Genesesi 39 - Chiyawo Bible

Yosefe ni ŵamkwawo Potifala

¹ Aishimaeli ŵamjigele Yosefe kuja najo ku Iguputo, ni ŵamsumisye kwa Potifala jwa mtundu wa ci Iguputo, juŵaliji nduna ja Mwenye jwa ku Iguputo soni jwamkulungwa jwa asilikali ŵakulondela nyumba ja mwenyejo.

² AMBUJE* ŵaliji ni Yosefe nipo ŵamkamucisye kuyitenda yindu yosope cenene. Ŵaliji mkutama m'nyumba ja ambuje ŵakwe ŵa ci Iguputo ŵala.

³ Ambuje ŵakwe ŵala ŵayiweni kuti AMBUJE ali najo Yosefe ni kuti soni ŵayipele upile yindu yosope yiŵapanganyaga.

⁴ Potifala ŵamnonyele Yosefe, pakumwona yiŵatiji pakutumicila cenene. Myoyo ŵamŵisile kuŵa kapitawo jwa m'nyumba mwakwe, ni soni jwamkulungwa jwakulolela cipanje cakwe cosope ca m'nyumba mwakwe.

⁵ Kutandila lisiku liŵatandite Yosefe kulolela yindu ya yosope ya m'nyumba ja Potifalajo, AMBUJE ŵayipele upile yindu yosope ya mu Iguputojo, kutandila yindu yakwe ya m'nyumba mpaka ni ya ku migunda yakwe, ligongo lya Yosefe.

⁶ Myoyo Potifala ŵayiŵisile yindu yosope yiŵakwete m'myala mwa Yosefe, kuti aloleleje ni kuyilamulila. Ni pangali yiŵaŵusyaga, akaŵe yakulya yiŵalyaga. Yosefe ŵapali ni cilu cambone nipo soni ŵaliji ŵakusalala.

⁷ Pali papite ndaŵi ŵamkwawo ambujegwe ŵatandite kumkumbila Yosefe. Nipo jwamkongwejo ŵamsalile Yosefe kuti, “Uli mgone ni une?”

⁸ Yosefe ŵakanile, ŵamsalile kuti, “Mlole, ambuje ŵangu ngakusaganicisya kandu kalikose ka m'nyumba muno, ligongo lyakuti une ngutenda masengo gangu cenene m'nyumba muno. Ŵambisile kuŵa kapitawo jwakulolela yindu yawo yosope.

⁹ Nipo ulamusi wa yindu yosope ya m'nyumba muno, uli m'myala mwangu, mpela mwakolele asyene. Soni pangali ciŵandekasisye une kucitendela masengo, akaŵe ŵalakwe, ligongo ali ŵamkwawo. Sambano mpaka yikombolece uli kuti une ndende cindu cangalumbana mpela celeci, ni kumlemwecesya Mlungu?”

¹⁰ Atamose kuti jwamkongwejo ŵaliji mkuŵeceta maloŵe ga kumnyenga Yosefe lisiku ni lisiku, nambo Yosefe nganakunda kuti agone najo.

¹¹ Nambo lisiku line Yosefe ŵajinjile m'nyumba kuti akapanganye masengo gakwe, nipo mwaliji mwangali ŵamasengo ŵane m'nyumbamo.

¹² Ŵamkwawo Potifala ŵamkamwile Yosefe cakuwala cakwe ni ŵatite, “Mgone ni une basi.” Nambo ŵalikulupwile ni kutilila pasa, ŵajilesile nguwo jila myala mwa jwamkongwejo.

¹³ Piŵayiweni kuti Yosefe alesile nguwo jakwe m'myala mwakwe ni kutilila pasa,

¹⁴ ŵaŵilasile ŵamasengo ŵacalume ŵa m'nyumba mwakwe ni ŵatite, “Myiweni yindu ayi, mundu jwa Cihebeli jwayice najo ŵamkwangu ku nyumba kuno atujalwisye, ŵajinjile kucipinda cangu cagona, ni anyenjileje kuti mgone ni une. Nambo nagumisile mnope.

¹⁵ Piŵakupikene kugumila kwanguko ajilesile nguwo jakwe ni une ni kutilila pasa.”

¹⁶ Ŵajisalesye nguwo jila kulindilila mpaka piŵayice ambuje ŵa Yosefe ku nyumba.

¹⁷ Piŵayice ambujewo, ŵamsalile soni ngani josope jene jila, kuti, “Jwakutumicila jwenu jwa mtundu wa Cihebeli jula, jumwayice najo m'nyumba munoju, ŵajinjile kucipinda cangu cagona kukundenda cipongwe.

¹⁸ Nambo pinagumisile, ŵajilesile nguwo jakwe pakuŵandikana ni une ni kutilila pasa.”

¹⁹ Bwana jwakwe ŵapile mtima piŵagapikene maloŵe gaŵaŵecete ŵamkwawo ga kuti, “Yeleyi ni yandendele une jwakutumicila jwenu.”

²⁰ Ndaŵi jijojo ŵamtaŵisye Yosefe, ni ŵajile kuja kumwugalila m'nyumba jiŵasunjilaga akayidi ŵa mwenye, ni ŵaliji mkutama mwelemo.

²¹ Nambo AMBUJE ŵaliji najo Yosefe, nipo ŵampele upile, kwakuti mpaka ŵakulolela acikayidi ŵamnonyele Yosefe.

²² Jwamkulungwa jwakulolela akayidi ŵamsagwile Yosefe kuŵa jwakulolela acikayidi acimjakwe, ni kulolela yitendo yosope yakutendekwa m'nyumba ja ukayidi.

²³ Jwamkulungwa jwa akayidi nganalolela kandu kalikose kakaliji m'myala mwa Yosefe, ligongo AMBUJE ŵaliji najo Yosefe. Pa cindu cilicose ciŵapanganyaga Yosefe, AMBUJE ŵacipaga upile.