lubeni ni ŵajanjile kuti, “Une ngati namsalile kuti mkasimumtendela kandu kalikose kakusakala mwanacejo, nambo nganimumbikanila. Ni tuli m'yisawusyo yeleyi ligongo lya ciwa cakwe.”

²³ Piŵaŵecetanaga gele maloŵega nganamanyililaga kuti Yosefe ŵapikanaga, ligongo ŵaŵecetanaga najo Yosefejo kupitila mwa jwakugopolela.

²⁴ Yosefe ŵatyosile piŵaliji ŵandu ŵala, kuja kumalo gajika kuja kulila, piŵawusile ŵatandite kuŵecetana nawo soni. Nipo ŵamjigele Simiyoni ni kumtaŵa ŵandu ŵosope ali mkulola.

Acalongo acimjakwe ŵa Yosefe akuwujila ku Kenani

²⁵ Yosefe ŵalamwile kuti agumbasye yakulya m'misaku ja ŵandu ŵala, ni kuti soni asiwucisye mbiya syawo m'misaku ja ŵandu ŵala. Ŵalamwile soni kuti ŵape yakulya ya pa ulendo. Ni ŵatendele yindu yosopeyi.

²⁶ Ni ŵatwicile acibulu ŵawo yakulya yila ni kuwutanda ulendo wawo.

²⁷ Nipo jumo jwa ŵandu ŵala piŵagopwele msaku kuti ampe bulu yakulya piŵayice pa cigono, ŵasisimene mbiya syakwe sili kukamwa kwa msaku.

²⁸ Ni ŵatite kwa acalongo acimjakwe ŵala, “Mbiya syangu asiwucisye mu msaku wangu, ngati asi, sili mu msaku wangu.” Ndaŵi jijojo mitima jawo jasupwice, ŵatesile woga mnope, ni ŵatite, “Ana Mlungu atutesile uli uweji?”

²⁹ Piŵayice kwa Yakobo baba ŵawo mcilambo ca Kenani, ŵasalile yosope yiyawonecele pa ulendowo, ni ŵatite,

³⁰ “Nduna jajikulungwa ja cilambo ca Iguputo, jwaŵecete ni uweji mwa ukali, ŵatite kuti uweji tuli ŵandu ŵakusonda cilambo cawoco.

³¹ Nambo uwe twajisalile ndunajo kuti, ‘Uwe tuli ŵandu ŵakulupicika, nganituŵa ŵandu ŵakusonda cilambo.

³² Uwe wosope twapali ŵanace ŵacalume 12, wosope ŵa baba ŵamo, nambo jumo ŵawile, nambo jwamnondi mnopejo asigele ni baba ŵetu ku Kenani.’ ”

³³ Nipo nduna jajikulungwajo jatite, “Kuti manyilile kuti jemanja mli ŵandu ŵakulupicika, jumo mwa jemanja asigale ni une akuno, ŵane mjigale tiligu, mkagape maŵasa genu gagakulaga ni sala kumangwenu.

³⁴ Nipo mpwenu jwamnondijo mkayice najo akuno. Pelepo ni tinjimanyilila kuti kweli jemanja nganimŵa ŵandu ŵakusonda cilambo, nambo mli ŵandu ŵakulupicika. Ni tinjimkoposya mu ukayidi mlongo mjenuju nipo tinjimkunda kutenda malonda mcilambo muno.”

³⁵ Nipo piŵakusulaga yakulya yiyaliji m'misaku jila, mundu jwalijose ŵasimene kuti msaku wakwe wa mbiya, waliji mu msaku wa yakulyawo. Ŵandu ŵala pamo ni baba ŵawo piŵasiweni mbiyasyo, ŵatesile woga.

³⁶ Yakobo baba ŵawo ŵasalile kuti, “Munjigalile kala ŵanace ŵangu: Yosefe ŵapite, Simiyoni nombe najo ni jwele jwapiteju. Lelo ni mkusaka soni munjigalile Benjamini? Yosopeyi yingwilile une!”

³⁷ Lubeni ni ŵasalile baba ŵawo kuti, “Tacawulaga ŵanace ŵangu ŵacalume ŵaŵili naga ngasimbuja najo Benjamini. Ambe une kuti namlolele, mpaka timbuje najo.”

³⁸ Nambo Yakobo ŵajanjile kuti, “Mwanangu ngajawula pamo ni jemanja, pakuŵa mkulugwe ŵawile nipo jwalakwepeju ni jwasigele. Ni naga cindu cilicose cakogoya cili cimgwilile jwalakweju, une munjekulupililemu, tinjiwa ligongo lya canasa.”