Genesesi 4 - Chiyawo Bible

Kayini ni Abele

¹ Adamu* ŵatemi malo gamo ni Hawa ŵamkwakwe, nipo ŵamkwawowo ŵakwete cilu, ni ŵaŵelece mwanace jwamlume, ni ŵatite, “Mbocele mwanace jwamlume mwa cikamucisyo ca AMBUJE.”* Myoyo mwanacejo ŵampele lina lyakwe Kayini.

² Panyuma pakwe ŵaŵelece soni mwanace jwine jwamlume lina lyakwe Abele, mpwakwe jwa Kayini. Piŵakusile, Abele masengo gakwe galiji gakucinga ngondolo, nambo mkulugwe jula Kayini ŵaliji mnamalima.

³ Pali papite ndaŵi, Kayini ŵajigele yisogosi yine ya kumgunda, ni ŵayitasile mbopesi kwa AMBUJE.

⁴ Abele nombe nawo ŵajigele mwanace jwandanda kupagwa mwa jimo ja ngondolo syakwe, ni ŵajipelece mbopesi kwa AMBUJE, pamo ni mawuta gakwe. Mlungu ŵasangalele ni Abele, ni ŵajipocele mbopesi jakwe.

⁵ Nambo AMBUJE ngananonyelwa najo Kayini, ni nganajipocela mbopesi jakwe. Ligongo lya yeleyi Kayini ŵatumbile mnope, kwakuti ngope jakwe jaliji jakugwa ni jakwete sinya.

⁶ Nipo AMBUJE ŵamwusisye Kayinijo kuti, “Ana mtumbilile cici camti myiyi? Ligongo cici ngope jenu jili jakugwa?

⁷ Mkaŵe kuti mtasile mbopesi jenu mwakwenelela, une ngajipocele. Nambo ligongo lyakuti mtesile yakusakala, ulemwa ukusamgwaŵilila pa mlango penu kusosa kuti umlamulile, nambo m'mwejo mwupunde ulemwawo.”*

⁸ Lisiku line Kayini ŵamsalile Abele mpwakwe kuti, “Kwende tukajendejende.” Ali ayice kumalo gaŵaŵilipe, Kayini ŵamjimucile mpwakwe jula Abele ni ŵamwuleje.

⁹ AMBUJE ŵamwusisye Kayini kuti, “Ana mpwenu Abele ali kwapi?” Jwalakwe ŵajanjile kuti, “Ngangumanyilila, ana gali masengo gangu gakumlolela mpwanga?”

¹⁰ AMBUJE ni ŵamwusisye soni kuti, “Ana cimtesileci ni cici? Miasi ja mpwenu jikundilila une kutyocela mwitaka.

¹¹ Sambano m'mwejo mli ŵakulweseka. Ngasimlima soni pa litakali lyalijinjile miasi ja mpwenu, jele jimjikopwesye ni makono genu pakumwulaga.

¹² Patimlimeje mbeju, litaka ngasilimpa m'mwejo yagowola yiliyose. Nipo timŵe mundu jwagamba kwendajenda, jwakusoŵa pakutama pa cilambo capasi.”

¹³ Kayini ŵatite kwa AMBUJE, “Cilango celeci cikusile mnope, kugapunda macili gangu.

¹⁴ Sambano mundopwele une pa cilambo acino ni pameso penu. Timbe mundu jwakutilatila pa cilambo capasi, jwalijose jwakusimana une, tacimbulaga.”

¹⁵ Nambo AMBUJE ŵamjanjile kuti, “Ngaŵa myoyo! Jwalijose jutamwulaje m'mwejo Kayini, tacipocela cilango cacikulungwa, une tinjimwucisya mundujo kasano ni kaŵili.” Myoyo AMBUJE ŵaŵisile cilocesyo pa Kayini kuti mundu jwalijose jwakumsimana Kayini akusamwulaga.

¹⁶ Myoyo Kayini ŵatyosile pameso pa AMBUJE kuja kutama ku cilambo ca Nodi, kungopoko lyuŵa kwa Edeni.

Yisukulu ya Kayini

¹⁷ Kayini ŵatemi malo gamo ni ŵamkwakwe, nipo jwamkongwejo ŵakwete cilu ni ŵaŵelece mwanace jwamlume, juŵampele lina lyakwe Enoki. Kaneko Kayini ŵataŵile msinda ni ŵawupele lina lya mwanagwe jwamlume jula Enoki.

¹⁸ Enoki ŵakwete mwanace jwamlume lina lyakwe Iladi. Iladi ŵakwete mwanace lina lyakwe Mehuyaele. Mehuyaele ŵakwete mwanace lina lyakwe Metusaele. Metusaele ŵakwete mwanace lina lyakwe Lameki.

¹⁹ Lameki ŵalombele acakongwe ŵaŵili, Ada ni Sila.

²⁰ Ada ŵaŵelece Yabali jwali nangolo jwa mtundu wa ŵandu ŵakulanga yilangwa, ni ŵakutama m'ma tenti.

²¹ Mpwakwe lina lyakwe ŵaliji Yubali, juŵaliji nangolo jwa ŵandu ŵakwimba yida yakwimbila ya ngonji ni citolilo.

²² Sila ŵaŵelece Tubali Kayini. Jwalakweju ni nangolo jwa ŵandu ŵakukamula masengo gakusyana kopa* ni yisyano. Mlumbugwe jwa Tubali Kayini ŵaliji Naama.

²³ Lisiku line Lameki ŵasalile aciŵamkwakwe kuti, “M'mwe Ada ni m'mwe Sila pikanicisyani maloŵe gangu. Une mbuleje mundu ligongo ŵambulesye, namwuleje mcanda jwele juŵambutile.

²⁴ Naga mundu jwakumwulaga Kayini akumwucisya kasano ni kaŵili, ni kuti mundu jwakumbulaga une Lameki tacimwucisya kwakwanila 77.”

Kupagwa kwa Seti ni Enoshi

²⁵ Adamu ŵatemi soni malo gamo ni ŵamkwawo, nipo ŵakwete cilu ni ŵaŵelece mwanace jwamlume. Hawa ŵatite, “Mlungu ambele mwanace jwine jwakwinjila m'malo mwa Abele, juŵawulajidwe ni Kayini.” Mwanacejo ŵampele lina lyakwe Seti.

²⁶ Seti ŵakwete mwanace jwamlume juŵampele lina lyakwe Enoshi. Ndaŵi jeleji ni jiŵatandite ŵandu kulilumba lina lya AMBUJE m'mapopelo gawo.