Genesesi 34 - Chiyawo Bible

Shekemu akumkamulila Dina

¹ Lisiku line Dina mwanace jwamkongwe jwa Yakobo* jwakupagwa mwa Leya, ŵajile kuja kunguluka ni acakongwe ŵane ŵa mcilambo ca Kenanico.

² Pa ndaŵi jele Shekemu mwanace jwa Hamoli, jwa mtundu wa Ahifi, juŵaliji mwenye jwa cilambo ca mbali jelejo, piŵam'weni Dina kuti ali jwakusalala, ŵamkamwile ni kumwuta, nipo ŵamkamulile.

³ Shekemu ŵamnonyele Dina kwejinji, ni ŵalinjile kumtondoya jwalakwejo pakumsalila kuti akumnonyela mnope.

⁴ Myoyo, Shekemu ŵajile kwasalila Hamoli babagwe, kuti, “Baba, ngusosa anjigalile mwaliju kuti aŵe ŵamkwangu.”

⁵ Ndaŵi jeleji Yakobo ŵaliji ali apikene kuti Dina mwanace jwakwe jwamkongwe Shekemu amkamulile. Nambo pakuŵa ŵanace ŵakwe ŵacalume ŵaliji kwitinji kukulisya yilangwa, jwalakwe nginatenda kandu kalikose, ŵaliji mkwalindilila jemanjajo kuti awuje kaje.

⁶ Hamoli, baba ŵawo Shekemu, ŵamjigele mwanagwawojo ni ŵalongene najo kwa Yakobo kuja kuŵecetana nawo.

⁷ Ndaŵi aji ŵanace ŵacalume ŵa Yakobo ŵala ŵaliji ali nawujape kutyocela kukulisya yilangwa kula. Ŵanacewo ŵajipikene ngani jila nipo ŵapile mtima kwejinji. Yanyaleye kwejinji pakupikana kuti Shekemu atesile cindu camti myoyo, kwatendela cipongwe Aisalaeli pakumkamulila Dina.

⁸ Hamoli ŵatite kwa Yakobo, “Mwanangu Shekemu amnonyele mwanagwenu jwamkongwe, conde mumkunde kuti amlombe mwanagwenujo.

⁹ Ŵandu ŵetu alombaneje, mtupeje ŵanace ŵenu ŵacakongwe kuti twalombeje, uwe soni citumpe ŵanace ŵetu ŵacakongwe kuti mwalombeje.”

¹⁰ Kwende tutameje pamo mcilambo mwetu muno. Mtameje palipose patipamnonyele, mtendeje malonda ni kola yipanje mumkusacila.

¹¹ Shekemu ni ŵatite kwa baba ŵawo Dina ni acalumbugwe ŵala kuti, “Conde mungunde kuti namlombe mwaliju, nipo une timbelece cilicose citimundamule.

¹² Musalile mbote jimkusaka kwisa soni mbiya syakulowolela. Une tinjipeleka cilicose citimundamule bola mungunde kuti namlombe mwaliju.”

¹³ Nambo ŵanace ŵa Yakobo ŵamjanjile Shekemu pamo ni baba ŵawo Hamoli mwakwalambusya ligongo ŵamkamulile mlumbugwawo lina lyakwe Dina.

¹⁴ Ni ŵatite kwa ŵandu ŵala, “Uwe ngaŵamkupeleka mlumbugwetu kuti alombedwe ni mundu jwangawumbala. Cindu camti myoyo mpaka ciŵe cakutesya soni kwejinji.

¹⁵ Uwe mpaka tumkunde kuti mlombele mlumbugwetu naga mlimkundile yakuwumbala mpela mutuŵelele uweji, mundu jwalijose jwamlume aŵe jwa mwumbale.

¹⁶ Naga yili myoyo, mpaka tumpe mlumbugwetu kuti mumlombe, nowe ni tutwalombeje ŵanace ŵenu ŵacakongwe, nipo titutameje pamo mpela ŵandu ŵamo.

¹⁷ Nambo naga ngamkwiticisya yitukuŵecetayi, yakuti mwumbale, uweji tukagambe kumjigala mlumbugwetujo ni kuwujaga najo.”

¹⁸ Ayi yamnonyele Hamoli pamo ni Shekemu mwanagwe.

¹⁹ Nipo Shekemu ŵatesile cindu cila pakuŵa ŵamnonyele mnope mwali jula. Shekemu ŵaliji mundu jwakucimbicikwa mnope pa liŵasa lya baba ŵawo.

²⁰ Myoyo Hamoli ni Shekemu mwanagwawo, ŵajile kucipata ca msinda wawo ni kuja kukwasalila ŵandu ŵa mu msinda ŵawo wula kuti,

²¹ “Ŵanduŵa ali ŵambone, myoyo twakunde kuti atame mcilambo cetu cino, kuti atendeje malonda gawo cenenepe. Cilamboci cili cacikulungwa nipo likomboleka kwakwanila soni jemanjaji. Kwende tulombaneje nawo.

²² Nambotu ŵandu ŵeleŵa tacikunda kutama ni um'we, kuti tuŵe ŵandu ŵampepe, naga jwamlume jwalijose cilikati cetu ali awumbele mpela mwakusatendela jemanjajo.

²³ Ana ngaŵa yilangwa yawo yosope ni yindu yosope yakwete tiyiŵe yetu? Kwende tukunde yaŵeceteyo nipo ŵanduwo tatame ni uwe.”

²⁴ Ŵandu wosope ŵa mu msinda mula ŵakamulene nayo yiŵaŵecete Hamoli ni Shekemu, nipo jwamlume jwalijose jwa mu msindawo ŵawumbele.

²⁵ Pali papite masiku gatatu, maŵanga gakuwumbala ga ŵandu ŵala mkanigapole, ŵanace ŵacalume ŵaŵili ŵa Yakobo, Simiyoni ni Lefi ŵiŵaliji acalumbugwe ŵa Dina, ŵajigele mawupanga gawo, nipo ŵajinjile mu msinda mula mwangawonecela, ni ŵawuleje acalume wosope,

²⁶ kupwatika Hamoli pamo ni Shekemu mwanagwe. Soni ŵamtyosisye Dina m'nyumba mwa Shekemu ni ŵawujile kumangwawo.

²⁷ Ali amasile kwawulaga acalume wosope ŵala, ŵayice ŵanace ŵane ŵa Yakobo mu msindawo, kujigala yindu yakulekanganalekangana ya mu msinda wula, kuwucisya cipongwe ciŵatendele cila pakumkamulila mlumbugwawo.

²⁸ Ŵajigele ngondolo ni mbusi syawo, ng'ombe, abulu, ni cindu cilicose cicaliji mkati mwa msindawo ni m'migunda.

²⁹ Ŵajigele yipanje yawo yosope, soni ŵajigele acakongwe wosope ni ŵanace ŵakwe. Ŵakokosile yindu yosope yiyaliji m'majumba mwawo.

³⁰ Yakobo ŵamsalile Simiyoni ni Lefi kuti, “Ho! Jemanja mundandile une ngondo, sambano lina lyangu lisakele pasikati pa ŵandu ŵa cilambo acino, Akenani ni Apelesi. Une nganingola ŵandu ŵajinji. Jemanjaji naga akuŵilangana kuti ayice kuputa ngondo ni une, liŵasa lyetu lyosope tiliciwulajidwa.”

³¹ Simiyoni ni Lefi ni ŵajanjile kuti, “Pepani baba, ngakomboleka Shekemu kumsyusya mlumbugwetu kuŵa jwalilama.”