Genesesi 33 - Chiyawo Bible

Kusimana kwa Yakobo ni Esawu

¹ Yakobo* ŵaweni Esawu alimkwisa ni ŵandu ŵakwe 400. Myoyo ŵagaŵenye ŵanace ŵakwe ŵala kwa Leya, ŵane kwa Lakelo, ni ŵane kwa ŵamasengo ŵakwe ŵacakongwe ŵaŵili ŵala.

² Ŵalongwesye ŵamasengo ŵacakongwe ŵaŵili ŵala ni ŵanace ŵawo. Leya ni ŵanace ŵakwe ŵaliji mkuya panyuma pawo, Lakelo ni Yosefe ŵaliji mkuya munyuma mwa wosope.

³ Yakobo ŵalongolele ni ŵajineme mpaka gunda usyo pasi kasano ni kaŵili ali aŵandicile kwika kuŵaliji Esawu.

⁴ Nambo Esawu ŵawutwice ni kuja kumkumbatila Yakobo, ŵamkomasisye, nipo ŵatandite kulila ŵanaŵaŵili.

⁵ Esawu piŵalolite, ŵaweni acakongwe ni ŵanace ŵala, nipo ŵawusisye kuti, “Ana ŵandu ŵimli nawoŵa ŵaceni?” Yakobo ŵajanjile kuti, “Ŵeleŵa, ambuje ni ŵanace ŵambele uneji Mlungu mwa cinonyelo cakwe.”

⁶ Acakongwe ŵamasengo ŵala pamo ni ŵanace ŵawo, nombe nawo ŵayice ni ŵatindiŵele pasi.

⁷ Ŵayice soni Leya pamo ni ŵanace ŵakwe, nipo ŵakumalicisya kwisa ŵaliji Lakelo ni Yosefe. Wosopewo ŵatindiŵele pasi.

⁸ Esawu ŵawusisye kuti, “Nambi likuga lya yilangwa lisimene nalyo lila lya cici?” Yakobo ŵajanjile kuti, “Ambuje, likuga lyelila lyenu, mbelece mpela mtuka, kuti ŵalakwe ambocele cenene.”

⁹ Nambo Esawu ŵamsalile Yakobo kuti, “Mpwanga, nambotu yilangwa ya mtundu welewu ngwete yejinji. Yilangwa yimkweteyi mkamba une, yiŵepe yenu.”

¹⁰ Nambo Yakobo ŵatite, “Iyayi, naga wawo asalalile une mtima ni kumbocela cenene, apocele mtuka wangu. Pinajiweni ngope jawo, ngamba kuŵa mpela najiŵeni ngope ja Mlungu, ligongo lyakumbocela cenene ni magasa gaŵili.”

¹¹ Yakobo ŵamcisisyepe Esawu jula kuti, “Conde ngwaŵenda ŵalakwe acimwene kuti, apocele mtuka wunamjigalilewu. Pakuŵa Mlungu ŵasalalile une mtima, nipo ambele yindu yejinji.” Myoyo Esawu ŵapocele mtuka wula.

¹² Esawu ni ŵatite, “Kwende tuliŵicile cile tujawuleje. Nambo une tilongoleje kaje.”

¹³ Nambo Yakobo ŵatite kwa Esawu, “Ambuje ŵangu, ŵalakwe akumanyilila kuti, ŵanaceŵa apesile, nambo soni ngwenela kuyisamalila yilangwa yikwete ŵanace. Naga nguyisakula mwakuyiwutusya mnope, atamose kwa lisiku limo, yosope tiyimale kuwa.

¹⁴ Myoyo, ambuje ŵangu, alongolele, une tinjendeje panandipanandi panyuma pa yilangwa ni ŵanace ŵangu, mpaka tingasimane ku Seyili.”

¹⁵ Esawu ŵatite, “Cambone, mungunde kuti namlecele ŵamasengo ŵanguŵa kuti aŵe namwe.” Nambo Yakobo ŵajanjile kuti, “Pangali ligongo lyakuti ŵalece ŵamasengo ŵawo, une cingutogolela ni cakuti ŵalakwe ambuje, ambocele uneji cenene.”

¹⁶ Myoyo ŵawutandite ulendo wawo ŵakuwujila ku Seyili lisiku lyelelyo.

¹⁷ Nambo Yakobo ŵajawile ku Sukoti, ku ŵataŵile nyumba jakwe ni macinga ga yilangwa yakwe. Ali ni ligongo lyakwe malogo ŵagakolasile lina lyakuti Sukoti.

¹⁸ Pa ulendo wakwe wakuwuja kutyocela ku Mesopotamiya, Yakobo ŵayice cenene ku msinda wa Shekemu uli mcilambo ca Kenani. Ni ŵataŵile masakasa gawo pa malo gane gakulolegana ni msindawo.

¹⁹ Malo gelego ŵagasumile kwa yisukulu ya Hamoli, ŵele ŵaliji baba ŵawo Shekemu, ni mbiya 100 sya silifa.*

²⁰ Ŵataŵile malo gakupelecele mbopesi pelepo, ni ŵagapele lina lyakuti Eli Elohe Isalaeli, kugopolela kuti, Eli, Mlungu jwa Aisalaeli.