Genesesi 27 - Chiyawo Bible

Isaki akumpa upile Yakobo

¹ Isaki ali acekulwipe ŵatatele meso gakwe, mwakuti nganapakombola kulola. Lisiku line, ŵamŵilasile Esawu mwanagwawo jwandanda ni ŵamsalile kuti, “Mwanangu!” Esawu ni ŵajanjile kuti, “Ndili apano baba.”

² Isakiwo ni ŵatite, “Mlole, kucekulupatu une akuno, nipo ngangulimanyilila lisiku lya kuwa kwangu.

³ Mjigale yida yenu, ukunje ni mipamba jakwe, mjawule mwitinji mkambulajile nyama.

⁴ Nipo mundelecele une yakulya yakunong'a yingusinayinonyela yila ni myice nayo akuno, patimale kulya, tinampe upile m'mwejo mkanim'we.”

⁵ Labeka ŵaliji mkupikana Isaki piŵaŵecetanaga ni Esawu. Esawu piŵapite kwitinji kukusakula,

⁶ Labeka ŵamsalile Yakobo* kuti, “Napikene baba ŵenu alimkuŵecetana ni Esawu kuti,

⁷ ‘Mkambulajile une nyama ni mundelecele cenene kuti ndye ni nampele upile pameso pa AMBUJE* une mkanimbwe.’

⁸ Sambano m'mweji mwanangu, mumbikanile soni myitende yindu yosope yitinamsalile.

⁹ Mjawule kuyili yilangwa ni mkanjigalile tumbusi tuŵili twakwimbala kuti ndelece nyama jakwe cenene mpela mwakusajinonyelela baba ŵenu.

¹⁰ Nipo timkayipelece cakulyaco kwa baba ŵenu kuti akalye, ni kuti akampe upile mkinawe.”

¹¹ Nambo Yakobo ŵasalile mamagwewo kuti, “Mama akukumbucile kuti Esawu akwete manyunya pa cilu pakwe nambo une jwangali.

¹² Mwine mwakwe babawo takangwaye, ni takamanyilile kuti une naloŵesye, nipo takambe une malweso, m'malo mwakumba upile.”

¹³ Mama ŵawo ŵala ŵamjanjile kuti, “Naga akamlwese, malwesogo gangwile une, m'mwejo mgambe kupikanila yingumsalila une, jawulani mkajigale tumbusito myice nato akuno.”

¹⁴ Myoyo Yakobo ŵapite kujigala tumbusito ni ŵapele mamaŵawo, nipo Labeka ŵa telece cakulya cele ciŵacinonyelaga babawo.

¹⁵ Labeka ŵajigele yakuwala yambone mnope ya Esawu yiŵayisungaga m'nyumba, ni ŵam'wecice Yakobo mpwakwe.

¹⁶ Ŵam'wecice soni mapende ga tuŵanace twambusi tula m'makono ni pa lukosi pakwe, m'malo mwele mumwaliji mwangali manyunya.

¹⁷ Ni ŵajigele mkate ni cakulya ciŵacitelece cenene cila, ni ŵampele kuti akapelece kwa baba ŵawo.

¹⁸ Yakobo ni ŵapite kuŵaliji baba ŵawo ni ŵaŵilasile kuti, “Baba!” Isaki ni ŵawusisye kuti, “Ana m'mwejo mwanangu jwakwe jwapi?”

¹⁹ Yakobo ni ŵajanjile kuti, “Une Esawu mwanagwenu jwamkulungwa, nipo yindu yimwandumile yila nayitesile. Conde jimukani kuti mlye nyama jiyice najo, nipo mumbe upile.”

²⁰ Nambo Isaki ŵatite, “Mwanangu, yikombolece uli kuti mjipatile nyama mwa citemacitema?” Yakobo ni ŵajanjile kuti, “Ligongo AMBUJE Mlungu jwenu angamucisye, kuti nijipate mwacitemacitema.”

²¹ Nipo Isaki ŵatite kwa Yakobo kuti, “Ŵandicilani mwanangu kuti namkwaye kuti manyilile naga mli mwanangu Esawu kapena iyayi.”

²² Myoyo Yakobo ŵapite ciŵandika ni Isaki babagwe, nipo babagwewo ŵamkwayiye ni ŵatite kuti, “Maloŵe genu gakupikanika mpela ga Yakobo, nambo makono gakuŵa mpela ga Esawu.”

²³ Myoyo nganam'manyilila kuti ŵaliji Yakobo, ligongo makono gakwe galiji gana manyunya mpela ga Esawu, ni ŵatandite kumpa upile.

²⁴ Nambo ŵamwusisye soni kuti, “Ana m'mwejo nditu mli mwanangu Esawu?” Yakobo ni ŵajanjile kuti, “Nditu une Esawu.”

²⁵ Isaki ni ŵatite, “Myice najo nyamajo, kuti ndye, nipo tinampe upile.” Ni ŵapelece nyama jila nipo ŵalile, ni ŵapelece soni finyo nipo ŵamwele.

²⁶ Isaki ŵala ni ŵatite, “Mwanangu mumbandicile nipo mungomasye pa ngomo.”

²⁷ Ni ŵaŵandicile ni ŵakomasisye pa ngomo, nipo Isaki ŵalipikene liwungo lya cakuwala ciŵawete ni ŵampele upile acitiji, “Liwungo lyambone lya mwanace jwangu lili mpela liwungo lya yakugowola ya mu mgunda wele AMBUJE ŵawupele upile!

²⁸ Mlungu amgwicisye ula, nipo migunda jenu jiŵe jakusogola cenene, ampe yakulya ni yakumwa yejinji.

²⁹ Ŵandu amtumicileje, Nipo mitundu ja ŵandu jimtindiŵalileje. M'mwejo mŵe ŵakwalamulila acalongo acimjenu, nipo yisukulu ya mama ŵenu tiyimtindiŵalileje. Alwesece wosope ŵakumlwesa m'mwejo, nipo akole upile wosope wakusampa m'mwejo upile.”

Esawu akumŵenda Isaki kuti ampe upile

³⁰ Isaki piŵamasile kwapa upile Yakobo, Yakobowo ŵakopwece. Ndaŵi jijojo Esawu ŵawusile kutyocela kukusakula nyama.

³¹ Esawu nombe nawo ŵatelece yakulya yakunong'a, ni ŵajile kupeleka kwa baba ŵawo. Esawu ŵatite, “Baba, conde jimukani mlye nyama jele jinamjigalile une mwanagwenu, ni soni kuti mumbe upile.”

³² Isaki ŵawusisye kuti, “Ana m'mwejo soni ŵani?” Jwalakwe ŵajanjile kuti, “Une mwanagwenu jwamkulungwa Esawu.”

³³ Papopo Isaki ŵatandite kutetemela cilu cosope, ni ŵamwusisye kuti, “Ana ŵani ŵayice najo nyama kwa une jindile m'mwejo mkanimyice? Jwelejo nampele upile, nipo upile welewo uli wakwe nditu mpaka kalakala.”

³⁴ Esawu piŵapikene yiŵaŵecete baba ŵawo yila, ŵalisile mnope pakupwetesya mtima. Nipo jwalakwe ŵatite kwa babagwe, “Baba, conde none jwakwe ambe upile.”

³⁵ Nambo Isaki ŵajanjile kuti, “Apwenu ŵayice, nipo alambwisye. Ŵelewo ni ŵajigele upile wenu.”

³⁶ Esawu ŵatite, “Keleka kaŵili kunyenga une jwalakweju. Ngangusimonga kuti lina lyakwe lili Yakobo, pakuŵa anjiŵile kaŵili. Pandanda ŵasumwile ukulungwa wangu ŵakutanda kupagwa, nipo lelo asumwile upile wangu. Ana upilewo nganasunjila amta panandi baba?”

³⁷ Isaki ŵajanjile kuti, “Napele kala upile apwenuwo, nipo naŵisile kuŵa ŵakumlamulila m'mwejo. Acalongo acimjakwe ŵane wosope naŵisile kuŵa ŵakutumicila ŵakwe. Nampele soni upile wakuti agowoleje yakulya yejinji ni yakumwa yakwe. Myoyo pangali cakuti mpaka namtendele m'mwejo mwanangu.”

³⁸ Esawu ŵapitilisye kwaŵenda baba ŵawo kuti, “Ana baba, akwete upile umopewu, nganakola upile amta panandi wakuti none ambe? Conde baba ambe upile none jwakwe.” Ali aŵecete gele maloŵega Esawu ŵatandite soni kulila.

³⁹ Isaki ni ŵajanjile kuti, “Timcitama pa malo gangali cajila, ula ngasijigwa pa migunda jenu.

⁴⁰ Masengo genu tigaciŵa ga kuputa ngondo, nipo timciŵa ŵakutumicila ŵa apwenu. Nambo naga mli mwajimucile, timcityoka pasi pa ulamusi wa apwenuwo.”

⁴¹ Myoyo Esawu ŵaŵengene najo Yakobo ligongo m'malo mwa kumpa upile jwalakwejo, Isaki ŵampele Yakobo upile. Nipo Esawu ŵaganisisye kuti, “Ndaŵi jakuwa baba ŵangu jisigele panandi, nipo timjimwulaga Yakobo.”

⁴² Labeka piŵapikene yosope yiŵaganisyaga Esawu, ŵamŵilasile Yakobo ni ŵamsalile kuti, “Esawu mkulugwenu akuganisya yakuti amwulaje m'mwejo, kuwucisya yele yimwatendele.

⁴³ Myoyo mwanangu, mtende yitinamsalile uneji. Mliŵicile cile, mtilile ku Halani kwa mjomba ŵenu Labani.

⁴⁴ Mkatame kweleko kwa kandaŵi panandi mpaka mtima wa akulu ŵenu uli utulele.

⁴⁵ Nikuti soni aliŵalile kaje yimwatendeleyi. Msogolo mwakwe tinjituma mundu kwisa kukumtola. Ngajasa une ŵanace ŵangu ŵaŵilimwe lisiku limpepe.”

Isaki akumjawusya Yakobo kwa Labani

⁴⁶ Kaneko Labeka ŵasalile Isaki kuti, “Acakongwe ŵa mtundu wa Cihiti ŵalombele Esawu une ambesisye. Naga Yakobo akulombela soni jwamkongwe jwa Cihiti, ana une umi wangu tiwuciŵa uli?”