Genesesi 3 - Chiyawo Bible

Ungapikanila wa mundu

¹ Pandaŵi aji lijoka lyaliji lyakalamuka mnope kuyipunda yinyama yosope yiŵayipanganyisye AMBUJE* Mlungu. Lijoka lyamwusisye jwamkongwe kuti, “Ana yakuwona kuti Mlungu ŵatite mkasimlya cisogosi ca yitela yiliyose mu mgunda muno?”

² Jwamkongwe ŵajanjile kuti, “Tukomboleka kulya yisogosi ya yitela yili yose mu mgunda muno,

³ nambo kuleka citela cacili pasikati pakwe. Mlungu ŵatusalile kuti tukalya yisogosi ya mcitela celeco, nipo ngatukwenela atamose kuyikwaya, ligongo lyakuti naga tukutenda myoyo, tuciwa.”

⁴ Nambo lijokalyo lyamsalile jwamkongwejo kuti, “Iyayi, yeleyo ngaŵa myoyo, kuwa ngasim'wa.

⁵ Mlungu akumanyilila kuti, pa ndaŵi jitimcilya yisogosi yeleyi, meso genu tigaciwuguka ni timciŵa mpela mwaŵelele Mlungujo, timcimanyilila yindu yambone ni yakusakala.”

⁶ Jwamkongwejo ŵaciweni citelaco kuti caliji cakusalala, ni soni kuti yisogosi yakwe yikomboleka kuŵa yakunong'a kulya. Nipo ŵatandite kuyikumbila yisogosiyo kuti alye, ni kuti aŵe jwalunda. Myoyo jwamkongwejo ŵakaŵile yisogosi yine ya mcitelaco ni ŵalile. Ni ŵajigele yine soni kuja kukwapa ŵamkwawo, nipo jwalakwejo ŵalile.

⁷ Ali namalape kulya, ŵalimanyilile kuti ali makonope, myoyo ŵatotile masamba ga citela ca mkuju ni ŵawete.

⁸ Ligulo, ŵandu ŵaŵiliwo ŵapikene AMBUJE Mlungu ali mkwendajenda mu mgundamo, nipo jemanjajo ŵajuŵile cilikati ca yitela ya mu mgundamo, kuti Mlungu akawona.

⁹ Nambo AMBUJE Mlungu ŵamŵilasile mundu jula kuti, “Ana mli kwapi?”

¹⁰ Adamu* ŵajanjile kuti, “Napikene ali mkwenda mu mgundamu, nipo najogwepe, ni najuŵile pakuwona kuti ndili makonope.”

¹¹ Mlungu ŵamwusisye kuti, “Ŵani ŵamsalile kuti mli makonope? Ana mlile yisogosi yacitela cinatite mkasimlya cila?”

¹² Mundu jula ŵajanjile kuti, “Jwamkongwe jumwambele kuti aŵe ni une jula, ni juŵambele yisogosi yacitela cila kuti ndye, nipo nalile.”

¹³ AMBUJE Mlungu ŵamwusisye jwamkongwe jula kuti, “Ana yimtesileyi, mtendele cici?” Jwamkongwe ŵatite, “Lijoka lyanyenjile kuti ndye, nipo une nalile.”

Kulamula kwa Mlungu

¹⁴ AMBUJE Mlungu ni ŵalisalile lijokalyo kuti, “Kwa ligongo lya kuti mtesile yeleyi, mli ŵakulweseka kuyipunda yinyama yine yosope ya pa cilambo pano, yakulanga ni yamwitinji yakwe. Kutandila lelo mpaka kalakala timkwaŵeje ni lutumbo lwenu, soni cakulya cenu ticiŵe luwundu umi wenu wosope.

¹⁵ Timbice uŵengani sikati ja m'mwejo ni jwamkongweju. Tipaciŵa uŵengani sikati ja mwanace jwa jwamkongweju ni mwanace jwenu, taciŵa ŵakuŵengana ndaŵi syosope. Mwanace jwa jwamkongweju tacikasa mtwe wenu, nipo m'mwejo timciluma cindende cawo.”

¹⁶ Nipo Mlungu ŵamsalile jwamkongwe jula kuti, “Tinayijonjecesye yipwetesi yenu pa ndaŵi jimkukola cilu timcipikana yipwetesi pa ndaŵi jenu jakuŵeleka mwanace. Atamose yili myoyo timcikolape lung'wanu lwa ŵamkwenu, nipo ŵamkwenuwo tacimlamulila m'mwejo.”

¹⁷ Nipo Mlungu ŵamsalile Adamu kuti, “Ligongo m'mweji mwapikanile ŵamkwenu, mpaka mlile yisogosi yinamgombelecesye kuti mkamlya. Litaka tiliŵe lyakulweseka ligongo lya yimtesileyi. Mkwenela kukamula masengo ga citukuta, ndaŵi ja umi wenu wosope, kuti mpate yakulya yakwanila.

¹⁸ Mwitakamo timucimela tutela twa miŵa ni twa matungwisa, soni timcilya yakumela ya mwitinji.

¹⁹ Mkwenela kukamula masengo mnope mpaka kukoposya citukuta, kuti litaka limpe yakulya mpaka pa timciwujila kwitaka kumwatyocele. Nampanganyisye kutyocela kwitaka, kwitaka kukoko timciwujila.”

²⁰ Adamu ni ŵampele ŵamkwawo lina lyakuti Hawa, ligongo lyakuti jwelejo ŵaliji mama jwa ŵandu wosope.

²¹ AMBUJE Mlungu ŵapanganyisye yakuwala ya Adamu ni ŵamkwawo kutyocela ku mapende ga nyama, ni ŵawecice jemanjajo.

Adamu ni Hawa akutoposyedwa mu mgunda

²² AMBUJE Mlungu ŵatite, “Sambano munduju ali mutuŵelele uweji, Pakuŵa akumanyilila yambone ni yakusakala. Tukampa soni ukumu wakuti alye yisogosi ya citela cakupeleka umi atakola umi wampaka kalakala, wa ngawa.”

²³ Myoyo AMBUJE Mlungu ŵamtyosisye mundujo mu mgunda wa Edeni mula, kuti akalimeje mwitaka lilyolyo liŵampanganyicisyelyo.

²⁴ Ali amtyosisye Adamujo, AMBUJE Mlungu ŵaŵisile akelubi kwisa soni upanga wamoto uwagalawucilaga akunakuku, ca kungopoko lyuŵa kwa mgunda wa Edeni, kulondela litala lyakuja ku citela cakupeleka umi, kuti jwine akusaciŵandicila.