Genesesi 41 - Chiyawo Bible

Yosefe akugopolela sagamisi sya Mwenye jwa ku Iguputo

¹ Piyapite yaka yiŵili Mwenye jwa ku Iguputo ŵasagamile ali ajimi mungulugulu Lusulo lwa Nayilo,

² Mlusulomo syacuwice ng'ombe syasikongwe msano ni siŵili syakusalala soni syakwimbala ni syaliji mkulya matete.

³ Ng'ombe syasikongwe sine msano ni siŵili, syakunyalaya soni syaganda mnope syacuwice panyuma pa syandanda sila, syajimi mwakuŵandikana ni sijakwesyo mungulugulu Lusulo lwa Nayilo.

⁴ Ng'ombe syasikongwe syakunyalaya ni syaganda sila syaliji mkusilya ng'ombe syakusalala ni sya kwimbala sila ni Mwenye jwa ku Iguputo ŵajimwice.

⁵ Ŵagonile ni ŵasagamile soni, ŵasagamile masace msano ni gaŵili ga tiligu gali mkutumbuka mu mpesi umo, gali gambone ni ga kwimbala.

⁶ Ni soni masace gane msano ni gaŵili gaganda gamanyale ni mbepo jakungopoko lyuŵa, gamesile panyuma pakwe.

⁷ Masace msano ni gaŵili gamanyale gamisile masace msano ni gaŵili gagaliji gambone ni gakwimbala gala. Nipo Mwenye jwa ku Iguputo ŵajimwice ni ŵamanyilile kuti ŵaliji mkusagamila.

⁸ Pakwacele kundaŵi umi wa Mwenye jwa ku Iguputo waliji ŵakudandawula, nipo ŵatumisye mitenga jakwaŵilanga ŵandu ŵamatipwi ni ŵandu ŵalunda wosope ŵa mu Iguputo. Nipo Mwenye jwa ku Iguputo ŵasalile sagamisi syakwe nambo nganapagwa jwakupakombola kugopolela mate gakwe.

⁹ Nipo jwamkulungwa jwakupelecela finyo jula ŵamsalile Mwenye jwa ku Iguputo kuti, “Lelo tisale yakulemwa yangu.

¹⁰ Pa ndaŵi kimwatutumbilile une ni jwamkulungwa jwakuteleka mikate, mwatuŵisile mu ukayidi m'nyumba ja jwamkulungwa jwa asilikali ŵakulondela.

¹¹ Cilo cimo twasagamile jwalijose sagamisi syakwe, nipo sagamisisyo syakwete kugopolela kwa kulekangana.

¹² M'nyumba ja ukayidijo mwapali mcanda jwa Cihebeli pamo ni uweji, juŵaliji jwamasengo jwa jwamkulungwa jwa asilikali ŵakulondela. Twamsalile sagamisi syetu sila, ni ŵatugopolele mate gakwe, jwalijose mpela mwa sagamisi syakwe.

¹³ Nipo yatendekwe mpela yiŵatite pakutusalila, une mwambucisye pa masengo gangu, mjangu jula mwamwuleje.”

¹⁴ Nipo Mwenye jwa ku Iguputo ŵatumile mundu kuja kukumŵilanga Yosefe. Ŵamkopwesye m'nyumba ja ukayidi mwacitema. Ali amasile kumyola ni kuwala yakuwala yambone ŵapite pameso pa Mwenye jwa ku Iguputo.

¹⁵ Mwenye jwa ku Iguputo ŵamsalile Yosefe kuti, “Une sagamile, nambo pangali jwakupakombola kugopolela mate gakwe. Mbikene kuti naga mli mpikene sagamisi mkusapakombola gopolela mate gakwe.”

¹⁶ Nipo Yosefe ŵamjanjile Mwenye jwa ku Iguputo kuti, “Ngaŵa une, nambo Mlungu ni jutapelece gopolela kwa ŵalakwe pa sagamisi syelesi.”

¹⁷ Mwenye jwa ku Iguputo ŵamsalile Yosefe kuti, “Une sagamile ndili njimi mungulugulu Lusulo lwa Nayilo.

¹⁸ Ng'ombe syasikongwe msano ni siŵili syakwimbala nambo soni syakusalala mnope, syacuwice mu lusulomo, ni kutanda kulya matete.

¹⁹ Ng'ombe syasikongwe sine msano ni siŵili syakunyalaya nambo soni syaganda mnope syacuwice panyuma pa syandanda sila. Une nganinasiwone ng'ombe syasikongwe syakunyalaya nambo soni syaganda mpela syelesyo mcilambo cosope ca Iguputo.

²⁰ Ng'ombe syasikongwe syakunyalaya ni syaganda sila, syalile ng'ombe msano ni siŵili syakwimbala sila.

²¹ Pisyamasile kulya, ng'ombe sila nganisimanyika kuti syalile sijakwe syakwimbala sila pakuŵa syaliji ciŵela ganda mpela musyaŵelele pandanda. Ni najimwice.

²² Ndili ngonile soni nasagamile masace msano ni gaŵili ga tiligu getumbuce soni gekomale cenene gali pa mpesi umo.

²³ Ni nagaweni soni masace gane msano ni gaŵili ga tiligu gaganda, soni gamanyale ni mbepo jakuwuma kungopoko lyuŵa gali gamesile panyuma pakwe.

²⁴ Masace gangalumbana gala gamisile masace msano ni gaŵili gambone gala. Sagamisi syelesi nasalile ŵandu ŵamatipwi nambo nginapakombola kugopolela mate gakwe.”

²⁵ Yosefe ŵamsalile Mwenye jwa ku Iguputo kuti, “Sagamisi siŵili sya Mwenye jwa ku Iguputo kugopolela kwakwe kuli kumpepe, Mlungu amlosisye m'mwejo yakusaka kuti ayitende.

²⁶ Ng'ombe syasikongwe msano ni siŵili syakwimbala, yili yaka msano ni yiŵili. Masace msano ni gaŵili ga tiligu jwambone, yili soni yaka msano ni yiŵili. Sagamisi syosopesi sigopolela cindu cimpepe.

²⁷ Ng'ombe syasikongwe msano ni siŵili syaganda ni syakunyalaya sisyacuwice panyuma sila, nambo soni masace msano ni gaŵili gangali songolo gamanyale ni mbepo jakuwuma kungopoko lyuŵa, yili yaka msano ni yiŵili yasala.

²⁸ Yeleyi yili mpela mumbecetele mula kuti Mlungu amlosisye yindu yitayipanganye.

²⁹ Yikwisa yaka msano ni yiŵili yakutupa yakulya mcilambo cosope ca Iguputo.

³⁰ Yili yipite yaka yeleyo, tiyiciyika soni yaka yine msano ni yiŵili ya sala, ni ŵandu wosope taciyiliŵalila yaka yosope yila ya yakulya yejinji, mcilambo ca Iguputo. Salajo tijicijonanga cilambo.

³¹ Pangali jutaciyikumbucila yaka ya yakulya yejinji, ligongo sala jitijiciyikajo tijiciŵa jakogoya.

³² Pakuŵa ŵalakwe Mwenye jwa ku Iguputo asagamile kaŵili sagamisi simpepe pesyo, yeleyo yikulosya kuti Mlungu ni jwalinganyisye yindu yeleyi, soni tayitende mwangakaŵa.

³³ “Myoyo msagule mundu jwakumanyilila soni jwakwete lunda kuti alolele cilambo cosope ca Iguputo.

³⁴ Msagule soni acakulungwakulungwa ŵitasonjesyeje yakulya mu yaka msano ni yiŵili ya yakulya yejinji mu Iguputo.

³⁵ Mwalamule kuti akayisonganganye yakulya yosope yene yitiyipatikane mu yaka ya yakulya yejinji yayikwisayo. Akawunjice tiligu pasi pa ulamusi wa Mwenye jwa ku Iguputo kuti akayisalasye ni kuyilolela kuti tiyiŵe yakulya ya m'misinda.

³⁶ Yakulya yeleyi tiyiciŵa ngokwe jakuliŵicila cile yaka msano ni yiŵili ya sala jajikwisa mu Iguputo, Pakutenda myoyo, ŵandu ngasawa ni sala mcilambo.”

Yosefe amtesile kuŵa jwakulamula cilambo ca Iguputo

³⁷ Mwenye jwa ku Iguputo ni acakulungwa ŵakwe ŵakamulene nago maloŵega.

³⁸ Jwalakwe ŵawusisye acakulungwakulungwa ŵakwe kuti, “Citumwone kwapi jwine jwamti mpela aju, mundu jwakwete Msimu wa Mlungu?”

³⁹ Mwenye jwa ku Iguputojo ŵatite kwa Yosefe, “Pakuŵa Mlungu am'manyisye yeleyi, pangali mundu jwine jwakumanyilila nambo soni jwalunda mpela m'mwejo.

⁴⁰ M'mwejo ni ŵatimŵe ŵakulamula cilambo cangu. Nipo ŵandu ŵangu wosope tacimpikanila. M'mwejo timŵe ŵaŵili kwa une.”

⁴¹ Jwalakwe ŵamsalile Yosefe kuti, “Une sambano ngumŵika kuŵa ŵakulamula cilambo cosope ca Iguputo.”

⁴² Mwenye jwa ku Iguputo ŵawusile mbete mcala cakwe ni ŵam'wecice Yosefe mcala cakwe. Ŵamŵecice soni mkanjo wa bafuta ni mkufu wa golidi* mlukosi mwakwe.

⁴³ Ŵamkwesisye Yosefe mwigeleta jakwe jaŵili jiŵakwete nipo pakwenda, ŵakumjendesya ŵagumilaga pasogolo pakwe kwasalila ŵandu kuti, “Mtindiŵale!” Myoyo ni ŵamtesile kuŵa jwakulamula cilambo cosope ca Iguputo.

⁴⁴ Mwenye jwa ku Iguputo ŵamsalile Yosefe kuti, “Une ndili Mwenye jwa ku Iguputo pangali mundu jwakupakombola kunyakula mkono atamose lusajo lwakwe mcilambo cosope ca Iguputo naga mkanimlamula m'mwejo.”

^45-46 Mwenye jwa ku Iguputo ŵampele Yosefe lina lya ci Iguputo lya kuti Safenati Paneya. Ŵampele jwamkongwe lina lyakwe Asenati mwanagwawo Potifela jwakutaga mbopesi jwa ku Oni, kuti amlombe. Nipo Yosefe ŵaliji mkwenda mcilambo cosope ca Iguputo. Yosefe ŵaliji ni yaka 30 piŵatandaga kumtumicila Mwenye jwa ku Iguputo. Yosefe ni ŵaliji mkwendajenda mcilambo cosope ca Iguputo.

⁴⁷ Yaka msano ni yiŵili ya yakulya yejinji, cilambo casogwesye yakulya yejinji.

⁴⁸ Nipo ŵayisonganyaga yakulya yosope ya yaka msano ni yiŵili yiyapali mcilambo ca Iguputo, ni ŵayisunjile mu msinda uliwose. Yakulya ya m'migunda ja kusyungulila msinda uliwose ŵayisunjile mu msinda uwowo.

⁴⁹ Yosefe ni ŵiŵasonganyaga yakulya winji wakwe mpela mcenga mungulugulu nyasa, mpaka ŵalesile kuyipima.

⁵⁰ Mkaniyiyice yaka ya sala Yosefe ŵakwete ŵanace ŵaŵili, ŵiŵamŵelecele Asenati mwanagwawo Potifela jwakutaga mbopesi jwa ku Oni.

⁵¹ Yosefe ni ŵamkolasile mwanace jwandanda kupagwa lina lyakwe Manase pakuŵa ŵatite, “Mlungu andiŵesye yisawusyo yangu yosope yila, soni ni liŵasa lya baba ŵangu.”

⁵² Mwanace jwaŵili ŵamkolasile lina lyakwe Efelemu pakuŵa ŵatite, Mlungu ambele kuŵeleka ku cilambo cakulaga kwangu.

⁵³ Yaka yakutupa yindu yakulya msano ni yiŵili mcilambo ca Iguputo yamasile.

⁵⁴ Ni yayice yaka msano ni yiŵili ya sala mpela muŵaŵecetele Yosefe. Mwaliji mwana sala m'yilambo yosope, nambo mcilambo ca Iguputope ni kuyaliji yakulya.

⁵⁵ Pa ndaŵi jijajinjile sala mcilambo cosope ca Iguputo, ŵandu ŵamlililaga Mwenye jwa ku Iguputo kuti ŵape yakulya, Mwenye jwa ku Iguputo ŵasalile ŵandu wosope ŵa ku Iguputowo kuti, “Mjawule kwa Yosefe, yili yose yitakamlamule kutenda, mkayitende yindu yeleyo.”

⁵⁶ Sala jakusile ni jajenele cilambo cosope, Yosefe ni ŵawugwile ngokwe syosope ni ŵasumisyaga ŵandu ŵa ku Iguputo.

⁵⁷ Ŵandu ŵa yilambo yosope ŵaliji mkwika ku Iguputo kuti asume yakulya kwa Yosefe, pakuŵa sala jajenele cilambo cosope capasi.