Genesesi 32 - Chiyawo Bible

Yakobo akuliŵicila cile kuwonegana ni Esawu

¹ Yakobo* ŵawutandite ulendo. Ali mkwenda pa ulendo wakwe, malayika ga Mlungu gasimene najo jwalakwe.

² Piŵagaweni malayikago Yakobo ŵatite, “Ali ni likuga lya ngondo lya Mlungu.” Myoyo ŵagapele malo gala lina lyakwe Mahanaimu.

³ Yakobo ŵatumile ŵandu kuti ajawule kwa Esawu mkulugwawo ni utenga, ku Seyili mcilambo ca Edomu.

⁴ Ŵasalile ŵandu ŵiŵatumile utenga ŵala kuti akamsalile Esawu, kuti, “Une Yakobo jwakutumicila jwawo ŵalakwe, naliji mkutama kwa Labani, nipo ndemi kweleko ndaŵi jajilewu mpakana lelo.

⁵ Ngwete ng'ombe, abulu, mbusi ni ngondolo, soni ngwete acikapolo ŵacalume ni ŵacakongwe. Ngutumisya gele maloŵega kwa ŵalakwe ambuje ŵangu, kuti asalalile une mtima.”

⁶ Ŵandu ŵiŵatumile utenga ŵala piŵawujilile kwa Yakobo, ŵamsalile kuti, “Twajile kwika kwa Esawu, akulu ŵawo ŵalakwe, nipo ali mkwisa kukuwonegana ni ŵalakwe. Akwisa pamo ni ŵandu 400.”

⁷ Yakobo piŵapikene gele maloŵego, ŵajogwepe mnope, nipo ŵajasile mtima. Myoyo ŵandu ŵiŵaliji nawo ŵagaŵenye m'makuga gaŵili, pamo ni ngondolo, mbusi, ng'ombe, kwisa soni ngamila.*

⁸ Jwalakwe ŵaganisyaga mu mtima mwakwe kuti, “Pitayice Esawu, naga akutenda ngondo ni likuga lyandandali, likuga linelyo likomboleka kutila.”

⁹ Myoyo Yakobo ŵatandite kupopela, ŵatite, “Mlungu jwa anganga ŵangu Abulahamu* ni Mlungu jwa baba ŵangu Isaki, ambikane une. Ŵalakwe AMBUJE* ŵasalile une kuti mbujile kucilambo cangu, ni kwa acalongo acimjangu, nipo tinjilolecesya kuti yindu yosope yimjendele cenene.

¹⁰ AMBUJE, une jwangaŵajilwa kupocela ya umbone mtima ni kulupicika kwawo kwele kunakuweni une jwakutumicila jwawo. Najombwece Yolodani ndili jwangali kandu kalikose, akaŵe simbope myala mwangu, nambo lelo mbusile ni makuga gaŵili aga.

¹¹ Conde, ngamwile lukongolo, angulupusye ku macili ga akulu ŵangu Esawu. Ngogopa kuti mwine akwisa kukuputa ngondo, ni kutuwulaga wosopewe, pamo ni acakongwe ni ŵanaceŵa.

¹² Akumbucile cilanga* cawo ciŵatite kuti, ‘Tinjilolecesya kuti yindu yosope tiyimjendele cenene, nipo tinjimpa yisukulu yejinji yangaŵalanjika.’ ”

^13-15 Cilo celeco, Yakobo ŵagonile pa malo gagogo giŵapopelagago. Piŵajimwice kundaŵi kwakwe, Yakobo ŵasagwile mtuka wakuti apelece kwa Esawu mkulugwawo, kutyocela m'yilangwa yiŵakwete. Mtukawo waliji wa: mbusi syasikongwe 200 ni syasilume 20, ngondolo syasikongwe 200 ni syasilume 20, ngamila sya mkaka 30 pamo ni ŵanace ŵakwe, ng'ombe syasikongwe 40, ni syasilume likumi, ni abulu ŵacakongwe 20 ni ŵacalume likumi.

¹⁶ Yilangwayo ŵayiŵisile m'makuga gakulekanganalekangana. Likuga lililyose lyaliji m'myala mwa mcanda jumo jwakuyilolela. Ni ŵasalile acacanda wosopewo kuti, “Jemanja mlongolele, nipo patimjendeje ni makuga ga yilangwayi, mleceje lipesa pasikati pa likuga lili lyose.”

¹⁷ Yakobo ŵamsalile mcanda jwandanda, juŵalongolele ni likuga lyandanda lya yilangwa, kuti, “Patimkasimane ni acimwene ŵangu Esawu, naga akuja kuwusya kuti, ‘Ana ambuje ŵenu ŵani? Nambi mkwawula kwapi? Nambi yilangwa yili pasogolo penupa yaceni?’

¹⁸ M'mwejo mkajanje kuti, ‘Yilangwayi yili ya jwakutumicila jwenu Yakobo, ayitumisye kwa ŵalakwe ambuje, kuti yiŵe mtuka. Yakobo asyene ali mkwisa munyuma mwetu.’ ”

¹⁹ Myoyo ŵamsalile soni mcanda jwaŵili maloŵe gagogo, soni ŵamsalile jwatatu, mpaka acacanda wosope ŵiŵajendaga ni makuga ga yilangwa ŵala. Ŵasalicisye kuti, “Yeleyi ni yatimkasalile acimwene ŵangu Esawu patimkasimane nawo.

²⁰ Mkajileje kuti, ‘Soni Yakobo ŵakutumicila ŵenu, ali mkwisa munyuma mwetu.’ ” Yakobo ŵatesile yeleyi ligongo ŵaliji mkuganisya kuti, “Tinatulusye mtima acimwene ŵangu, ligongo lya mituka jinatumicisyeji, naga nguwonegana nawo, mwine takambocele cenene.”

²¹ Myoyo mituka jila jalongolele, nambo Yakobo ŵagonile kucigono kulakula.

Yakobo akulimbana ni mundu ku Penuwele

²² Cilo cicoco Yakobo ŵajimwice ni ŵajigele aciŵamkwawo ŵaŵili, ŵamasengo ŵaŵili ŵacakongwe, pamo ni ŵanace ŵawo 11 ŵala, ni ŵajombwece pa ciko ca Lusulo lwa Yaboki

²³ Piŵajombwesye jemanjajo, ŵacijombwesye soni cipanje cosope ciŵakwete.

²⁴ Jwalakwe ŵagambile kusigala jikape lisi line lya lusulo. Kaneko jwayice mundu jwine jwele juŵatandite kulimbana najo Yakobo mpaka kumasikusiku.

²⁵ Mundu jula piŵayiweni kuti ngakupunda pakulimbanako, ŵamputile Yakobo m'ciga mwakwe, nipo jwalakwe ŵatiningwice pakusimanila mawupa ga lukongolo ni ciwunu.

²⁶ Mundu jula ni ŵatite kuti, “Mundece une njawuleje pakuŵa kukuca.” Nambo Yakobo ŵatite, “Une nganimkunda kuti mjawuleje, mpakana m'mwejo mumbe upile.”

²⁷ Mundu jula ŵamwusisye kuti, “Lina lyenu ŵani?” Jwalakwe jwajanjile kuti, “Lina lyangu Yakobo.”

²⁸ Mundu jula ni ŵatite kuti, “Lina lyenu ngaliŵa soni Yakobo. Mlimbene ni Mlungu nambo soni ni ŵandu, nipo mpundile. Myoyo lina lyenu tiliŵe Isalaeli.”

²⁹ Yakobo ni ŵamwusisye mundu jula kuti, “Conde musalile lina lyenu.” Nambo mundu jula ŵajanjile kuti, “Ligongo cici mkumbusya lina lyangu?” Ndaŵi jijojo mundu jula ŵampele upile Yakobo.

³⁰ Yakobo ni ŵatite, “Nditu mbonegene najo Mlungu meso ni meso nambo nganimbwa.” Myoyo Yakobo ŵagapele malo gala lina lyakwe Peniele.

³¹ Lisiku lyamkopocele Yakobo alimkutyoka ku Penuwele, nipo ŵaliji mkutundajila ligongo lya malo gaŵatiningwice gala.

³² Ni ligongo lyakwe mpaka lelo jino, yisukulu yosope ya Isalaeli yangalya nyama ja pakulumbikanila pa ciga ni ciwunu, ligongo pa mtasi wa gele maloga ni pele Yakobo ŵaputidwe ni mundu jula.