Genesesi 36 - Chiyawo Bible

Yisukulu ya Esawu

¹ Ayi ni yisukulu ya Esawu juŵaŵilanjidwaga soni kuti Edomu.

² Esawu ŵalombele acakongwe ŵa ci Kenani ŵatatu aŵa: Ŵandanda ŵaliji Ada mwanace jwamkongwe jwa Eloni ŵa mtundu wa Cihiti, ŵaŵili ŵaliji Oholibama mwanace jwamkongwe jwa Ana cisukulu cacikongwe ca Sibiyoni jwa Cihifi,

³ ŵatatu ŵaliji Basemati, uŵaliji mwanace jwamkongwe jwa Ishimaeli soni mlumbugwe jwa Nebayoti.

⁴ Ada ŵamŵelecele Esawu lina lyakwe Elifasi, Basemati ŵaŵelece Leuwele.

⁵ Nipo Oholibama ŵaŵelece Yeushi, Yalamu, ni Kola. Aŵa ni ŵanace ŵacalume ŵa Esawu ŵiŵapagwile mcilambo ca Kenani.

⁶ Esawu ni ŵajigele aciŵamkwawo ni ŵanace ŵawo, ni ŵandu wosope ŵa pa mlango pawo, pamo ni yilangwa yawo yosope ni yipanje yawo yosope yiŵapatile ku Kenani, ni kwawula kuja kutama ku cilambo cine, kutalicilana ni Yakobo* mlongo mjawo.

⁷ Ŵatesile yeleyi ligongo cilambo ciŵatamaga pamo ni Yakobo nginicakwanilaga, pakuŵa ŵakwete yilangwa yejinji ŵanaŵaŵili.

⁸ Myoyo Esawu, jwakolanjidwa soni Edomu, ŵajile kutama mcilambo ca matumbi ca Seyili.

⁹ Ayi ni yisukulu ya Esawu nangolo jwa ŵa Edomu mcilambo ca matumbi ca Seyili.

¹⁰ Aga ni mena ga ŵanace ŵacalume ŵa Esawu, Elifasi, jwakupagwa mwa Ada, Leuwele jwakupagwa mwa Basemati.

¹¹ Ŵanace ŵa Elifasi ŵaliji, Temani, Omali, Sefi, Gatamu ni Kenasi.

¹² Timuna ŵiŵaliji ŵamkwawo ŵanondi ŵa Elifasi, ŵaŵelece Amaleki.

¹³ Aŵa ni ŵaliji ŵanace ŵacalume ŵa Leuwele, Nahati, Sela, Shama, ni Misa; jemanjaji ni ŵanace ŵa Basemati ŵamkwakwe Esawu.

¹⁴ Ŵakwawo Esawu ŵane lina lyawo ŵaliji Oholibama, mwanace jwa Ana ŵamŵelecele Esawujo ŵanace ŵacalume aŵa, Yeushi, Yalamu ni Kola. Ana ŵaliji mwanace jwa Sibiyoni.

¹⁵ Aŵa ni acayimwene ŵa yisukulu ŵa Esawu. Mwa ŵanace ŵa Elifasi mwanace jwandanda jwa Esawu, ŵapali acayimwene aŵa. Temani, Omali, Sefi, Kenasi,

¹⁶ Kola, Gatamu ni Amaleki. Ŵeleŵa ŵaliji acayimwene ŵakupagwa mwa Ada mwanace jwa Elifasi. Ŵakupagwila mcilambo ca Edomu.

¹⁷ Mwanace jwine jwa Esawu, lina lyakwe Leuwele, ŵaŵelece acayimwene aŵa mcilambo ca Edomu; Nahati, Sela, Shama, ni Misa. Wosopeŵa ŵaliji alukusyo ŵa Basemati kupitila mwa Leuwele mwanagwawo.

¹⁸ Ŵamkwawo Esawu, Oholibama mwanace jwamkongwe jwa Ana ŵamŵelecele Esawujo ŵanace aŵa ŵiŵaliji acayimwene: Yeushi, Yalamu, ni Kola.

¹⁹ Ayi ni yisukulu ya Esawu ŵiŵamanyikaga soni ni lina lyakuti Edomu ni acayimwene ŵawo.

Yisukulu ya Seyili

^20-21 Aŵa ni ŵanace ŵacalume ŵa Seyili jwa mtundu wa Ciholi, alukosyo ŵa cilambo ca Edomu ŵiŵaliji soni acayimwene: Lotani, Shobali, Sibiyoni, Ana, Dishoni, Esele, ni Dishani. Jemanjaji ni ŵiŵaliji acayimwene ŵa ŵandu ŵa mtundu wa Ciholi ŵanace ŵa Seyili mcilambo ca Edomu.

²² Ŵanace ŵa Lotani ŵaliji: Holi ni Hemani. Lotani ŵakwete mlumbugwe lina lyakwe Timuna.

²³ Aŵa ŵaliji ŵanace ŵa Shobali: Alifani, Manahati, Eba, Shepo ni Onamu.

²⁴ Aŵa ni ŵaliji ŵanace ŵa Sibiyoni: Ayiya ni Ana. (Ana ŵeleŵa ni ŵiŵasimene nduluko ja mesi ga moto mcipululu alimkucinga abulu ŵa babagwe).

^25-26 Ana ŵaliji babagwe Dishani, ŵele uŵaliji nangolo jwa maŵasa ga Hemudani, Eshibani, Itilani ni Kelani. Ana ŵakwete mwanace jwamkongwe jwakolanjidwa Oholibama.

²⁷ Aŵa ni ŵanace ŵa Esele: Bilihani, Safani ni Akani.

²⁸ Dishani ŵaliji nangolo jwa maŵele ga Usi ni Alani.

^29-30 Ayimwene ŵa mtundu wa Aholi ni aŵa: Lotani, Shobali, Sibiyoni, Ana, Dishoni, Esele ni Dishani. Ŵeleŵa ni acayimwene ŵa ŵandu ŵa mtundu wa Aholi mwa mitundu jawo jakulekanganalekangana mcilambo ca Seyili.

Ayimwene ŵa ku Edomu

^31-39 Aŵa ni acayimwene ŵiŵalamulile cilambo ca Edomu Aisalaeli mkanakole mcimwene: Bela mwanace jwamlume jwa Bewoli jwa ku Dinihaba Piŵawile Bela, Yobabu mwanace jwa Sela jwa ku Bosila ŵajinjile ucimwenewo Yobabu ali awile, Hushamu jwa ku cilambo ca Temani, ŵajinjile ucimwenewo Ali awile Hushamu, Hadadi mwanace jwa Bedadi, ŵajinjile ucimwenewo (jwalakweju ni juŵapundile Amidiyani pa ngondo mcilambo ca Mowabu) Hadadi piŵawile, Samula jwa ku Masileka ni juŵajinjile ucimwenewo Samila piŵawile, Shaulo jwa ku Lehoboti, mungulugulu Lusulo lwa Yufuleti, ŵajinjile ucimwenewo Shaulo piŵawile, Baala Hanani mwanace jwa Akiboli ŵajinjile ucimwenewo Baala Hanani ali awile, Hadala ŵajinjile ucimwenewo, lina lya msinda wakwe waliji Afiti (lina lya ŵamkwakwe lyaliji Mehetabele mwanace jwamkongwe jwa Matiledi ni cisukulu ca Mesahabu)

^40-43 Aga ni mena ga acayimwene ŵakutyocela mwiŵasa lya Esawu juŵaliji nangolo jwa ŵandu ŵa mtundu wa Edomu: Timuna, Alifa, Yeteti, Oholibama, Ela, Pinoni, Kenasi, Temani, Mibisala, Magidiyele, ni Ilamu. Yilambo yiŵatemi acayimwene ŵeleŵa ni ŵandu ŵawo yaŵilanjidwaga ni mena gawogo.