Genesesi 40 - Chiyawo Bible

Yosefe akugopolela sagamisi sya acikayidi

¹ Pali papite ndaŵi, mundu jwakupelecela finyo pamo ni mundu jwakuteleka mikate ku nyumba ja Mwenye jwa ku Iguputo, ŵamlemwecesye Mwenye jwa ku Iguputojo.

² Mwenye jwa ku Iguputo ŵatumbilile mnope ŵamasengo ŵakwe ŵaŵiliŵa.

³ Ni ŵaŵisile m'nyumba ja ukayidi muŵaliji Yosefe mula. Ŵaŵisile jemanjajo m'myala mwa jwamkulungwa jwa asilikali ŵakulondela nyumba ja mwenye jula.

⁴ Jwamkulungwa jwa asilikali ŵakulondela jula ŵamsagwile Yosefe kuti ŵasamalileje ŵandu ŵaŵiliwo ni kwalonda. Ŵatemi ndaŵi jajilewu mu ukayidimo nipo Yosefe ŵaliji mkwatumicila.

⁵ Cilo cine ŵandu ŵaŵili ŵala, jwakupelecela finyo jula ni jwakuteleka mikate, ŵasagamile jwalijose sagamisi syakwe. Kugopolela kwa sagamisi syawo kwaliji kwakulekangana

⁶ Piŵayice Yosefe kundaŵi, ŵasiweni pa ngope syawo kuti ŵaliji ŵakudandawula.

⁷ Ni ŵawusisye kuti, “Ligongo cici mkuwoneka ŵakudandawula lelo?”

⁸ Wosopewo ŵajanjile kuti, “Uwe tusagamile sagamisi ciloci, nipo pangali mundu jwakutugopolela mate gakwe.” Yosefe ŵasalile kuti, “Mlungu jika ni jwakusapeleka lunda lwa kugopolela sagamisi. Musalile yimsagamile.”

⁹ Myoyo mundu jwa kupelecela finyo jula ŵatandite kusala sagamisi syakwe, ŵatite, “Une sagamile ndili mkuciwona citela ca mpeleya,

¹⁰ uli ukwete nyambi sitatu. Masamba gakwe gali nasipukape, papopo gawonece maluŵa, panyuma pakwe pawonece soni yisogosi ya mpeleya yejiwu.

¹¹ Mgawo wa Mwenye jwa ku Iguputo waliji m'myala mwangu, une naliji mkaŵa yisogosi ya mpeleyayo ni kuyiminyila mu mgawo, ni napelece kwa mgawowo kwa Mwenye jwa ku Iguputo.”

¹² Yosefe ni ŵatite, “Aku ni kugopolela kwakwe: nyambi sitatusyo gali masiku gatatu,

¹³ patigamale masiku gatatu Mwenye jwa ku Iguputo tamkululucile, ni kumwucisya soni pa masengo genu. Timkapelecele mgawo myala mwa Mwenye jwa ku Iguputo mpela yimwatendaga pimwaliji jwamkulungwa jwakupelecela mgawo wakwe.

¹⁴ Nambo mkangumbucile une naga yindu yikamjendele cenene, soni conde mkambecetele kwa Mwenye jwa ku Iguputo kuti mungamucisye kuti ngopoce une m'nyumba ja ukayidi muno.

¹⁵ Unetu ŵatesile kunjiŵa, ni ŵayice ni une akuno kutyocela ku cilambo ca Ahebeli. Soni atamose akuno, nganindenda kandu kakulemwa ka mpaka kumbugalila nako mu ukayidi.”

¹⁶ Jwamkulungwa jwakuteleka mikate jula piŵayiweni kuti gopolela kwa sagamisi sya mjawo jula kwaliji kwambone, jwalakwe nombe ŵamsalile Yosefe kuti, “Une soni sagamile ndili ndwicile mbeta sitatu sya mikate pa mtwe pangu.

¹⁷ Mlupeta lwa pacanya, mwaliji mwana mikate jakulekanganalekangana ja Mwenye jwa ku Iguputo, nipo yijuni yaliji mkulya mikate jijaliji mlupeta pa mtwe pangu.”

¹⁸ Yosefe ŵajanjile kuti, “Aku ni gopolela kwakwe: mbeta sitatusyo, gali masiku gatatu.

¹⁹ Pitigamale masiku gatatu Mwenye jwa ku Iguputo tacimgopola ni kuwukata mtwe wenu. Cilu cenu tacicikoleka mcitela nipo yijuni tiyicilya mnowu wenu.”

²⁰ Lisiku lyatatu, lyaliji lyakukumbucila kupagwa kwa Mwenye jwa ku Iguputo. Mwenye jwa ku Iguputo ŵalinganyicisye cindimba ŵamasengo ŵakwe. Ŵagopwele acakulungwa ŵaŵili ŵala, jwakupelecela mgawo ni jwakuteleka mikate, ni ŵajigalile pameso pa ŵandu ŵakwe.

²¹ Ni ŵamwucisye jwamkulungwa jwa jwakupelecela finyo ula pa masengo gakwe. Ŵatandite kupelecela finyo m'myala mwa Mwenye jwa ku Iguputo.

²² Nambo jwamkulungwa jwakuteleka mikate ŵamkolece mcitela, yatendekwe mpela muŵaŵecetele Yosefe.

²³ Nambo jwamkulungwa jwakupelecela mgawo nganamkumbucila Yosefe, ŵamliŵalile.