Genesesi 35 - Chiyawo Bible

Mlungu akumpa upile Yakobo ku Beteli

¹ Myoyo Mlungu ŵamsalile Yakobo* kuti, “Nyakukani citemacitema, mjawule ku Beteli, mkatameje kweleko. Mkataŵe kweleko malo gakupelecela mbopesi kwa une, Mlungu jwenu junamwonecele pa ndaŵi jimwatilaga Esawu akulu ŵenu.”

² Myoyo Yakobo ŵalisalile liŵasa lyakwe ni ŵandu wosope ŵiŵaliji nawo kuti, “Mjase milungu ja ŵandu* ŵa mitundu jine jimli najo. Mliswejesye, nipo m'wale yakuwala yecape.

³ Uweji citutyoce akuno kwawula ku Beteli, kwele kutingataŵe malo gakupelecela mbopesi kwa Mlungu juŵangamucisye une mu ndaŵi ja yisawusyo yangu. Jwalakwejo ni Mlungu juŵaliji ni une kulikose kunaliji.”

⁴ Myoyo, ŵanace ŵakwe ŵapelece kwa Yakobo milungu josope ja ŵandu ŵa mitundu jine* jiŵakwete, kwisa soni ndolo siŵawalaga m'mapikanilo gawo. Yindu yosopeyo Yakobo ŵayisilile pasi pa citela ca mtundu, ciŵandika ni musi wa Shekemu.

⁵ Pa ndaŵi jele Yakobo ni ŵanace ŵakwe ŵatyokaga, Mlungu ŵatendesye ŵandu wosope ŵa misinda jakusyungulila kola woga, myoyo nganiŵakuya.

⁶ Yakobo pamo ni ŵandu ŵiŵaliji nawo ŵala ŵayice ku Lusi, malo gagakumanyika soni ni lina lyakuti Beteli, mcilambo ca Kenani

⁷ Ŵataŵile malo gakupelecela mbopesi kweleko, ni malogo ŵagapele lina lyakuti Mlungu jwa ku Beteli, Ligongo pa gele malogo Mlungu ni kuŵalilosisye kwa Yakobo pa ndaŵi jiŵamtilaga mkulugwawo.

⁸ Debola jwamasengo jwamkongwe jwa Labeka ŵawilile pelepo nipo ŵamsicile pasi pa citela ca mtundu, ku mwela kwa Beteli. Myoyo ŵacipele citela cila lina lyakuti “Citela ca Malilo.”

⁹ Yakobo ali awusile ku Mesopotamiya kula, Mlungu ŵamwonecele soni ni ŵampele upile.

¹⁰ Mlungu ni ŵatite, “Lina lyenu lili Yakobo, nambo kutandila lelo lina lyenu tiliŵe Isalaeli.” Myoyo ŵatandite kolanjidwa ni lina lyeleli.

¹¹ Nipo Mlungu ŵatite kwa Yakobo, “Une ndili Mlungu Jwamaciligosope, Mkole ŵanace ŵajinji. Mitundu jakulekanganalekangana tijicikopoka mwenumwe. M'mwejo timciŵa nangolo jwa ayimwene.

¹² Cilambo cinacipelece kwa Abulahamu* ni Isaki tinacipelece kwa m'mwejo, nambo soni tinjicipeleka kwa yisukulu yenu ŵitacipagwa pasogolo penu.”

¹³ Mlungu ŵatyosile ni kumleka Yakobo pa malo giŵaŵecetelaga najo gala.

¹⁴ Yakobo ni ŵajigele liganga ni kuliŵika pelepo kuti liŵe cikumbukumbu. Ni ŵatasile mbopesi ja cakumwa pegangapo. Ŵalikonjile soni liganga lila mawuta.

¹⁵ Yakobo ŵagapele lina lyakuti Beteli malo gaŵaŵecetene ni Mlungu gala.

Ciwa ca Lakelo

¹⁶ Myoyo Yakobo ni liŵasa lyakwe lyosope ŵatyosile ku Beteli, nambo mkanayice ku Efulati ndaŵi jakuti Lakelo akole mwanace jakwanile, nambo kuŵeleka kwakwe kwamsawisye mnope.

¹⁷ Yisawusyo yili yiyice pakusakala mnope, jwamkongwe jwakamucisya pa kuŵeleka ŵatite kwa Lakelo, “Mkajogopa, pakuŵa sambano timkole mwanace jwine jwamlume.”

¹⁸ Nambo Lakelo ŵaliji mkuwa, mkanamalicice, ŵampele mwanace jula lina lyakwe Beni Oni. Nambo Yakobo ŵampele mwanace jula lina lyakwe Benjamini.

¹⁹ Lakelo piŵawile ŵamsicile mwilembe mungulugulu litala lyakuja ku Efulati, kwele sambano kukuŵilanjidwa lina lyakuti Betelehemu.

²⁰ Nipo Yakobo ŵaŵisile liganga lya cikumbukumbu, pacanya pa lilembe lya Lakelo. Ligangalyo lili ciŵela pa malopo mpaka lelo.

²¹ Yakobo ŵapitilisye ulendo wakwe ni ŵajile kutaŵa masakasa gawo ali napundape sanja ja ku Edele.

Ŵanace ŵa Yakobo

²² Yakobo ali mkutama mcilambo celeco, Lubeni ŵagonile ni Biliha ŵamkwawo ŵanondi ŵa baba ŵawo, nipo Yakobo ŵayipikene yeleyo. Yakobo ŵakwete ŵanace 11.

²³ Aŵa ni ŵanace ŵiŵapali mwa Leya. Lubeni mwanace jwandanda jwa Yakobo, Simiyoni, Lefi, Yuda, Isakala ni Sebuloni.

²⁴ Ŵanace ŵa Yakobo ŵiŵapali mwa Lakelo ni, Yosefe ni Benjamini.

²⁵ Ŵanace ŵiŵapali mwa Biliha jwamasengo jwamkongwe jwa Lakelo ŵaliji, Dani ni Nafutali.

²⁶ Ŵanace ŵiŵapali mwa Silipa jwamasengo jwamkongwe jwa Leya ŵaliji, Gadi ni Asha. Aŵa ni ŵiŵaliji ŵanace ŵacalume ŵa Yakobo ŵiŵapagwile ku Mesopotamiya.

Ciwa ca Isaki

²⁷ Yakobo ŵapite ku Mamule, malo gagakuŵilanjidwa soni kuti Hebuloni kuŵaliji Isaki baba ŵawo, malo giŵatemiko Abulahamu ni Isaki.

²⁸ Isaki ŵatemi yaka 180,

²⁹ ŵawile ali acekulwipe kwejinji ŵanace ŵawo Esawu ni Yakobo ŵasicile mwilembe.