Genesesi 24 - Chiyawo Bible

Ŵamkwawo Isaki

¹ Abulahamu* ŵacekulwipe mnope, ŵakwete yaka yejinji nipo AMBUJE* ŵaliji ali ampele upile mu yindu yosope.

² Abulahamu ŵatite kwa jwamasengo jwakwe jwamkulungwa juŵalolelaga cipanje cakwe cosope cene, “Mŵice mkono wenu mkati mwa yiga yanguyi.

³ Ngusaka kuti mlumbile mu lina lya AMBUJE, Mlungu jwa cilambo ca kwinani ni cilambo capasi, kuti ngasimumjigalila jwamkongwe mwanace jwanguju jwakuti alombele, kutyocela mwa ŵanace ŵacakongwe ŵa ku Kenani ŵangutama nawo akunoŵa,

⁴ nambo kuti timjawule kumangwetu kwa acalongo acimjangu, ni mkamjigale jwamkongwe jwakuti alombedwe ni mwanace jwangu Isaki.”

⁵ Jwamasengo jula ŵajanjile kuti, “Nambi naga jwamkongwejo akakane kwika akuno, ana tinampecesye mwanace jwenu kucilambo cimwatyocele?”

⁶ Abulahamu ŵatite kwa jwamasengo jwakwe jula, “Iyayi, mlolecesye kuti mkasimumpecesya mwanace jwangujo kweleko.

⁷ AMBUJE, Mlungu wa kwinani juŵanjigele une kutyocela pa mlango pa baba ŵangu, mcilambo cinapagwile nambo soni ŵiŵaŵecete ni kulumbila* kuti, ‘Cilambo aci tinjicipeleka kwa yisukulu yenu,’ tatumisye lilayika lyawo msogolo mwenu, ni tiyikakombolece kuti mkajigale jwamkongwe jwakuti alombedwe ni mwanace jwangu Isaki.

⁸ Nambo naga jwamkongwejo akakane kwika akuno, ngasimsosekwa soni kucisunga cilanga* nambo mkasimyikana mwakumjigala mwanace jwangu kuja najo kukoko.”

⁹ Myoyo jwamasengo jula ŵajigele mkono wakwe ni ŵawuŵisile kusi kwa ciga ca Abulahamu ambujegwe, ni ŵalumbilile ya ngani jeleji.

¹⁰ Jwamasengo jula ŵajigele ngamila* likumi sya ambuje ŵakwe ŵala, ni mituka jambone mnope jakulekanganalekangana jiŵampele ambuje ŵakwe kuti ajigale pa ulendo wawo wakuja ku Mesopotamiya, kuŵatamaga Naholi mpwawo Abulahamu.

¹¹ Piŵayice kumaloko ligulo, ŵasiwutamisye ngamila sila mungulugulu cisima cicaliji kusa kwa msindawo, ndaŵi jiŵakopokaga acakongwe kukuteka mesi.

¹² Nipo mundu jula ŵapopesile kuti, “Conde, AMBUJE Mlungu jwa ambuje ŵangu Abulahamu, ngwaŵenda kuti ambe upile une lelo, soni ŵalosye ambuje ŵangu Abulahamu cinonyelo cawo cangamala.

¹³ Uneji njimi apano pa cisima, nipo acakongwe ŵa mu msindawu tayice apano kuteka mesi.

¹⁴ Uneji tinamŵende mwali jwine kuti, ‘Conde mtule lulo lwenu kuti mwe nawo mesi.’ Mwalijo naga akukunda ni kusalila uneji kuti, ‘Aga mesi amwe, tinasipe soni ngamila syawo mesi kuti simwe,’ jwelejo aŵe mwali jwamsagwile ŵalakwe AMBUJE, kuti alombedwe ni jwakutumicila jwawo Isaki. Naga yeleyi yitendekwe mpela mumbecetelemu, une timanyilile kuti ŵalakwe kweli alosisye cinonyelo cawo cangamala kwa ambuje ŵangu Abulahamu.”

¹⁵ Mkinamale lipopelo lyakweli, Labeka mwanagwawo Betuwelo, juŵaliji mwanace jwamlume jwa Naholi mpwawo Abulahamu, juŵamŵelecele Milika, ŵakopwece ali atwicile lulo lwakwe.

¹⁶ Mwalijo ŵaliji jwakusalala, mwali jumkanagoneje ni jwamlume. Ŵajile pa cisima pala ni kuteka mesi ni kuwujilaga ku nyumba.

¹⁷ Jwamasengo jwa Abulahamu jula ŵamwutucile kuja kuŵecetesya mwali jula. Nipo ŵatite, “Conde mungaŵile mesi panandi ga mlulo lwenu kuti mwe nawo.”

¹⁸ Mwali jula ŵatite, “Aga mesi amwe, ambuje ŵangu.” Mwacitemacitema ŵatusile lulo lula ni ŵampele kuti amwe.

¹⁹ Ali amasile kumwa mesi gala mwali jula ŵatite, “Tingasitecele soni ngamila syenu mesi mpaka sikwanile kumwa.”

²⁰ Ni mwacitemape ŵakusulile mesi gane gala mucakumwela mesi ca yinyama, ni kuwutucila soni kucisima kuja kuteka gane. Ŵatecile mesi gakwanila kumwa ngamila syosope.

²¹ Jwamasengo jwa Abulahamu jula ŵagambaga kumlolecesya mwali jula ngaŵeceta kandu kalikose kuti alole naga AMBUJE ŵawupele upile ulendo wakwe kapena iyayi.

²² Ngamila sila pisyamasile kumwa mesi, jwamasengo jwa Abulahamu jula ŵajigele cipini ca golidi* yibangili yiŵili ya golidi,

²³ ni ŵamwusisye mwali jula kuti, “Ana m'mwejo mli mwanace jwaceni? Ana kumangwenu kwana malo gakuti uweji mpaka tukagone?”

²⁴ Mwali jula ŵatite, “Une ndili mwanace jwa Betuwelo, mwanace jwamlume jwa Naholi juŵamŵelecele Milika.”

²⁵ Tukwete malo gagona yinyamayi ni yakulya yakwe, tukwete soni malo gakuti jemanja mpaka mkagone.

²⁶ Mundu jula ŵatindiŵele ni ŵalambile AMBUJE,

²⁷ ni ŵatite, “Acimbicikwe AMBUJE, Mlungu jwa ambuje ŵangu Abulahamu, ŵele ŵiŵamlosisye Abulahamu cinonyelo cakwe cangamala ni kulupicika. Alondolele uneji mpaka kwika pa mlango wa acalongo acimjawo ŵa ambuje ŵangu Abulahamu ligongo lya AMBUJE.”

²⁸ Mwali jula ŵawutucile ku nyumba ja mamagwe, kuja kwasalila ŵandu wosope yiyatendekweyo.

²⁹ Labeka ŵakwete mlumbu gwawo lina lyakwe Labani. Labanijo ŵawutucile kucisima kuŵaliji jwamasengo jwa Abulahamu jula,

³⁰ ligongo ŵaliji ali aciweni cipini pa mbula ja Labeka ni yibangili m'makono mwakwe, soni ŵampikene Labeka alimkumsala maloŵe giŵaŵecete jwamasengo jwa Abulahamu jula. Ŵamsimene ali ajimi pamo ni ngamila.

³¹ Ŵamsalile jwamasengo jwa Abulahamu jula kuti, “Kwende kumangwetu mkati mwa msindawu, ligongo ŵalakwe ali mundu jwele jwapegwile upile ni AMBUJE. Ligongo cici ajimi kusa kwa msinda? Une nalinganyicisye kala malo ku nyumba, soni malo ga ngamila syawosi.”

³² Myoyo jwamasengo jwa Abulahamu jula ŵapite ku nyumba kula. Labani ŵagopwele katundu jusyatwicile ngamila sila. Ali amasile kusigopola katundujo, ŵasipele yakulya. Ŵajigele soni mesi ni ŵapelece kwa acalendo wosopewo kuti ajoje.

³³ Kaneko ŵayice nayo yakulya kuti ŵandu ŵala alye, nambo jwamasengo jwa Abulahamu ŵatite, “Une ngandya mkanisale yimbicile.” Labani ŵatite, “Ŵecetani yamkusaka kuŵecetayo.”

³⁴ Jwalakwe ni ŵatite, “Une ndili jwamasengo jwa Abulahamu.

³⁵ AMBUJE ampele upile Abulahamu mwakuti ali mundu jwakumanyika mnope, AMBUJE ampele ngondolo ni ng'ombe, silifa* ni golidi,* ŵamasengo ŵacalume ni ŵacakongwe, ngamila ni acibulu ŵajinji.

³⁶ Sala, ŵamkwawo ambuje ŵanguwo, ŵamŵelecele mwanace jwamlume, Salajo ali jwamcekulupe. Nipo ambuje ŵanguwo ampele mwanace jweleju cipanje cakwe cosope.

³⁷ Ambuje ŵangu ŵalumbilisye une kuti nagasunje maloŵe gawo gakuti, ‘Mwanace jwangu mkamsosela mwali pasikati pa ŵali ŵa cilambo acino ca Kenani kungutama uneji kuno, kuti alombele.

³⁸ Nambo mjawule kumangwetu kwa baba ŵangu, ni acalongo acimjangu, kuti mkamjigalile jwamkongwe mwanangu jwakuti alombele.’

³⁹ Une ni najanjile ambuje ŵanguwo kuti, ‘Nambi naga jwamkongwejo akakane kwika akuno?’

⁴⁰ Nambo ŵalakwewo ŵanjanjile kuti, ‘AMBUJE ŵingusinajogopa tatumisye lilayika lyawo kuti lijende pamo ni m'mwejo nipo tampe upile, nipo timkampate jwamkongwe jwakuti alombedwe ni mwanace jwangu pasikati pacalongo acimjangu, mwiŵasa lya baba ŵangu.

⁴¹ Naga mkutenda yeleyi, kulwesa kwangu ngasikumyicila m'mwejo. Nambo m'mwejo mli myice kwa acalongo acimjanguwo, nipo naga acalongo acimjanguwo akuja kumkanya kumpa m'mwejo jwamkongwejo, m'mwejo timciŵa ŵagopoka ku cele cilangaci.’ ”

⁴² Jwamasengo jwa Abulahamu jula ŵapitilisye kuŵeceta, ŵatite kuti, “Myoyo lelo pinayice pa cisima, napopesile kuti, ‘AMBUJE, Mlungu jwa ambuje ŵangu Abulahamu, awupele upile ulendo wanguwu.

⁴³ Ndili apano pa cisima, ngwaŵenda kuti naga akwika mwali apano kukuteka mesi, jutinamsalile kuti, “Conde mtule lulo lwenu kuti mwenawo mesi.”

⁴⁴ Mwali jutanjanje une kuti, “Aga mesi amwe, ni soni tinasipe ngamila syenu mesi kuti simwe,” aŵe jwamkongwe jwamsagwile ŵalakwe AMBUJE kuti alombedwe ni Isaki jwa ambuje ŵangu.’

⁴⁵ “Mkanimale kupopela camu mtima, Labeka ŵakopocele ali atwicile lulo, ni ŵajile pa cisima pala ni kuteka mesi. Ni natite kwa jwalakwe kuti, ‘Conde mwenawo mesi.’

⁴⁶ Mwacitema ŵatusile lulo lwakwe lula ni ŵatite kuti, ‘Mwani, tinasipe soni mesi ngamila syenu kuti simwe.’ Ni namwele, ni ŵasipele soni ngamila sila mesi.

⁴⁷ Ni namwusisye kuti, ‘Ana m'mwejo mli mwanace jwaceni?’ Ni ŵatite, ‘Une ndili mwanace jwa Betuwelo mwanace jwamlume jwa Naholi juŵamŵelecele Milika.’ Ni nam'wecice cipini pa mbula jakwe ni yibangili m'makono gakwe.

⁴⁸ Natindiŵele ni kwalambila soni kwatogolela AMBUJE, Mlungu jwa ambuje ŵangu Abulahamu, juŵanjendesye une cenene kuti ngamjigale mwanace jwamkongwe jwa mlongo mjawo jwa ambuje ŵangu kuti alombedwe ni mwanace jwa ambuje ŵanguwo.

⁴⁹ Sambano musalile jemanja, naga mkukunda kutenda mwakulupicika yiŵasasile ambuje ŵangu. Naga akukana asalile, kuti manyilile yakutenda.”

⁵⁰ Labani ni Betuwelo ŵajanjile kuti, “Pakuŵa cindu celeci cityocele kwa AMBUJE, uweji nganitukola yakuti mpaka tuŵecete soni.

⁵¹ Labeka sambano ali m'myala mwenu, mwajigale mjawuleje nawo. Mkampelece kwa mwanace jwa ambuje ŵenuwo kuti akaŵe ŵamkwakwe, mpela mwele mwaŵecetele AMBUJE.”

⁵² Jwamasengo jwa Abulahamu jula piŵagapikene maloŵe gawo, ŵajineme ni ŵalambile AMBUJE.

⁵³ Nipo jwamasengo jula ŵakopwesye yakusalalisya ya silifa ni golidi, ni yakuwala yakulekanganalekangana ni ŵayipelece kwa Labeka. Ŵapelece soni mituka ja mtengo wawukulungwa kwa Labani mlumbugwe ni kwa acikulugwe.

⁵⁴ Jwalakwe pamo ni ŵandu ŵiŵaliji najo ŵalile yakulya yila ni kumwa yakumwa, ni ŵagonile kukoko. Kundaŵi pikwacele, jwalakwe ŵatite, “Sambano unetu ngulanga, kuti mbujile kwa ambuje ŵangu.”

⁵⁵ Mlumbugwe jwa Labeka pamo ni acikulugwe ŵatite, “Iyayi, atujembeceye panandi kaje, mwaliju atame ni um'weji kwa masiku gangapunda likumipe basi. Patigamale gele masikugo tacijawula pamo ni m'mwejo.”

⁵⁶ Nambo jwamasengo jwa Abulahamu jula ŵatite, “Conde akangokoya, pakuŵa AMBUJE angamucisye kwejinji pa ulendo wanguwu. Conde angunde mbujile kwa ambuje ŵangu.”

⁵⁷ Jemanjajo ŵajanjile kuti, “Kwende tumŵilanje mwalijo kuti tumwusye.”

⁵⁸ Ŵamŵilasile Labeka ni ŵamwusisye kuti, “Ana mkusaka kulongana ni jwamasengo jwa Abulahamuju?” Labeka ŵajanjile kuti, “Elo, tinjawule.”

⁵⁹ Myoyo ŵakundile Labeka pamo ni jwamasengo jwakwe jwamkongwe, kuti alongane najo jwamasengo jwa Abulahamu jula ni ŵandu ŵiŵampecesye ŵala.

⁶⁰ Nipo ŵampele upile Labekajo pakusala maloŵe gakuti: “M'mwe Labeka, Mlungu ampe upile kuti mkaŵe nangolo jwa ŵandu ŵajinji. Yisukulu yenu yikasumule misinda ja amagongo ŵawo.”

⁶¹ Myoyo Labeka pamo ni ŵali ŵakwe ŵamasengo, ŵakwesile ngamila ni ŵawutandite ulendo pamo ni jwamasengo jwa Abulahamu jula.

⁶² Isaki, ndaŵi jeleji, ŵaliji mkutama mcipululu ca kum'mwela kwa Kenani, kucaliji “Cisima ca Jwa umi Jwakumbona Une” cila.

⁶³ Nipo ligulo Isaki ŵajile kukwendajenda mu mgunda nipo piŵajinamukwice ŵasiweni ngamila silimkwisa kuŵaliji jwalakwe.

⁶⁴ Labeka nombe najo ŵajinamukwice, nipo ŵam'weni Isaki ŵatulwice pa ngamila jiŵakwesile,

⁶⁵ ni ŵamwusisye jwamasengo jwa Abulahamu jula kuti, “Ana ŵani ŵakwenda mu mgunda kwisa kukutucingamila?” Mundu jula ŵajanjile kuti, “Ambuje ŵangu ŵala ni ŵelewo.” Myoyo Labeka ŵajigele nguwo ni kuliwunicila kungope.

⁶⁶ Jwamasengo jwa Abulahamu jula ŵasalile Isaki yosope yiŵatesile jwalakwe ku ŵajile kula.

⁶⁷ Isaki ŵamjigele Labeka kuŵa ŵamkwakwe, ŵajinjile najo mu tenti jakwe, jele kala ŵatamaga Sala mamagwe mkinawe. Isaki ŵamnonyele Labekajo mnope. Myoyo mtima wa Isaki wuwagumbele ni canasa ligongo lya ciwa ca mama ŵawo, ŵatulele ligongo lyakulombela Labeka.