Genesesi 30 - Chiyawo Bible

¹ Lakelo piŵayiweni kuti ngakumŵelecela Yakobo* ŵanace, ŵamtendele litima Leya mkulugwawo jula, nipo ŵamsalile Yakobo kuti, “Mumbe ŵanace, naga ngamkumba, kuli cenene kuti une mbwe.”

² Maloŵe gelega gampwetesye mtima Yakobo, ni ŵatite kwa Lakelo, “Mkanjimba une magambo, une ngaŵa Mlungu?”

³ Lakelo ni ŵatite kwa Yakobo, “Mumjigale Biliha jwamasengo jwanguju, mtame najo malo gamo kuti ambelecele une mwanace, kuti kupitila mwa jwalakweju none jwakwe ngole ŵanace.”

⁴ Myoyo Lakelo ŵampelece Biliha kwa ŵamkwakwe, nipo Yakobo ŵatemi najo malo gamo Bilihajo.

⁵ Biliha ŵakwete citumbo ni ŵamŵelecele Yakobo mwanace jwamlume.

⁶ Lakelo ŵatite kuti, “Mlungu alamwile mwakusalalila une mtima. Alipikene lipopelo lyangu, nipo ambele une mwanace jwamlume.” Myoyo mwanacejo ŵampele lina lyakwe Dani.

⁷ Biliha jwamasengo jwa Lakelo jula ŵakwete soni citumbo cine, ni ŵamŵelecele Yakobo mwanace jwamlume.

⁸ Lakelo ŵatite, “Limbene nawo kwakukulungwa mnope cemwali, nambo sambano mbundile.” Myoyo mwanace jula ŵampele lina lyakuti Nafutali.

⁹ Leya ali ayiweni kuti alesile kuŵeleka, ŵamjigele Silipa jwamasengo jwakwe ni kumpeleka kwa Yakobo.

¹⁰ Nipo Silipa ŵamŵelecele Yakobo mwanace jwamlume.

¹¹ Leya ni ŵatite, “Ngwete upile!” Ni ŵampele mwanacejo lina lyakwe Gadi.

¹² Silipa jwamasengo jwa Leya jula ŵamŵelecele Yakobo mwanace jwine jwamlume.

¹³ Leya ŵatite, “Mbundile kondwa. Acakongwe tandende une kuti jwamjaliwe.” Myoyo ŵampele mwanace jula lina lyakwe Asha.

¹⁴ Lisiku line, ndaŵi jakata tiligu, Lubeni ŵapite ku migunda kuŵawusimene mtela wakusyana mundu kuti aŵelece, ŵayice nawo kwa Leya mama ŵawo. Nipo Lakelo ŵatite kwa Leya, “Conde mungaŵile une panandi mtela wawuŵelesi wamjigalile mwanagwenu.”

¹⁵ Nambo Leya ŵajanjile kuti, “Ana ŵamkwangu ŵamusumwile ŵala nginakwana? Lelo soni mkusaka musumule mtela wakusyana wanjigalile mwanangu?” Lakelo ni ŵatite, “Naga mkungaŵila une mtela wakusyanawo, ŵalumeŵa tagone kumangwenu cilo cino.”

¹⁶ Yakobo piŵawujaga kutyocela ku migunda ligulo, Leya ŵajile kukwacingamila ni ŵasalile kuti, “Lelo agone ku nyumba jangu kuno, pakuŵa nimlipilile kala mtela wa kusyana.” Myoyo Yakobo ŵagonile ni Leya cele ciloco.

¹⁷ Mlungu ŵalipikene lipopelo lya Leya, nipo Leya ŵakwete citumbo cine, ni ŵamŵelecele Yakobo mwanace jwamsano.

¹⁸ Leya ni ŵatite, “Mlungu andipile ligongo nampelece jwamasengo jwangu kwa ŵamkwangu.” Myoyo mwanacejo ŵampele lina lyakwe Isakala.

¹⁹ Leya ŵakwete citumbo cine soni, ni ŵamŵelecele Yakobo mwanace jwamsano ni jumo.

²⁰ Leya ŵatite kuti, “Mlungu ambele une mtuka wakusalala. Sambano ŵamkwangu tanjimbicisyeje ligongo naŵelecele ŵanace ŵacalume msano ni jumo.” Myoyo mwanace jula ŵampele lina lyakwe Sebuloni.

²¹ Kaneko ŵaŵelece mwanace jwamkongwe nipo ŵampele lina lyakwe Dina.

²² Mlungu ŵamtendele canasa Lakelo, pakulipikana lipopelo lyakwe ni ŵamkundile kuti aŵelece ŵanace.

²³ Ŵakwete citumbo ni ŵaŵelece mwanace jwamlume. Lakelo ŵatite, “Mlungu andyosisye soni sya ungaŵeleka wangu.”

²⁴ Myoyo ŵampele lina lyakwe Yosefe, pakuŵa ŵatite kuti, “AMBUJE* ambe soni une jwine.”

Yakobo ni Labani

²⁵ Yosefe ali apagwile, Yakobo ŵatite kwa Labani, “Angunde njawuleje kumangwetu.

²⁶ Ambe aciŵamkwangu ŵanapatile pakwakamulila ŵalakwe masengo, pamo ni ŵanace ŵangu njawuleje. Ŵalakwe akumanyilila kuti nakamulile masengo cenene.”

²⁷ Nambo Labani ŵatite kwa Yakobo, “Naga m'mweji kweli mli mlongo mjangu, conde mkatyoka, ligongo ngumanyilila kuti AMBUJE ambele upile une ligongo lya m'mwejo.

²⁸ Mgambe kusalila malipilo gamkusaka nipo une tinampe.”

²⁹ Yakobo ŵajanjile kuti, “M'mwejo mwasyene mkumanyilila mungamulileje masengo, nambo soni muyitupile yilangwa yenu mu ndaŵi jinaliji mkuyilolela.

³⁰ Pandanda ŵalakwe ŵakwete yilangwa yamnono, nambo sambano yitupile mnope, nipo AMBUJE ŵapele upile ŵalakwe ligongo lya une. Ndaŵi sambano jikwanile jakuti none jwakwe samalile liŵasa lyangu.”

³¹ Labani ni ŵatite, “Ana nimlipile cici?” Yakobo ŵajanjile kuti, “Une ngangusaka malipilo galigose. Nambo une timbitilisye kulanga yilangwa yawo, naga ŵalakwe akwiticisya yitisale uneji.

³² Lelo angunde kuti njawule pasikati pa yilangwa yawo yosope. Ni tisagule ngondolo syosope syepiliwu, kwisa soni mbusi syosyope sya maŵalamaŵala ni madondomadondo. Malipilo gangusaka une kuti ŵalakwe ambe une ni gelego.

³³ Msogolo mwakwe tacimanyilila ŵalakwe naga uneji ndili mundu jwakulupicika, pa ndaŵi jitaciyika kukulola malipilo gangu. Naga talole kuti ngwete mbusi jangali madondomadondo kapena maŵala, kapena mwanace jwangondolo jwamkanaŵa jwampiliwu, tamanyilile kuti jele mbusijo kapena ngondolojo jili jakwiŵidwa.”

³⁴ Labani ni ŵatite, “Yambone, kwende tutende mumŵecetele pemo.”

³⁵ Nambo lyele lyuŵalyo, Labani ŵatyosisye acitonde wosope ŵamaŵalamaŵala ni mandondomandondo. Ŵatyosisye soni mbusi syosope syasikongwe sya madondomadondo ni maŵalamaŵala ni jilijose jijakwete liŵala lyeswela pacilu pakwe, kwisa soni ngondolo jilijose jepiliwu, ni ŵasipelece kwa ŵanace ŵakwe kuti asiloleleje.

³⁶ Ali amasile kutenda yindu yeleyi, Labani ŵalekangene najo Yakobo kuti aloleleje yilangwa yineyo, jwalakwe ŵajesile ulendo ŵa masiku gatatu.

³⁷ Yakobo ŵajigele nyambi syasiŵisi sya yitela ya mitundu jitatu ja ku cilamboco, ŵatugwagwile makungwa, nipo nyambisyo syawonekaga sya maŵalamaŵala.

³⁸ Nyambisyo ŵasiŵisile pasogolo pa yilangwa kumalo kuyamwelaga mesi, kuti yilangwayo yiloleje nyambisyo pakumwa mesi, yinyamayo yaliji mkumemesya piyayikaga kukumwa mesi.

³⁹ Ligongo lyakuti yilangwayo yajigalaga maŵele yili yilolite nyambi sila, yilangwayo yaŵelekaga ŵanace ŵamaŵalamaŵala ni ŵa madondomadondo.

⁴⁰ Ngondolo sine sya Labani siŵalanganga Yakobo syaliji sya maŵalamaŵala. Nipo ngondolo sine pisyaliji mkumemesya Yakobo ŵasiŵisile ngondolo sine pa malo pakuti silolegane ni ngondolo sya Labani, yilangwa yine yila ŵayitendesye kuti yiloleje ku yaliji yilangwa ya Labani yiyakwete maŵala ni yayipiliwu. Yilangwa yeleyi nganayiwanganyaga ni ya Labani.

⁴¹ Pa ndaŵi jiyamemesyaga yilangwa yamacili kumalo kuyamwelaga mesi, Yakobo ŵalolecesyaga kuti aŵisile nyambi sya maŵalamaŵala sila pasogolo pakwe, kuti sijigale maŵele sili silolite nyambisyo.

⁴² Nambo ndaŵi jiyamemesyaga yilangwa yangali macili, Yakobo nganaŵikaga nyambi sila pasogolo pakwe. Myoyo, Yakobo ŵapatile yilangwa yakwimbala ni yamacili, nipo yaganda yosope yaliji ya Labani.

⁴³ Pakutenda yindu yeleyi Yakobo ŵasicile mnope. Ŵakwete ngondolo, mbusi, ngamila* ni abulu ŵajinji. Ŵakwete soni acikapolo ŵacalume ni ŵacakongwe ŵajinji.