Genesesi 25 - Chiyawo Bible

Yisukulu ya Abulahamu

¹ Abulahamu* ŵalombele ŵakongwe ŵane lina lyawo Ketula.

² Ŵamŵelecele Abulahamu ŵanace ŵacalume aŵa Simulani, Yokishani, Medani, Midiyani, Ishibaki, ni Shuwa.

³ Yokishani ŵaliji babagwe Sheba ni Dedani. Ŵanace ŵacalume ŵa Dedani ŵaliji Ashulimu, Letushimu ni Lewumimu.

⁴ Ŵanace ŵa ŵacalume ŵa Midiyani ŵaliji, Efa, Efele, Hanoki, Abida ni Elida. Ŵeleŵa ni yisukulu ya Ketula.

⁵ Abulahamu ŵapelece yipanje yakwe yosope yiŵakwete kwa Isaki.

⁶ Nambo mkinawe Abulahamu, ŵagambile kupeleka yindu yakulekanganalekangana kwa ŵanace ŵa aciŵamkwawo ŵane. Nipo Abulahamu ali ciŵela cijumi ŵatumisye ŵanace ŵakwe ŵanewo, ku cilambo ca kungopoko lyuŵa kuti atalikangane ni Isaki mwanace jwakwe.

Ciwa ca Abulahamu

⁷ Abulahamu ŵaliji cijumi kwa yaka 175,

⁸ nipo ŵawile ali acekulwipe mnope.

⁹ Isaki ni Ishimaeli ŵanace ŵawo ŵasicile baba ŵawowo mu mbanga ja ku Makipela, mu mgunda wuwaliji wa Efuloni mwanace jwamlume jwa Sohali jwa mtundu wa Cihiti, wawuli kungopoko lyuŵa kwa cilambo ca Mamule.

¹⁰ Awu waliji mgunda wuŵasumile Abulahamu kutyocela kwa ŵandu ŵa mtundu wa Cihiti. Mwelemo ni muŵasicile Abulahamu pamo ni Sala ŵamkwawo.

¹¹ Abulahamu ali awile, Mlungu ŵampele upile Isaki mwanace jwakwe. Nipo Isaki ŵaliji mkutama pa kuŵandikana, “Ni Cisima ca Jwa umi Jwakumbona Une cila.”

Yisukulu ya Ishimaeli

¹² Ayi ni yisukulu ya Ishimaeli, mwanace jwa Abulahamu juŵamŵelecele Hagala, kapolo jwamkongwe jwa ku Iguputo.

¹³ Mena ga ŵanace ŵa Ishimaeli ni aga: jwandanda ŵaliji Nebayoti, panyuma pakwe ŵaŵelece Kedala, Adibele, Mibisamu,

¹⁴ Mishima, Duma, Masa,

¹⁵ Hadadi, Tema, Yetulu, Nafishi, ni Kedema.

¹⁶ Aga ni mena ga ŵanace 12 ŵa Ishimaeli. Ŵane ŵakwete misi, ŵane yigono yiyaŵilanjikwaga ni mena gawo.

¹⁷ Ishimaeli ŵawile ali ni yaka 137, nipo ŵamsicile m'malembe.

¹⁸ Yisukulu ya Ishimaeliyo yatamaga mcilambo ca pasikati pa Hafila ni Shuli, kungopoko lyuŵa kwa Iguputo, litala lyakwinjilila ku Asiliya. Jemanjaji ŵaliji mkutama mwakulekangana ni yisukulu ya Abulahamu.

Kupagwa kwa Esawu ni Yakobo

¹⁹ Aji ni ngani ja Isaki mwanace jwamlume jwa Abulahamu. Abulahamu ŵaŵelece Isaki,

²⁰ nipo Isaki piŵamlombaga Labeka mwanace jwamkongwe jwa Betuwelo, jwa ku upande wa Siliya ku Mesopotamiya, ŵaliji ni yaka 40. Mlumbugwawo Labeka ŵaliji Labani.

²¹ Ligongo lyakuti Labeka ŵaliji ŵangaŵeleka, Isaki ŵapopelele ŵamkwakwewo kwa AMBUJE.* Myoyo AMBUJE ŵalipikene lipopelo lyakwe, nipo Labeka ŵakwete citumbo.

²² Labeka ŵaliji mkwembeceya kuŵeleka maŵila, nambo ŵanace ŵala mkinapagwe ŵaliji mkulimbana mcitumbomo. Myoyo Labeka ŵatite, “Naga mwelemu ni mutiyiŵele yele yinduyi, ngutamila cici ni umi?” Myoyo Labeka ŵajile kuwusya kwa AMBUJE kuti amjanje.

²³ Myoyo AMBUJE ŵamjanjile kuti, “Mcitumbo mwenu mwana mitundu jiŵili ja ŵandu. Timciŵeleka mitundu ja ŵandu ŵatacilimbanaga. Mwanace jumo taciŵa jwamacili kumpunda jwine, jwamkulungwa tacimtumicila jwamnondi.”

²⁴ Masiku gakuti apagwe ŵanace pagakwanile, Labeka ŵaŵelece maŵila.

²⁵ Mwanace jwandanda kupagwa ŵaliji jwamcejewu mnope, nipo cilu cakwe caliji mpela nguwo ja manyunya, myoyo ŵampele lina lyakwe Esawu.

²⁶ Mwanace jwaŵili kupagwa ŵapali ali acikamwile cindende ca Esawu. Myoyo ŵampele lina lyakwe Yakobo. Pandaŵi jiŵapagwaga ŵanacewo ni kuti Isaki ali akwete yaka 60.

Esawu akusumisya ukulungwa wakwe

²⁷ Ŵanace ŵala piŵakusile, Esawu ŵaliji jwakupakombola kusakula yinyama ya mwitinji, mundu jwakunonyelwa kwendajenda mwitinji, nambo Yakobo ŵaliji mundu jwakufasa, jwakunonyelwa kutama pa mlango.

²⁸ Isaki ŵamnonyele Esawu kwejinji ligongo ŵaliji mkulya nawo nyama siŵawulagaga jwalakwe mwitinji, nambo Labeka ŵamnonyelaga Yakobo.*

²⁹ Lisiku line Yakobo alimkuteleka ngunde, Esawu ŵawusile kutyocela kwitinji jili jikwete sala

³⁰ Esawu ŵamsalile Yakobo kuti, “Une sala jingwete. Conde mungaŵile ngunde simtelecesi.” (Ali ni ligongo lyakwe ŵaŵilanjidwaga Edomu).

³¹ Yakobo ŵajanjile kuti, “Mlongole kaje kumba une ukulungwa wenu wakutanda kupagwa, nipo tinampe ngundesi.”

³² Esawu ni ŵatite, “Une sigele panandi kuwa, ana ukulungwa wanguwo tiwungamucisye cici?”

³³ Yakobo ni ŵatite, “Mlumbile kaje kuti mumbele une ukulungwa wenu.” Myoyo Esawu ŵalumbile ni kuwusumisya ukulungwa wakwe wakutanda kupagwa kwa Yakobo.

³⁴ Nipo Yakobo ŵampele Esawu mkate ni ngunde sila. Ŵalile ni kumwela mesi ni ŵatyosile. Myoyo ŵanyosisye ukulungwa wakwe wandanda kupagwa.